مره واحد صعيدى

بما اننا هزرنا كتير خلاص نهرج بقه ...انا النهارده هاحكيلكوا نكته بس بايخه و زى اى نكته بايخه بتبتدى بمره و احد صعيدى.....

مره واحد صعيدى كان بيشتغل معايا دكتور فى المستشفى و طبعا بالحاسه الساسه بتاعت اى بنت اول ما ادخل مكان اعرف بالسليقه كده العرسان المنتظرين.....اخينا بقه كان مناسب سنا و شكلا و كان يبدو عليه الذكاء و كمان كان باين منه ميل لكن كان شخصيه ضعيفه و اهله صعايده فى البلد و لازم يتجوز بنت عمه و قصص افلام عربى كده

و بما انى شخصيه نفعيه امبرياليه .....فانا ماحبش اى علاقات مع الزمايل مادام الموضوع مش هايرسى على مأذون و هكذا اخدت جنب و بعدت خالص............جميل

و بعد تلات سنين(ايون تلاته مافيش غلط) لقيت بلدينا عمال يتسهوك

مش بنت عمى اتجوزت

الف مبروك(و انا مال اهلى؟؟)

شوفى صور الفرح

ههه(طب جنب و اخدنا..نعمل ايه.. مش ناقص غير الشبشب )

شبشب؟؟شبشب ايه؟؟

هه ...لا ماتخدش فى بالك ...عن اذنك

تقولولى قصده شريف و جمال و علاء اقولوكوا كان زمااااان و ادينا عشره سنين و الانطباعات الاولى تدوم و انا عارفه انه ما يقدرش يقف لاهله فى البلد

و اذ فجأتن الاقيه باعتلى مسج بحبك و كلام كده و عايز اتجوزك

فكرت............. صحيح فقران و مقحط ولكعى مش عارف يخلص الماجستير واهله هايكرهونى لكن فى النهايه شغال و اللى نعرفه احسن من اللى مانعرفوش و هكذا....

طلب منى اننا نأجل اى حاجه رسمى لغايه اخوه ما يخلص ثانويه عامه عشان مانشوشرش عليه ده على اعتباران انا هاعره مثلا.......بلعت الاهانه و قلت كله يهون فى سبيل الهدف الاسمى اللى هو ان تحملى لقب مدام

الانتظار ده كان فيه شهر و لا شهر و نص و أوضحتله ان انا مش هاقدر اتجاوز فى اى حاجه لغايه ما يتم حاجه رسمى

طبعا طبعا انا عندى اخوات بنات

ومن ساعتها طوفان من بحبك وحشتينى ..بحبك و انتى مطلعه عينى.......وووو

الحقيقه انا كان رد فعلى هو حاله من القرف و الملل...ايه شغل المراهقين ده؟؟طب لو المتكلم عاقل يبقى المستمع مجنون مانا قدامك من 3 سنين..المفروض اصدق الكلام ده؟؟؟راااااااااااحت خلاص...........المهم مارضتش اتف فى وشه البقين دول و سكت

مره بعتلى رساله بالانجليزى ماعرفتلهاش راس من رجل و لا فهمتلها معنى

ايه رأيك فى الرساله؟

ميرسى

يعنى قولتى ايه؟

لا اله الا الله يا عم حل عنى بقه...بعد كده اكتشفت انها جزء من اغنيه لسيلين ديون(و عاملى صعيدى)

بعد شويه اتنقلنا لمرحله جديده

كان فى واحد واقف فى الاوده و انتى بتكلمى فلانه

مش فاهمه؟؟؟

يعنى انا باغير

طب ده مكان شغل و انا بكلم حد تانى اساسا

اوففففففففف انا كانت روحى فى مناخيرى و على رأى صاحبتى حتى الصعيدى طلع منفسن

الكلام ده حصل من سنتين و انا كنت فى لحظه يأس مدلهمه (اى و الله)و اصريت اكمل مهما حصل و عصرت على نفسى 3 كيلو ليمون

فقير.......... ....و ايه يعنى خدوهم فقراء يغنيكم الله

اهله مش طايقنى........و ايه يعنى مانا هاعيش بعيد و ادفع بالتى هى احسن و كده

لكعى و مش عارف يخلص الماجستير.......ان شاء الله ربنا ينفخ فى صورته و يخلص قبلى ربنا يسهل

منفسن..................ربنا يهدى

بيقولوا بتاع ممرضات و كده.................................ربنا يسترررر

و هكذا استمريت رغم يقينى الداخلى انه لا يمكن يقدر يكمل لكن انا قلت انا هاعرف الناس اكتر من نفسها؟؟؟

واخيرا خلصت امتحانات الثانويه العامه و لقيت بلدينا بيكلمنى فى التليفون و يقول

انا كلمت ابويا

و الله طب خير قال ايه؟؟

ماينفعش فى التليفون

كده (طب ما انت كلمته فى نفس ذات التليفون ..ايه اللى يمنع انه يحيكه عليه...بلاوى)طب بكره فى المستشفى ان شاء الله

طب و ليه مانتقابلش بره النهارده؟

اصلى مش متعوده على كده و بكره قريب ان شاء الله

مش فاهم ليه يعنى

...............

طب خلاص اصبر لبكره

الحقيقه انا الفار لعب فى عبى و قلت باينه فاكرنى واحده من اياهم ولا بيتسلى و لا حكايته ايه ده

و جه بكره و بعد بكره و بعد بعد بعد بكره و لا هو هنا ..و بعد ماكان بينطلى كل ساعه و التانيه اختفى تمامنننننننننننننننن

يا........................................

يعنى كان بيلعب و قالك دى من مصر و هتلف على حل شعرها معايا

انا كنت فى حاله من الغضب و الشعور بالاهانه و القرف و حاجات كتيره مع بعضها من بتاعت د/نبيل فاروق و الحاج ادهم صبرى

حصلى زى العيانين مابيقولوا كرشه نفس...مش عارفه اخد نفسى...الاهانه واقفه فى زورى لا عارفه ابلعها و لا اخرجها

يعنى يا رب لا بيا و لا عليا و الهم يتحدف عليا.....لا عايزاه و لا شجعته و قلت لصاحبتى بكل غضب

انا الغلطانه نزلت فهنت

ههه؟؟؟؟؟؟؟؟؟

نزلت فهنت.........ده كلام نجيب محفوظ.......سى السيد قال لزنوبه كده

نزللت ايه؟؟

نزلت فهنت

بتعددى بالنحوى ...و الله ما نت متجوزه فى عمرك

فضلت على الحاله ديه حاجه زى تلات اسابيع و اخيرا بدأ سبع البرمبه يظهر و لاحظت انه بيحاول يتواجد فى طريقى ...طبعا انا و لا كأن هوا قدامى.....نزلت فهنت صحيح

و مره لقطنى و جرى ورايا

و مش معنى ان موضوعنا ماتمش اننا ما نكونش زمايل

(المره دى ما كنش كرشه نفس كان دور اسفكسيا و طلوع روح)

انت بتقول ايه يا افندى؟؟؟؟؟؟؟؟؟؟؟؟

و لاول مره فى حياتى انطلق فى عزف منفرد كريشندو متعالى الايقاع فى وصله غير مسبوقه من الردح و طوله اللسان

الحقيقه انا كنت بارتجف غضبا و مش فاكره انا قلت ايه بس هو كان على كلمه واحده انا انسان محترم

و طبعا خلصت كل اللى عندى و لفيت و سيبته بقه مفتوح و سبحان الله كرشه النفس اختفت تماماننننننننن

فيما بعد اعترضت امى على رد فعلى لكن لست حزينه و لا نادمه

كان عندى كرشه نفس!!!!!!!!

