الاثنين، 1 ديسمبر، 2008

مره واحد صعيدى


بما اننا هزرنا كتير خلاص نهرج بقه ...انا النهارده هاحكيلكوا نكته بس بايخه و زى اى نكته بايخه بتبتدى بمره و احد صعيدى.....

مره واحد صعيدى كان بيشتغل معايا دكتور فى المستشفى و طبعا بالحاسه الساسه بتاعت اى بنت اول ما ادخل مكان اعرف بالسليقه كده العرسان المنتظرين.....اخينا بقه كان مناسب سنا و شكلا و كان يبدو عليه الذكاء و كمان كان باين منه ميل لكن كان شخصيه ضعيفه و اهله صعايده فى البلد و لازم يتجوز بنت عمه و قصص افلام عربى كده

و بما انى شخصيه نفعيه امبرياليه .....فانا ماحبش اى علاقات مع الزمايل مادام الموضوع مش هايرسى على مأذون و هكذا اخدت جنب و بعدت خالص............جميل

و بعد تلات سنين(ايون تلاته مافيش غلط) لقيت بلدينا عمال يتسهوك

مش بنت عمى اتجوزت

الف مبروك(و انا مال اهلى؟؟)

شوفى صور الفرح

ههه(طب جنب و اخدنا..نعمل ايه.. مش ناقص غير الشبشب )

شبشب؟؟شبشب ايه؟؟

هه ...لا ماتخدش فى بالك ...عن اذنك

تقولولى قصده شريف و جمال و علاء اقولوكوا كان زمااااان و ادينا عشره سنين و الانطباعات الاولى تدوم و انا عارفه انه ما يقدرش يقف لاهله فى البلد

و اذ فجأتن الاقيه باعتلى مسج بحبك و كلام كده و عايز اتجوزك

فكرت............. صحيح فقران و مقحط ولكعى مش عارف يخلص الماجستير واهله هايكرهونى لكن فى النهايه شغال و اللى نعرفه احسن من اللى مانعرفوش و هكذا....

طلب منى اننا نأجل اى حاجه رسمى لغايه اخوه ما يخلص ثانويه عامه عشان مانشوشرش عليه ده على اعتباران انا هاعره مثلا.......بلعت الاهانه و قلت كله يهون فى سبيل الهدف الاسمى اللى هو ان تحملى لقب مدام

الانتظار ده كان فيه شهر و لا شهر و نص و أوضحتله ان انا مش هاقدر اتجاوز فى اى حاجه لغايه ما يتم حاجه رسمى

طبعا طبعا انا عندى اخوات بنات

ومن ساعتها طوفان من بحبك وحشتينى ..بحبك و انتى مطلعه عينى.......وووو

الحقيقه انا كان رد فعلى هو حاله من القرف و الملل...ايه شغل المراهقين ده؟؟طب لو المتكلم عاقل يبقى المستمع مجنون مانا قدامك من 3 سنين..المفروض اصدق الكلام ده؟؟؟راااااااااااحت خلاص...........المهم مارضتش اتف فى وشه البقين دول و سكت

مره بعتلى رساله بالانجليزى ماعرفتلهاش راس من رجل و لا فهمتلها معنى

ايه رأيك فى الرساله؟

ميرسى

يعنى قولتى ايه؟

لا اله الا الله يا عم حل عنى بقه...بعد كده اكتشفت انها جزء من اغنيه لسيلين ديون(و عاملى صعيدى)

بعد شويه اتنقلنا لمرحله جديده

كان فى واحد واقف فى الاوده و انتى بتكلمى فلانه

مش فاهمه؟؟؟

يعنى انا باغير

طب ده مكان شغل و انا بكلم حد تانى اساسا

اوففففففففف انا كانت روحى فى مناخيرى و على رأى صاحبتى حتى الصعيدى طلع منفسن

الكلام ده حصل من سنتين و انا كنت فى لحظه يأس مدلهمه (اى و الله)و اصريت اكمل مهما حصل و عصرت على نفسى 3 كيلو ليمون

فقير.......... ....و ايه يعنى خدوهم فقراء يغنيكم الله

اهله مش طايقنى........و ايه يعنى مانا هاعيش بعيد و ادفع بالتى هى احسن و كده

لكعى و مش عارف يخلص الماجستير.......ان شاء الله ربنا ينفخ فى صورته و يخلص قبلى ربنا يسهل

منفسن..................ربنا يهدى

بيقولوا بتاع ممرضات و كده.................................ربنا يسترررر

و هكذا استمريت رغم يقينى الداخلى انه لا يمكن يقدر يكمل لكن انا قلت انا هاعرف الناس اكتر من نفسها؟؟؟

واخيرا خلصت امتحانات الثانويه العامه و لقيت بلدينا بيكلمنى فى التليفون و يقول

انا كلمت ابويا

و الله طب خير قال ايه؟؟

ماينفعش فى التليفون

كده (طب ما انت كلمته فى نفس ذات التليفون ..ايه اللى يمنع انه يحيكه عليه...بلاوى)طب بكره فى المستشفى ان شاء الله

طب و ليه مانتقابلش بره النهارده؟

اصلى مش متعوده على كده و بكره قريب ان شاء الله

مش فاهم ليه يعنى

...............

طب خلاص اصبر لبكره

الحقيقه انا الفار لعب فى عبى و قلت باينه فاكرنى واحده من اياهم ولا بيتسلى و لا حكايته ايه ده

و جه بكره و بعد بكره و بعد بعد بعد بكره و لا هو هنا ..و بعد ماكان بينطلى كل ساعه و التانيه اختفى تمامنننننننننننننننن

يا........................................

يعنى كان بيلعب و قالك دى من مصر و هتلف على حل شعرها معايا

انا كنت فى حاله من الغضب و الشعور بالاهانه و القرف و حاجات كتيره مع بعضها من بتاعت د/نبيل فاروق و الحاج ادهم صبرى

حصلى زى العيانين مابيقولوا كرشه نفس...مش عارفه اخد نفسى...الاهانه واقفه فى زورى لا عارفه ابلعها و لا اخرجها

يعنى يا رب لا بيا و لا عليا و الهم يتحدف عليا.....لا عايزاه و لا شجعته و قلت لصاحبتى بكل غضب

انا الغلطانه نزلت فهنت

ههه؟؟؟؟؟؟؟؟؟

نزلت فهنت.........ده كلام نجيب محفوظ.......سى السيد قال لزنوبه كده

نزللت ايه؟؟

نزلت فهنت

بتعددى بالنحوى ...و الله ما نت متجوزه فى عمرك

فضلت على الحاله ديه حاجه زى تلات اسابيع و اخيرا بدأ سبع البرمبه يظهر و لاحظت انه بيحاول يتواجد فى طريقى ...طبعا انا و لا كأن هوا قدامى.....نزلت فهنت صحيح

و مره لقطنى و جرى ورايا

و مش معنى ان موضوعنا ماتمش اننا ما نكونش زمايل

(المره دى ما كنش كرشه نفس كان دور اسفكسيا و طلوع روح)
انت بتقول ايه يا افندى؟؟؟؟؟؟؟؟؟؟؟؟

و لاول مره فى حياتى انطلق فى عزف منفرد كريشندو متعالى الايقاع فى وصله غير مسبوقه من الردح و طوله اللسان

الحقيقه انا كنت بارتجف غضبا و مش