عن الغربه و الغرباء

الغريب فى المعجم الوسيط هو الرجل ليس من القوم ...ليس من البلد

اما عندى فانا الغريبه وسط الغرباء

اقضى ايامى فى المستشفيات و ما ادراكم ما المستشفيات

هل بت ليلك يوما فى مستشفى؟؟؟

مهما كانت المستشفى حكوميه ومشغوله بالمرضى فى اقسامها المتعدده فان الليل فى المستشفيات واحد

مقبض و كئيب

صمت رهيب و ظلام كأنك تسير بين الاموات ...انها الغربه مجسده

تلك الرائحه الخانقه سواء كانت رائحه المطهرات ام رائحه المرض

اجل للمرض رائحه...لكل الامراض نفس الرائحه..لا تحتاج للذهاب الى مستشفى لتشمها..لو مرض احدهم فى البيت لشممت نفس الرائحه

احدثكم الان عن الغرباء...الاطباء

مجموعه من الغرباء...ليسوا من نفس المكان ...ليسوا من نفس الاقوام

بشر لا يعرفوا بعضهم يجدوا أنفسهم مطالبين بان يقضوا ساعاتهم معا

هنا ترى اختلافا واضحا فالبعض يتقيد بقوانين الغربه و البعض يحاول كسرها

نسيت ان اخبركم ان للغربه قوانين

فالغرباء يجب ان يظلوا غرباء...لا يعرفوا شيئا عن بعض..المسافات بينهم ثابته ان لم تتباعد

تذكرت عندما سألونى عن زميل لى كنت اخذ معه نبطشيات لمده عام و لم اعرف الاجابه

اكتشفت انى لا اعرف عنه شيئا حقا

و لكن احقا لا اعرفه...الا يجعلك العمل تعرف الناس على حقيقتها؟؟

ولكنى لا اريد ان اعرف اكثر ..احسبنى تقيدت بقانون الغربه

البعض يحاول ان يبنى علاقات انسانيه مع باقى الغرباء فيحكوا عن انفسهم و يكشفوا الاسرار

لعلهم لا يتكلمون الا لثقتهم ان الاخرين غرباء بعيدين باميال عن حياتهم

لكن اتريدون الصدق انما هى مسكنات لتمضيه ذلك الليل الطويل الكئيب

و فى نهايه اليوم و بعد تفرق الغرباء ..ترى ايتذكرون بعضهم؟؟

لكن لا

اجدنى اتذكر البعض بكل ود رغم مرور سنين على اخر لقاء بينى و بينهم و اخرين معى و لكنهم غرباء

ربما لا اعرف اين يسكن الغرباء و لكنى اعرف الانسان

لسنا بالغرباء...و ان كنا

فطوبى للغرباء

الحلوه اتكلمت

ايها الناس.....

المكنه طلعت قماش...

من وحى البعكوكه

البعكوكه مريضه و مصابه بنوبات صرعيه خطيره و لانى اهواها فانى لم اطق صبرا و صرت طريحه الفراش انا الاخرى اتذكر ايامى معها

*******************

اذهب الى الميكانيكى فاطلب ضبط الزوايا و لكنه ينصح بالكشف على العجل اولا فاوافق و لكنى اصر على ضبط الزوايا فيجيبنى زى ما تحبى ...سيام (ايون بالميم)

*******************

تغرقنى تلك التعاسه و انا وحدى فى البعكوكه هى لا تكف عن الانتفاض كأنها طفل ينشج بالبكاء وانا جالسه ابكى فى صمت بينما نستمع الى عمر خيرت..كم نتوحد فى مشاعرنا انا و بعكوكتى الصغيره اللطيفه و تسألنى

لما تبكين؟؟

لانى اسمع عمر خيرت

لما تستمعين له اذا؟؟

ابتسم و ارد....لكى ابكى

يا من خلقت الدمع رفقا منك بالباكى الحزين

بارك لعبدك فى الدموع فانها نعم المعين

*********************

تصاحبى صديقتى فلا اجد بدا من ان اغير ما اسمعه الى نجوم اف ام و لااركز مع ذلك الضجيج المتواصل و اندمج فى الحوار مع صديقتى الى ان ان يشد انتباهى لحنا ذكرنى بالحان الندب الصعيديه.. تلك الاغانى الحزينه الممتلئه شجنا كأنها روح تحترق ..كم احب تلك الموسيقى ...هذا ذوقى فلا تلومنى على ما انا عليه


دائما ما يجذبنى اللحن قبل الكلمات فان اعجبنى استمعت لاعلم ما يقول ...كان عمرو مصطفى ينوح بصوته الاجش الذى لا يصلح للغناء اطلاقا يبكى حبيبا لم يبادله الحب و يودعه...يبكى سوء حظه مع هذا الحبيب

جيت غلطه فى حياتى و بادفع تمنها....شكلى ظلمت انا حد زمان و ماخدتش بالى

وقفت الجمله عقبه فى طريقى ..صخره لا يمكن زعزعتها...ايمكن ان نظلم دون ان ندرى ...احقا لا ندرى؟؟؟؟ما اهون احزان الناس بجانب احزاننا مهما كانت تفاهتها...ترى كم من الناس ظَلمت؟؟؟يؤرقنى ذلك الشعور باننا نعلم... بانه لا احد مغيب...الكل يظلم بعضه باصرار و قسوه غير محتملين


يفزعنى اكثر المصير و يقينى ان الله لا ينسى حق المظلوم..لا اكف عن التسأول ان كان كل ما يحزننى هو تكفير عن اخطائى بحق الآخرين...افكرو اراجع حياتى فاجدنى لم اوذى انسانا بقصد ابدا و لكن بالتأكيد تسببت فى بعض الاحزان...لعلنى لم اكفر عنها كلها بعد..لكن لا احسب انى استحق كل هذا الحزن


جزء منى يؤمن ان الافضل لم يأت بعد و ان الله ارحم مما احسب و ان لكل شيئ سبب...انت فقط لا تعرفين..انت اضعف مما ينبغى



آمنى معى بان اجمل الايام لم نعشها بعد...عندها ستكفين عن البكاء



و بعد كلام و اخذ و رد كثير مع نفسى و بعد ايام عديده



لم تعد حالى بنفس الكآبه و صار البال رائق و استمع الى فيروز بكثره ...تلك الكثره التى تغلب الشجاعه


اما لكم و للكل فاقول سامحونى ما كنش قصدى اما عن البكاء فهو....... سيام

صوت صفير البلبل

شُغلت كثيرا الفتره الماضيه ...رمضان بقه كل سنه و انتم طيبين
لكنى لم احب ان اترك المدونه مهجوره(خوفا من العناكب و الحشرات و ما شابه ) لذا و من وحى طوفان المسلسلات التى اُغرقنا بها و التى فشلت حتى فى احصاء الاسامى(دعك من ان اتابع ايا منها ) الا ان اسم ابو جعفر المنصور لصق بذهنى و كنت انوى ان اتابعه و لكنى نسيت فى الحقيقه
ابو جعفر المنصور هو مؤسس بغداد المنكوبه التى دمرت مرتين..مره على يد الغول و مره على يد .......المغول برضه (اقل وصف لاصحاب ابو غريب)
المهم بعيدا عن جو الدراما هذا(كفايه المسلسلات)كان بالرجل بعض البخل على قياس ذلك العصر فلم يكن يعطى الشعراء عطايا الا اذا قالوا شعرا من تأليفهم ...و طبعا لم يكن هذا ليعجز الشعراء فالشعر ديوان العرب كما نعرف و لكن المنصور كان خبيثا و لئيما (و الا ما صار خليفه 21 سنه...تخيل من يظل 27 سنه يكون ايه؟؟؟)فقد كان يحفظ اى قصيده اذا سمعها مره واحده و كان عنده غلام يحفظ القصيده بعد سماعها مرتين و جاريه تحفظها بعد ثلاث مرات...فكان اذا جاء اى شاعر متسول غلبان ...انتظر المنصور حتى ينتهى من القصيده و يقوله "قديمه "و يرددها له و يستشهد بالغلام و من بعده الجاريه الذان يحفظان القصيده مع كل مره تكرار و هكذا اسقط فى يد الشعراء
لكن الاصمعى و هو شاعر متسول عريق شك فى الامر فكتب قصيده فصيحه شديده الصعوبه و جاء المنصور متنكرا

صـوت صــفير الـبلبـل *** هيج قـــلبي الثمــل

المـــــــاء والزهر معا *** مــــع زهرِ لحظِ المٌقَل

و أنت يا ســـــــــيدَ لي *** وســــــيدي ومولي لي

فكــــــــم فكــــم تيمني *** غُـــزَيلٌ عقــــــــــيقَلي

قطَّفتَه من وجــــــــــنَةٍ *** من لثم ورد الخــــجل

فـــــــقال لا لا لا لا لا *** وقــــــــد غدا مهرول

والخُـــــوذ مالت طربا *** من فعل هـــذا الرجل

فــــــــولولت وولولت *** ولـــــي ولي يا ويل لي

فقلت لا تولولـــــــــي *** وبيني اللؤلؤ لى

قالت له حين كـــــــذا *** انهض وجــــــد بالنقل

وفتية سقــــــــــــونني *** قـــــــــهوة كالعسل لى

شممـــــــــــتها بأنفي *** أزكـــــــى من القرنفل

في وســط بستان حلي *** بالزهر والســـــرور لي

والعـــود دندن دنا لي *** والطبل طبطب طب لـي

طب طبطب طب طبطب *** طب طبطب طبطب طب لي

والسقف سق سق سق لي *** والرقص قد طاب لي

شـوى شـوى وشــــاهش *** على ورق ســـفرجل

وغرد القمري يصـــــيح *** ملل فـــــــــــي ملل

ولــــــــــــو تراني راكبا *** علــــى حمار اهزل

يمشي علــــــــــــى ثلاثة *** كمـــــشية العرنجلي

و الناس ترجــــــــم جملي *** في الســوق بالقلقللي

والكـــــــــل كعكع كعِكَع *** خلفي ومـــن حويللي

لكـــــــــــن مشيت هاربا *** من خشـــية العقنقلي

إلى لقاء مــــــــــــــــلك *** مــــــــــعظم مبجل

يأمر لي بخـــــــــــــلعة *** حمـــراء كالدم دملي

اجــــــــــــر فيها ماشيا *** مبغــــــــــددا للذيل

انا الأديب الألمــعي من *** حي ارض الموصل

نظمت قطــــعا زخرفت *** يعجز عنها الأدب لي

أقول في مطلعــــــــــها *** صوت صفير البلبل

الخليفه اذبهل و لم يستطع ان يحفظ شيئا...يا غلام ...يا جاريه...لا شيئ.. لم يستطع احدهم ان يحفظ شيئا
ولان من حفر حفره لاخيه وقع فيها فقد كانت العاده ان يكافئ الخليفه الشاعر بوزن قصيدته ذهبا لهذا كان الشعراء يطيلون لحد الملل
المهم قال الاصمعى كنت قد كتبتها على حجر كان لابى و وجد الخليفه انه لو اعطاه وزن الحجر لافلست البلاد...عندها عرٌف الاصمعى نفسه و اشترط على الخليفه ان يعطى اى شاعر عن شعره سواء كان قديما او حديثا...غريبه امر هذه الصفاقه..شاعر من وزن المتنى كان يكتب بلقمته و فى نفس الوقت كان كتله من الغرور...لا افهم كيف قبل هؤلاء الموهوبين على انفسهم حياه التسول هذه و مازلت حتى يومنا هذا لاافهم

الصورتين لتمثال لابوجعفر المنصور فى بغداد و الاخرى بعد ان اسقطه الامريكيين

نصيحه القصيده الطف كثيرا اذا سمعتها ... و حاولت ان تقرأها

وجائزه لمن يترجمها

اولمبيات...خمس حلقات

الحلقه الاولى

من صغرى و انا اهوى متابعه بعض الالعاب الاوليمبيه... الجمباز الفنى و الايقاعى..العاب القوى..السباحه و الغطس و السباحه التوقيعيه و احيانا رفع الاثقال!!!

لظروف العمل و الحياه لم اتمكن من المتابعه جيدا و لكن مهما قلت متابعتى فان الجزء الذى تابعته ينجح فى استفزازى ضد الولايات المتحده الامريكيه

حتى فى الرياضه !!ورغم انها تمتلك مجموعه من افضل الرياضين على مستوى العالم الاانك تجد ممارسات ابعد ما تكون عن الاخلاق الرياضيه بدأ من اضافه بعض الرياضات التى لا يلعبها الا الامريكيين مثل كره اليد الشاطئيه ..سوفت بول(لا اعرف لها ترجمه الا الكره الناعمه) و كره القدم النسائيه...كل هذه الالعاب اضيفت فى دوره اتلانتا و لا يزال الامريكيين يحتكروا الميداليات الذهبيه فيها حتى اليوم...(ربما لو نظمنا الالعاب الاوليمبيه يوما اضافوا كره السرعه (ولكننا سنخسر ايضا

الجمباز من الالعاب التى بدأ الامريكيين يبرعون فيها و يحصدون الذهب و لكن لننظر اكثر

الامريكى بول هام حصل على ذهبيه ا ثينا متفوفا على لاعبيين كوريين و بعد مراجعه النتائج وجد خطأ فى الحساب و ان الجائزه من حق اللاعب الثالث و قامت اللجنه الاوليمبيه بايقاف ثلاث حكام و بعثت بخطاب الى هام تطلب منه التخلى عن الميداليه لمستحقها الفعلى لانها لا تستطيع تغيير النتيجه...هام رفض التراجع و قال انه يتفهم ما مر به اللاعب الكورى من معاناه لانه يعانى ايضا!!!!

فى نفس تلك المنافسات كان يلعب البطل الروسى اليكسى نيموف و قام الحكام بمنحه درجه متدنيه بعد اداء جيد فما كان من الجمهور الا الاحتجاج الصاخب بصوره منعت استكمال اللعب (كان الدور على هام مما اثار الجماهير اكثر) لمده ربع ساعه..اضطر الحكام الى اعاده التقييم و رفع النتيجه قليلا فاستمر الجمهور على صخبه و لم يتوقف الا بعد تدخل نيموف نفسه و طلبه الهدوء من الجماهير

فى الصوره نرى الغضبه التلقائيه للجماهير ..لم تكن الجماهير روسيه فقط بل كانت من مختلف الدول و كل يلوح بعلم بلاده ...حتى باقى المتسابقين كانوا مؤيدين لتلك الثوره الغير مسبوقه

لم يفز نيموف بالميداليه وقتها و لكن تمت تغيير قوانيين التحكيم بعدها!!!!

فى منافسات بكين شاهدت الامريكيه ناستيا لوكين تفوز بالذهبيه ..كان الاسم و الملامح و حتى اسلوب الاداء يشى بنكهه روسيه خالصه و بحثت لاجد انها من اصل روسى و ان الاب (هو المدرب فى نفس الوقت ) و الام هم ابطال جمباز سوفيت هاجروا لامريكا و انشأوا معهد رياضى هناك...لا اقول ان هذا خطأ الامريكيين و لكن بعدما كانوا يستوردون المدربين الروس و الصينين صار اللاعبين ايضا هديه فوق البيعه...للامريكيين تاريخ طويل فى هذا و لا ننسى نافرتلوفا و ناديا كوماتشى و غيرهم

يدفعنى هذا للتفكير فى مأساه هجره العقول...ايمكن ان تتفهم موقف من ترك بلده و تجنس بجنسيه اخرى..قد تكون الظروف صعبه و لكن ايكون هذا مبررا لمثل تلك الاساءه ..كيف يمكن ان ترتقى اذن؟؟لذا اجدنى غاضبه من ذلك الاحتفاء بزويل و هو رجل لم يرى بلده او يحاول مساعدتها لمده ربع قرن و بعد الفوز بنوبل كمواطن امريكى ظهر ثانيه كمصرى و رحنا نهلل كعادتنا و نسينا اخرين هاجروا و لم ينسوا بلدهم د.مجدى يعقوب و اخرون لم يرحلوا و ظلوا ينحتون فى الصخر كل يوم د.احمد شفيق

الحلقه الثانيه

السباح الامريكى مايكل فيليبس سباح فذ استطاع الفوز بثمانى ميدليات ذهبيه بهذه الاوليميات لكن الجدل دائر حول ذهبيه 100 متر فراشه و هو السباق الذى كان متأخرا فيه نتيجه لعيب فى نظاره الماء و لكن فيما يشبه المعجزه استطاع الفوز على الصربى كافيتش بفارق فنيه (اللى هى اقل من الثانيه على رأى سعيد صالح بالضبط 01. ) و قد قدم الصرب شكوى قائلين ان بطلهم لمس الحائط اولا و النت ملئ بفيديو و صور من كل جانب( الامريكى و الصربى ) تؤيد وجهه نظره الا ان المسئولين الصرب اقتنعوا فى النهايه حتى كافيتش نفسه و هو مدون زميل كتب عن سعادته بالميداليه الفضيه و ساترك لكم الصور لتحكموا (كافيتش هو صاحب البدله الكامله)

الحلقه الثالثه

العداءه الامريكيه الاسطوره ماريون جونز و الفائزه بخمس ميداليات بسيدنى منهم ثلاث ذهبيات اعترفت مؤخرا بتعاطيها منشطات ممنوعه رغم نفيها هذا مرارا و تكرارا سابقا وقد قامت اللجنه الاوليمبيه بسحب كل الميداليات منها...ليست وحدها من تفعل هذا ففى هذه الاوليميات سُجلت خمس حالات تعاطى للمنشطات ..السؤال الآن من يعوض هذا الذى حصل على ميداليه ذهبيه بعد سبع سنوات و قد حرم من زهوه الفوز فى حينها ؟؟؟؟

الحلقه الرابعه

حتى قناه الجزيره الرياضيه بكل امكانياتها لم تجد سوى رياض شراره ليشرح لنا نحن "اعزاءه المشاهدين فى كل مكان صحرا ان كان او بستان ان حوا (حواء)اخدت نص ام الالعاب (اللى هى العاب القوى ) من الراجل المسكين اللى هو ولد"

يا الله

رحمتك يا رب (و لكن لا انكر للرجل حماسه الغير طبيعى لكل ماهو عربى و للامريكيين ايضا )

الحلقه الخامسه و الاخيره

قامت اللاعبه الاسرائليه بالاداء على موسيقى جبار لعبد الحليم

سرقوا الارض و الآن الموسيقى

ماذا سيسرقون غدا...لعله لم يبقى شيئ ليسرقوه

القديسون مملون

ماذا تفعل لو صرت رئيسا؟
الاجابه سهله طويله و ممتعه .....لكن مؤخرا صرت رئيسه صغيره لبعض زملائى و اقولها ليس فى الامر اى متعه
حكيت لكم قبلا عن ولعى المرضى بالكمال..اقول مرضى لانى احسبه كذلك هو ولع.. رغبه قاهره لا استطيع الفرار منها
يظل هذا الولع شبه خافى حتى اكلف بواجب ما فلا استطيع الفرار من نفسى اتعب و يتعب من حولى لكنى حقا و صدقا لا افهم ما المشكله فى القيام بالعمل لماذا يحتاج الامر كل هذا العناد من البشر
الا يحاسبون انفسهم ابدا
ولكن لعلى انا التى تحاسب اكثر مما ينبغى و لكنى لا استطيع فرارا من نفسى
يتنازعنى رغبتان...رغبه فى الصفاء و الموده و عدم تعكير الصفو و رغبه فى الا يصح الا الصحيح و لو استاء العالم كله
اذا لقينى الناس فى غير العمل فانهم يرونى واحده من الطف البشر و الينهم..لن يفلح شيئ فى اخفاء ابتسامتى اما فى العمل و رغم انى لا اخرج عن ادبى الا انهم يقولون حنبليه...لو قللت ضميرك شويه و اتهامات خفيه بالسيطره اقرأها بين السطور
مادمت فى مكان المسئوليه فانى اجبر الاخرين على العمل و يهدأ منى نصف و يستيقظ النصف الثانى يلومنى فيم هذا النكد سيكرهك الناس عما قريب..اكانت الدنيا انهدت لو سكنتى قليلا
يزيد تعاستى رغبه الناس فى الا ترأسهم امرأه فتاه ان صح التعبير ...ايها الحمقى ليتكم تعرفون
اكاد ابكى قهرا و تعاسه
بكيت بالفعل
عندما شاهدت جزء من فيلم two weeks notice
الفيلم يحكى عن محاميه جاده جدا تعمل لصالح احد الاثرياء لكى تثنيه عن تدمير مبنى اجتماعى ثم لا تلبث ان تحبه و عندما تكتشف خيانته لها و لوعده يتواجهان فيرد مدافعا عن نفسه" نعم انا انسان و لا يمكنى التحكم فى كل شيئ انت مثاليه للغايه لدرجه تجعل غاندى يبدو كبائع جوال لهذا انت وحيده انت غير محتمله لا احد يحب ان يوعظ طوال الوقت لا احد يريد الحياه مع قديسه فالقديسون مملون" ترجمه بتصرف
القديسون مملون
لست قديسه و لكنى ساغدو ممله
ينتهى الفيلم نهايه سعيده و لكن فى الدنيا لا تأتى دائما النهايه السعيده




تحديث
تغيبت الاسبوع الماضى عن النبطشيه و عدت لاجد زملائى قاموا بكل الاعمال التى كنت اطلبها منهم و كانوا يتذمرون منها...سارع الجميع باخبارى عند عودتى...لكم اسعدنى هذا...تزامن هذا مع رساله من صديقه مكونه من جمله واحده "شكرا لوجودك فى حياتى"

ان تحدث فرقاٌ و لو كان صغيراً....كأنك ملكت الدنيا

حدث الاسبوع الماضى يا babyyyyyyyyyyy

قضيت الاسبوع الفايت كله لف فى انحاء القاهره الكبرى ما بين العتبه للتحرير للعباسيه فى عز الضهر ده غير المرمطه ما بين مكاتب الموظفين اللى شعارهم "ليه تسهل على الناس مادمت تقدر تكلكعها" و يدور الحوار التالى

-لو سمحت

-نعم (تعبير وشه اهانه فى حد ذاته)

-كنت عايزه كذا

-ما ينفعش يا انسه

-ليه

-هو كده

-طب....

-ماطبش,اخوكى كان هنا امبارح و مشى قفاه يقمر عيش

-اخويا؟؟؟ده انا سايباه فى اسكندريه من اسبوع؟؟

-يووووووووووه ,زميلك زى اخوكى يعنى ...امال دخلتوا طب ازاى

-.................

و اخرج اسأل فين المدير؟ و يتكرر نفس الحوارلكن لانه لايأس مع الحياه فانا باكمل و اسأل عن المدير الاكبر و هكذا لمده ساعه ساعتين او يومين و فى النهايه اخد الامضا الشريفه فى خمس دقايق

المهم عشان ما تتعلوش قدرت اقدم الطلب المكون من 18 ورقه (بجد مش هزار)و لا كأنى هاقدم على منصب مساعد وزير الرى بس المعاناه ديه ادت الى انهيار حالتى النفسيه الى الحضيض لكن لانه لا يأس مع الحياه و لا حياه مع اليأس (منه لله مصطفى كامل ) قررت أرٌوح عن نفسى و اروح حفله موسيقى فى ساقيه الصاوى اصل انا مابحبش حفلات الاغانى يعنى

قوم ايه اتفقت مع لولو قريبتى اننا نروح و بعد يوم شاق و عمل كام مشوار على الماشى قبل الحفله و لف على الركنه قد ساعه و طبعا ماكناش حاجزين لكن وصلنا بدرى ساعه و لوسمحت تذكرتين.....هنا كويس؟ بس ما تتأخروش بكره بقه


بكره؟؟؟؟؟؟


لولو:تاننننننننننننننى(اصل انا ليا سوابق فى موضوع الحول فى قرايها المواعيد من النت من زمان)


و العمل ؟؟

انا يا قاتل يا مقتول انهارده ده انا حزمت امتعتى و هابيت عند لولو انهارده على حس الحفله...كل ده يروح عالفاضى

-شف لنا عندك ايه انهارده

" افضل اغانى الخمسينات و الستينات بصوت الهام امين"

-ما بحبش الاغانى القديمه

-يا عبيطه حد مايحبش عبد الوهاب و فريد و يمكن يكون توزيع جديد او تكون الاغانى اللى بتتعاد دلوقتى يعنى ياحبيبى عد لى تانى-حكايتى مع الزمن - اسمهان ...كده يعنى

و طبعا لانى شخصيه ساحقه ماحقه البنت الغلبانه وافقت و حجزنا فى وش المسرح بالظبط

و قبل الحفله الناس عماله تيجى ثمانين سنه و طالع ..عشر سنين ما يضرش و كمان اجانب

-شايفه يا جاهله حتى الاجانب بتيجى تسمع الفن الشرقى الاصيل

-طب و العيال؟؟

-اهلهم بيعلموهم ازاى يحبوا تراثهم

-تراثهم!!ماشى يا ختى

وبدأت الحفله و دخل علينا الهام لابس اسود فى اسود و رابط شعره لورا و طول بعرض بارتفاع يفكرك كدا بزعماء المافيا بتوع السينما(طلعت الهام رجل مش ست!!!!)

و اشتغلت الموسيقى و مش غريبه عليا الموسيقى ديه...ايه يا مهره؟ايه يا مهره؟

make me swayyyyyyy

يا نهار اسود و منيل ديه طلعت حفله انجليزى و كمان ستينات...يا سلا سوخه يا ولاد...ماكنش يومك يا مهره ده انا لما باسمع فرانك سيناترا باقفل التلفزيون مابقلبش القناه حتى


لولو بتزغرلى (و فريد و شرقى و التراث اكيد هاتسبنى اروح موتورجل النهارده) قعدنا نسمع و لا حول و لا قوه الا بالله و الهام والناس اخر صهلله و الله لولا انه مكان محترم كانوا اتحزموا و رقصوا و الناس حافظه الاغانى و ماحدش قاعد متنح غيرنا خاصه انه بدأ يغنى بلغه تانيه ايطالى اسبانى الله وحده اعلم و فى نهايه احدى القصائد لولو لفتلى

-اخر مره هاسمحلك تصقفى

-ليه؟

-انتى كده بتخدعيه

-مين؟

-الهام

-الهام مين؟؟؟؟؟؟؟؟آآآآآه


الجدير بالذكر هنا ان الهام يمتلك احد اقوى الاصوات التينور اللى يحسده عليها بافروتى نفسه الله يرحمه و كل اغنيه يرزعلنا حته يا BABYYYYYYYYYYYY تنقح اللى قبلها و الله خسارته فى ساكن فى حى السيده كان هايبدع بس اشك انه او اى واحد من اللى قاعدين( باستثنائى انا و لولو) يعرف ان عندنا حى اسمه السيده


الحفله استمرت لمده ساعه (لو زادت كان السقف وقع علينا مع واحده من يا BABYYYYYYYY )ولجل حظى السعيد طلعت اول حفله لالهام و انا باتمناله من قلبى والله كل توفيق بس بعيد عنى عاااااااااااااااااااااااااااا


اسيبكم دلوقتى مع هذه المقطوعه و كل حفله وانتم طيبين

واجب

الدنيا لسه حر و كنت ناويه اتنح و ماكتبش حاجه بس جالى واجب من الصديقه زمرده و طبعا اثبت انى تلميذه خايبه و اتأخرت فى عمل الواجب بس معلش اصلى بطلت حكايه الواجبات ديه من ابتدائى و ده كا ن من كااااااااااااااااااااااااام سنه؟؟يجيييييي اممممم..................ما علينا ما علينا

1. أذكر اسم من طلب منك حل هذا الواجب.

زمرده صاحبه مدونه كوكب زمرده

2. أذكر القوانين المتعلقة بهذا الواجب

مش عارفه و مافهمتش من زمرده...معلش الطب قضى على الربع اللى كنت ماشيه به

3. تحدث عن ستة أسرار قد لا يكتشفها من يقابلك للمرة الأولى.

سته مره واحده...الحقيقه انا انسانه واضحه جدا و صعب اتفهم غلط بس هاحاول الاقى 6 اسرار

1-صعب ان يعرف احد انى اهوى القراءه ببساطه اخاطب الناس بقدر عقولهم واكره التباهى بالعلم او المعرفه و موتى وسمى المصطلحات الكبيره المجعلصه و ارى ان ابدع الكتاب واقواهم هم اسهلهم لغه

2-اعطى ايحاء برقه شديده (طبعا انا بسكوته اكيد اكيد ) لكنى استطيع تحمل الكثير من المكاره و العمل الشاق بدون كلل و لكن مع الكثير من الملل

3-بعض الاخطاء لا يمكنى التسامح معها و تغير رأيى فى الانسان الى الابد

My good opinion once lost is lost forever

Mr. Darcy in Pride & Prejudice

Jane Austen

4-اذا غضبت اكلت

5-اسعى الى الكمال ..مثاليه بصوره مرضيه.... بصوره مزعجه لى شخصيا و لسوف اكتب قريبا عن هذا لانه يضايقنى حقا

6- عندى مدونه ولا يعلم احد من معارفى بهذا دعك من ان يتوقعه او انه يعرف يعنى ايه مدونه من اساسه

4. حول هذا الواجب إلى ستة مدونين، وأذكر أسماءهم مع روابط مدوناتهم في موضوعك.

ايما ام البنين

سبهلله عالاخر

sou Heart Whispers

تايه فى وسط البلد

زيانور (يا رب تكون فتحت المدونه تانى)

الربان (و ان كنت اظن انه حله قبل كده بس ديه هديه بقه)

5. اترك تعليق في مدونة من حولت الواجب عليهم، ليعلموا عن هذا الواجب.

حالاااااااااااااااااا

الدبلوماسى

الدنيا حر موت و انا مش قادره اتنفس ولا اكتب و لا اعمل اى حاجه عشان كده دوٌرت فى دفاترى القديمه و قلت بالمره تغييراً للحاله النفسيه السيئه قررت احكيلكوا تجاربى مع العرسان

الحكايه ديه اول حاجه كتبتها فى عالم التدوين و نشرتها فى "بيت العرايس و العرسان"

الدبلوماسى

من حوالي سنتين و انا في معمعه الاستعداد للامتحانات,امتحانات الماجستير طبعا لحسن حد يتجن في عقله و يفتكرني لسه صغيره,ماما جت و قالتلي

-جايللك عريس

-تاني

-تاني ايه,انت متلخبطه في العدد والا ايه

-ههه

-المره دي دبلوماسي و مش هتقدري ترفضي

-و ده يتقدملي ليه اقصد يعرفني منين

-طنط فلانه تعرف مامته, بس؟ بس؟ بس؟

-بس ايه؟

-عايزين يشوفوا صورتك الاول

-ايه,دي اهانه ,انا لا اقبل,استحاله

-براحتك

-استني بس,الدنيا مش قفش كده امري لله لو ما كنتيش تلحي

بدايه سيئه لاني فعلا مش فوتوجنيك,يلا برضه لو رفض تبقي في بيتها يعني ماحدش يعرف غير انا وماما وبابا و طنط و ما.. و و و و,يعني حوالي 20 نفر بس ..الغريبه ان بعد اسبوع ماماجت منشكحه قوي و بتقولي انه عايز يقابلني,يظهر ان نظره ضعيف

-ها... يجيلليك الشغل؟

-اوعي يهوب هناك,احنا ناقصين وقف حال,احنا نتقابل في ارض-محايده ولا يستني احسن لما اخلص امتحانات عشان اروق له

-ما انتي بترفضي كل العرسان, يعني نقول للراجل استني شهر و نصف و بعدين تقولي لا

-معاك حق,الي الارض المحايده

يا ريت نفتكر الحوار الاخير ده لانه مهم جداو قد كان ,ويا مهرة نعرفك على ماهر ههههههه
و هاتك يا ضحك من كل الستات اللي قاعده ,بس يا حلاوه يا ولاد تقولش امين شرطه اسم الله و لا دبلوماسي,علي رأي السندريلا الله يرحمها,صحيح هو ابعد ما يكون عن حسين فهمي بس هو مقبول جدا و لابس بدله,نخش في الجد بقه,برضه شكله ذكي و عاقل و مبتسم,بس حاجه داخليه كده قالتلي انه مش ناوي و قبل ما نعبر حدود الارض المحايده كنت قلتلهم كده و انا بضحك "لا طبعا,الولد شكله مبسوط و مبتسم,انتي لسه صغيره,علي كل حال انتي بتضحكي علي ايه,اشششششششششش "هشيت بما اني صغيره و دي مجامله ما مبتحصلش كتير دلوقت,سبحان الله ما عداش سواد الليل و كانوا متصلين يقولوا انهم موافقين و مبسوطين,يظهر اني فعلا ما بفهمش....و عايزيين يتقابلوا تاني,صوتت بالبلدي زي بنت سلطح بابا

-و الامتحانات

-امتحانات ايه؟

-ناقص اسبوع يا ماما

-يوووووه,دا الاسبوع فيه 7 ايام ,في 24 ساعه في 60....

هاقابله,ماما ممكن تستمر لغايه الفمتو ثانيه,لو اظهرت اي مقاومه,و بالفعل في عز نقحه الشمس نزلنا و انا لابسه البلوفر الهاي كول و الكعب 7 سم لزوم حفله الكوكتيل اللي احنا رايحينها و اذ فجأه شخص ما اقترح ان انا و هو نتمشي في الغالب امه,يا دي المصيبه و ال7 سم ,قمت ولا حول و لا قوه الا بالله ,بس التضحيه الكبيره دي جت بفايده و اتفكت عقده لسانه وهاتك يا كلام اشي سياسه خارجيه علي حزب العمل الاسرائيلي علي ابن جني, اي و الله, جني امايعفرت كيانك يا بعيد, بس سيبكوا من الهزار انا اتكيفت من الكلمتين دول ما نا قلتلكوا اني مهيسه قديمه و احب الحاجات دي زي عينيه,بس الحر يا اعزائي ,بقيت عامله زي الفراخ المسلوقه و بعد ما كان قلبي بس بينزف بقت رجلي كمان ,لحد هنا و استوب لازم اقعد,تقريبا ما عجبوش اللي حصل و سكت ,يظهر برمجه الكلام عنده علي الواقف بس,المهم رجعت البيت و انا لسه مقتنعه برأيي ,بس كلهم وقفوا ضدي و قالولي انه كان مبتسم
عدي اسبوع كمان و بدأت امتحانات و هما و لا حس و لا خبر حتي ماما بدأ يتزعزع ايمانها العتيد و ما خبيش عليكوا انا كمان قلقت,صحيح هم ما قالوش غير انهم موافقين بس الساعه البيلوجيه بتاعتي ما كنتش مطمنه,كمان ما يصحش ما يسألوش عليا و انا بامتحن,المهم اتصلوا و عايزيين يتقابلوا...شوف الظلم يا جدع طلعوا ماكانوش عايزين يعطلوني,
ماما ماعجبهاش الكلام ده كله الا الكرامه و مسكت طنط فلانه
-ولو هو مش عايز,خلاص كل منمنا يروح لحاله
و طنط يا عيني صعبت عليا قدام الهجوم الكاسح و اعترفت والله العظيم هو مبسوط و موافق,نزل عليا الكلام ده بردا و سلاما و اقعدت احلم بقه بلا مذاكره بلاهم,الست مالهاش الا بيتها برضه و اتقابلنا لثالث مره,المره دي عملت احتيطاتي و لبست جينز و زحافي لزوم المارثون و بالفعل 3 ساعات من المشي المتواصل لما رجلي بقيت زي رجلين اطفال الشوارع,اه نسيت اقولكوا حاجه مهمه,امه اقصد والدته اخدت ماما و قعدتها علي دكه في الشارع اللي في النادي , و بعد ما رجعينا من اللف عزمتها علي مياه معدنيه و الله العظيم و ده اللي اكد عند ماما شكها بانهم بخلاء بس دي كلها سفاسف زي مانتو عارفين و لا يمكن توقف موضوع عرفوا ينتزعوا مني موافقه عليه,احكيلكوا بقه علي المارثون طبق الاصل العل.. المره الفاتت بس الحقيقه المره دي كان مبسوط فعلا و قعد يتكلم عن نفسه و عن السياسه الخارجيه برضه و تعرفي فوكوياما؟ ههه وقعيت في حيص بيص,و ده ايه دا كمان؟ اكله صيني و لا ماركه موبايل؟المهم هاقولوكوا واكتبوها يمكن تنفعكوا,ده الراجل بتاع صراع الحضارات و حضاره الصراعات,ما علينا الموضوع كان فيه اسامي كتيره بس بلاش نجيب في سيره الناس ,اهم حاجه اني المره دي لبست السلطانيه فعلاحسيت انه خلاص ماهر لمهرة و حصوة في عين اللي ما يصلي علي النبي ,ده حتي ماكنش عايز يمشي.... و ثبتت الرؤيه و ما حكيلكوش عن الايام و الاحلام

تسألوني يا جلال,جلال مين,ايه يا مهرة اللي حصل؟ما حصلش حاجه خالص,خالصصص؟مالللللللللللللللللللللللص ...غطس ماقبش,هنا لازم حد يفرملني والا هاستمر في الكتابه للابد اييييييييه دنيا,و بعد شهر و نصف بالضبط من بدايه الموضوع المنيل ده,اتصلت طنط فلانه و قالت ان مافيش نصيب,يا سلااااااااااااااام و جاي علي نفسك ليه؟اقول ايه بس؟ فاكرين الحوار,حسبي الله و نعم الوكيل,بصقه موجهه لوشي بدون اي ذنب و ربنا يشمتتني فيك يا اخي شماتي في العريس رقم 13 ,اما تفسيري للحصل ان الاخ متأثر بالسياسه الامريكيه "الغابه غابتنا نبرطع براحتنا" عامه انا من يومها طلقت السياسه و ما رحتش انتخب كمان في انتخابات مجلس الشوري,هه!!!,و مركزه دلوقت في العرسان من وزاره التأمين و المعاشات بعد فشلي مع وزارات الصحه والداخليه والخارجيه و برضه الدهن في العتاقي

حيره

كنت قد حكيت لكم قبلا عن الممرضات و اشتكيت منهم لكن ليسوا جميعا كذلك....منهم واحده لم يحدث بينى وبينها اى مشاكل تذكر
هذه الفتاه التى تصغرنى سنا و المحدد موعد زواجها بعد اسبوعين مصابه بورم سرطانى شرس
اصابنى الخبر بحاله من الذهول والحيره و النكد
اقاوم ذلك اليقين الداخلى بوفاتها الوشيكه
اراها امامى هذه الايام فلا اعرف كيف احدثها..هل اواسيها و لكنها لا تعرف يقينا..ايضا قد تؤلمها مثل هذه المعامله
هل اداعبها و كأن شيئا لم يكن؟؟اليس فى هذا لا مبالاه و قسوه؟؟
هل احدثها فى تفاصيل مرضها؟؟الا يؤلم هذا؟؟
اسألها عن زفافها؟؟قد تبكى ان فعلت هذا
لا اعرف ماذا افعل؟؟ و قوه تجذبنى اليها..لا اتخيل ان اتجنبها فقط لاستريح

هل شاهد احدكم فيلم "the beach" كانت مجموعه تركت العالم الى جزيره حيث لا يوجد الاالسعاده الخالصه و عندما واجهوا مرض احدهم تركوه لمصيره كيلا يعكر عليهم شيئ صفوهم...اذهلتنى فكره القسوه المرعبه وقتها و لكن اليوم جزء صغير منى يتمنى ان تحدث معجزه فلا اواجه هذه الفتاه

اتذكرنى و ان ا ستمع لحواراتها التى لا تنتهى عن الجهاز و الحلل و اللحاف...كم كنت اضيق بهذه الثرثره...كنت انتهز اى فرصه للتخلص من الحوار دون ان تشعر..كانت ثرثاره حقا
اتذكرها عندما رأيتها امس صامته تماما ...دخلت و جلست بهدوء تقرأ القرآن
اتذكرنى و انا اعنفها لانها ترفض الذهاب لطبيب لخوفها من جراحه بسيطه...ماذا ستفعل اليوم و لا امل لها الا الجراحه
ماذا افعل انا؟؟ ازورها مثل الاغراب......اشعر ان على ما هو اكثر من ذلك
تنهال على ذكرياتى معها و كلام فارغ كثير لم احسب ان اتذكره يوما
ساعدونى ماذا افعل؟
كيف اتعامل معها و احدثها و انا لا عرف كيف انظر فى عينيها

تاج الاحلام

العزيزه زيانور اهدتنى تاج و ام البنين كمان

الحقيقه لا اعرف معنى تاج ..هل هوتاج (اللى بنلبسه فوق راسنا ده) ولا tag اللى بالانجليزى؟؟؟؟

التاج عن الاحلام و هتبقى فضايح

1- اذكر 5 احلام على الاقل تخص ماضيك وتحلم فيها بتغير الاشياء .. ماذا ستعدل وماذا ستترك؟؟

سوف أحكى هنا عن أحلام الطفوله الاولى

طبعا كان اول احلامى ان يكون شعرى اصفر و عيونى زرقاء..و بعد السنين بعد ان اصبح من السهل ان احصل على الشعرو العيون الملونه لم اعد اريد هذا دعك من ان اعتبره نموذج للجمال...بل ان نظرتى للجمال نفسها اختلفت فلم يعد الجمال هو جمال الوجه فقط بل لم يعد الجمال المحسوس هوالاساس..فكم رأيت من عيون جميله كاذبه و وجوه مورده هى عنوان لقبح لا تتخيله.....لكنى ايضا رأيت وجوها تضيئ بنور داخلى لا يعرف احد مصدره

و اكيد اكيد كنت اتمنى ان اصبح مدرسه لكن سرعان ما تركت هذه الامنيه غير نادمه و مازلت عند رأيئ فما اصعبها من مهنه فى هذه البلد و كم من اصحابها يدركون اهميتهم بحق

الحلم الثالث للاسف هو الحلم المستحيل و هو سر لم احكيه كثيرا من قبل...و انا فى ابتدائى كان عندنا عروض مدرسيه راقصه دائما و ابدا على انغام اغانى صفاء ابو السعود و كانت مدرسه الالعاب تختار حوالى 5\4 الفصل لهذا الغرض ...لماذا لم يتم اختيارى (رغم انى كنت طفله مقطقطه و الله) السبب طولى ...اى و الله ...كان العرض و لسبب مقدس لا اعلمه ينبغى ان ينقسم الى مجموعتين من بنات طوال و بنات قصار و لا عزاء للمتوسطين.....ثم تبدأ مرحله العذاب عندما تتحول الحصص كلها لبروفات العرض و لا يكون لى انا و الشرذمه المنبوذه الا الفرجه.....مره صعٌبنا على مدرسه موسيقى و علمتنا نشيد عشان نقوله فى الحفله لكن الحمد لله الذى لا يحمد على مكروه سواه جالها تيفود قبلها و رجعنا للفرجه من تانى

الحقيقه لا يمكننى ان استبعد هذا الحلم...فرغم عدم قدرتى على تحقيقه الا انى اتمنى ان ارى ابنه لى تحققه...يمكن اعرف وقتها ماذا كان سيكون مصيرى لو تعلمت بعضا من هز الوسط

نظرا لانى لا اتذكر احلام طفوليه اخرى فانى ساقفز لمرحله ثانوى..كنت اتمنى ان اصبح طبيبه و قد حققت هذا الحلم للاسف و بالتأكيد ارغب فى تغييره

الحلم الخامس هو حلم دائم بالصحه و الستر والنجاح و السعاده...و استطيع القول انى لن اتخلى عن هذا الحلم ابدا و هو يتحقق بنسب متفاوته على مدار الايام

2- اذكر5 احلام على الاقل تخص مستقبلك..

اولا و حتى الف اتمنى ان اصبح اما ...اعشق الاطفال و لااستطيع منع نفسى عنهم...احلم بذلك الطفل الذى اذا بكى بحث عنى و اذا بكيت فلا دواء الا عنده...انا امنه و هو امنى

يجرنى هذا بالضروره للحلم الثانى (و لا اقول كابوس؟؟) فللاسف لا نتكاثر جميعا كالاميبا....انا امزح بالطبع لكن الزواج يبدو مشكله فالناس اما تستخف به تماما و( اهى اى ست و السلام) او تصعبه فلا توجد من تستحق و العكس صحيح طبعا ...لا احلم الا بمن اقدره و يقدرنى فنتقى الله فى بعض..ولسوف احكى لكم عن بعض حوادثى مع العرسان فيما بعد

حلم ثالث...اتمنى ان اغير عملى..مكان عملى اصح ..فمازلت اريد ان اكون طبيبه و لكن فى اى مكان ثانى

رابعا...اريد ان اسافر و ان ارى الدنيا...فسحه يعنى و ليست هجره

خامسا...ربما لم يكن ينبغى له ان يكون الحلم الاخير و لكنى لا استطيع الا الصدق...اريد ان احج و ان يغفر الله لى ذنوبى...قولوا يا رب

3- اذكر شخصين على الاقل متواجدين في حياتك حاليا كنت تود وجودهم قبل الأن بزمن..

لن اقول الا امى رغم انها معى من قبل ان اولد...اما عن الاخريين فالحق انى اقدر وجود الاشخاص معى فى مختلف الاوقات ..فصديقه ثانوى التى لم نكن نفترق قد لاتكون هى من تصلح لان تكون نفس الصديقه الآن ولكنى شاكره لكل من كان بجانبى فى اى وقت من عمرى و لو كان لساعه من نهار

4- اذكر شخصين على الاقل غير متواجدين في حياتك حالياً كنت تود وجودهم الآن أو في حياة اولادك مستقبلاً..

جدتى ..يروون عنها ما يشبه الاساطير..توفت و انا فى الثانيه....مما اسمعه احسب اننا كنا سنتفق كثيرا كما ان عندى رغبه خفيه شريره فى ان اعرف هل ما يقولونه حقيقه ام هو خيال المحبين؟؟؟

فى مستقبل اولادك ؟؟....امممممممممممم....اكيد ابوهم

فعلا تعبت....بس لازم ادبس حد....امرر التاج لموناليزا امه الله و شيماء الصراحه خنقه؟

انا و البعكوكه و أشياء أخرى

و البعكوكه يا اعزائى هى عربيتى الصغيره (السياره لمحبى اللغه العربيه )و هى عربيه محندقه نص عمر ..لكن ايه... حمارتك العرجاء تغنيك عن سؤال اللئيم و اللؤمه كتير زى ما انتم عارفين..و خد عندك

ازاى مش لاقيه مكان للركن طب ما تعلقيها فى الميداليه

حاسبى و انتى ماشيه لعربيه سريعه تعدى من جنبك تشقلبك

مش كنتى تجيبى هامررررر

وهكذا و هكذا ورغم كل شيئ لا اخفى عليكم حبى لها... يعنى اللى يرشها بالمايه ارشه بالدم و الا بلاش المايه دى عشان بقالى شهر باتحايل على البواب انه يرشها باى حاجه ان شاالله حتى يتف عليها ..لكن لا حياه لمن تنادى

صحيح هى ناقصها القليل جدا جدا من الكماليات ..يعنى تكييف و سمكره و دوكو و بطاريه و موتور جديد ..بس ماشيه زى الفل و الله رغم عدم موافقه البعض على كلامي

الحقيقه انا جبت العربيه دى على كبر ..يعنى تحويشه العمر كله ..و شمس قلبى و ضله

و بمناسبه الفلوس ..احب اسجل هنا دعواتى الحاره على كل اللى طلب العلاوه.. على اللى اداها.. على اللى اخدها ...على اللى رفع سعر البنزين عااااااااااااااا

يلا احكيلكم عن بعض مواقعى مع البعكوكه... من حوالى سنتين كنت لسه جايبه العربيه طازه و كنت وقتها اعمل فى الرعايه المركزه و اخذ نبطشيات24 ساعه و تحتى حوالى 12 ممرضه و معى 2 اطباء من هواه النوم اللذيذ

كان يوم شنيع (كله ضرب ضرب مفيش شتيمه) لم اجلس حتى الساعه الثالثه بعد منتصف الليل (كان زملائى قد ناموا بعد العشاء تقريبا )و كانت الدنيا قد هدأت و لم يبقى الاتحليل لاحد المرضى موعده بعد ساعه

انا قلت افرد ظهرى ساعه و لا حاجه و اكدت على الممرضات انهم يسحبوا التحليل رغم يقنى انهم لن يفعلوا شيئ الا و انا فوق رؤوسهم و بالفعل قمت بعد ساعه و نصف لكن ياللعجب الدنيا هس هس و ظلام دامس الا من انوار الاجهزه احمر و اصفر و الانذارات شغاله تيت تيت تيت ...و لا ممرضه موجوده و لا بيت الاشباح يا اخى

يا فلانه ...يا علانه ...يا زييييييييد .......يا عبيييييييييييد....يا ماما

هو ايه اللى حصل ...كل الغرف فاضيه الا من المرضى...هو انا نمت قد ايه؟

المهم علشان ما اطولش عليكم....وجدتهم اخيرا متكومين على سرير و فى سابع نومه...اصحيهملك يقوموا يقولوا و الله صاحيين يا دكتوره...اكيد انا اللى نايمه.. معلش ....بالمناسبه نبطشيه الممرضات 8 ساعات فقط

كظمت غيظى و انتظرت حتى الصباح حيث انه لا سلطه مباشره لى عليهم فى موضوع الجزائات...المهم فقعتهم الشكوى المتينه و نزلتها للمدير

طبعا تصرفهم هو منتهى الاستهتار و عدم الاحساس بالمسئوليه لكن موضوع الضمير ده متوفى من زمان..اخدوا خصم بسيط لكن ازاى ؟كيف اجرؤ على فعل كهذا؟؟؟و ثانى نبطشيه على طول لقيتهم فرغوا عجل البعكوكه

انا الاول كنت خايفه اكون ظلماهم(عبيطه والله) لكنهم كانوا يتفاخروا باعمال البلطجه هذه امام الآخريين و حتى يومنا هذا..طبيب جديد لم يعاصر هذه الحادثه لكنه سمع عنها وصفها بتحالف قوى الشعب (اللى هو الممرضات )ضد الشيطان الاعظم (اللى هو انا)

و رغم معرفه الجميع تمريض و اطباء و مديرين بما حدث و معرفه الجناه نفر نفر فانه لم يتخذ اى اجراء ..و اللى له ضهر ما يتضربش على بطنه

علاقتى بالممرضات معقده فهم يحبوننى (مش كلهم طبعا) لمعاملتى لهم و لكنهم فى نفس الوقت يأنفون من طاعه فتاه تقاربهم فى العمر و تنشأ مشاعر تشبه الغيره الى حد كبير....اتجنب الاوامر المباشره(و هو حقى ) و الصوت العالى الاحين الضروره...فى الحقيقه لا ينبغى ان تكون هذه مشكله فهذا مكان عمل على كل حال و لا ينبغى ان يتأثر العمل بمشاعرهم تجاهى ..لكن سوء الاداره و ضعف العائد المادى يزيدان المشكله حتى صارت غير قابله للحل...لا اتفرد بمثل هذه المشاكل مع الممرضات يشاركنى كل الاطباء كبارا و صغارا..ذكورا و اناثا..اكثر ما يتعبنى من الممرضات هو استهانتهم بارواح الناس ..ايحدث هذا عن جهل ام عن لا مبالاه؟؟

عامه لن يردعنى هذا من تكرار نفس الفعل..المره السابقه كان العجل tubless وبفضلهم صار عاديا فلو كرروها لن اخسر شيئا .... اش ياخذ الريح من البلاط؟؟؟

شجار

لم اكن انوى الكتابه الا ان موقف حدث امامى اثار فى افكار و مشاعر متباينه..موقف بسيط يحدث كل يوم.. ابن جارتنا (8 سنوات تقريبا) تشاجر مع ابن البواب (7 سنوات تقريبا)و سبه و ضربه

زوجه البواب اشتكت لجارتنا من ابنها و الولد نفى عن نفسه التهمه و قال بكل صلف "عيب تكذبينى قدام مامتى" ..المشكله انى متأكده انه كاذب..انها خصله رذيله فيه..هل تعرف امه بهذا ..لا اعرف..جارتنا سيده فاضله و متواضعه و لم ترض عن تصرف ابنها لكن لم يأخذ الصبى الصغير حقه,منظره و هو يبكى بحرقه و يقول لقد قال لى "يا ابن ال...." اوجع قلبى و نكدنى

رباه كيف لابن جارتنا ان يقول مثل هذه السبه,المفروض انه (ولد متربى),ترى ايجرؤ ان يقولها لاحد اصدقائه؟؟لا اظن.
البواب عندنا هو البيه البواب حقا..حتى انه كان ينادينى بتدليل اسمى لفتره غير بعيده ,اولاده متعلمين مظهرهم محترم(لم يصدق زمايلى فى المستشفى عندما شافوا الابن الاكبر,كان قد جاء يكشف و هرونى غتاته) و رغم ذلك لم يغنى عنهم شيئا

تؤلمنى الفروق بين البشر..يؤلمنى رؤيتها و يؤلمنى اعترافى بوجودها..و ادعو الله الاأؤذى اى انسان..اترانى لم اجرح احدا من قبل؟يا ليت
يولد البشر و ليس فى نفوسهم ذره من كبر و تمر السنين ولا تعرف ماذا حدث؟؟؟

مع ان كل الخلق من اصل طين
و كلهم بينزلوا مغمضين
بعد الدقايق و الشهور و السنين
تلاقى ناس اشرار و ناس طيبين

عجبى!!!

عجبى كما قال صلاح جاهين,ذكٌرنى هذا بمنظر رأيته في شارع عباس العقاد, طفلتين فى الثالثه..آيتين فى الجمال مصرتان على اللعب معا و مشاركه بعضهم الآيس كريم رغم ان كل ام كانت تجذب بنتها بعيدا عن الاخرى..لماذا؟ببساطه كانت واحده شحاذه و الاخرى سيده راقيه..هل لو كانت الطفلتين تفهمان هذا,اكانوا استمروا فى اللعب؟؟؟؟

اعود و افكر ..ان ما حدث هو نتيجه تدليل زائد لجارتنا لابنها و الحق يتفرد هو بهذا التدليل عن باقى اولادها فهى انجبته بسن كبيره و تخشى الاتظل معه حتى يكبر.. خاصه بعد شفائها من ورم خبيث مؤخراً....على رأى أمى كل الناس غلابه!

الحرافيش

وقعت فى هوى روايه الحرافيش من اول سطر بل اقول وقعت فى هوى الحرافيش نفسهم و الحرافيش فى نظر
المؤرخين هم "اوباش العامه الذين يحترفون الوظائف الدنيا"..ولكن هذا لم يمنع ابن بطوطه بان يصفهم بانهم اهل صلابه..استطاعوا ان يهددوا نفوذ السلاطين فى بعض الاحيان
ارجع لروايه الحرافيش و هى بوابه لعالم ساحر يبدو فى الظاهر مخالفا تماما لواقعنا و لكنك اذا تمعنت لوجدت الناس هم نفسهم حرافيش نجيب محفوظ الذين يحلمون بالعدل و يقدسون القوه( و ان لم تكن فيهم)..يثورون حينا و يستكينون دهرا..بالله عليكم اليس هذا حالنا جميعا
لكن الروايه تنتهى بالامل و تعد هؤلاء الذين يخوضون الحياه ببراءه الاطفال و طموح الملائكه
بالجائزه الكبرى..خروج الشيخ من التكيه بنفسه ليهديهم القوت و القوه ..التوت و النبوت



والشيئ بالشيئ يذكر ..التكيه هى بناء ظهر فى عهد العثمانين يجمع بين وظيفه الخانقاه التى توؤى الصوفيه وبين ايواء الفقراء و المساكين... لذلك نراها عند نجيب محفوظ مكان مقدس لا يمكن الدخول له بل هو جائزه الصابرين بينما فى المثل الشعبى نشير الى اى مكان بلا ضابط و لا رابط و المال بدون صاحب فنقول تكيه

للامانه العلميه و الادبيه و كل الامانات حتى امانه الحزب الوطنى .. وصف المدونه بالنص من
روايه الحرافيش لنجيب محفوظ

سلام عليكم

اهلا و سهلا
انا مهره....طبيبه بشريه...جديده طحن فى عالم التدوين
لازلت لا اعرف كيف اتعامل مع المدونه لكننا بنتعلم
انا كنت نشرت عند برايد (بيت العرايس و العرسان)و في الغالب سانشرها هنا
ممكن تقروها لغايه ما اتعامل
سلام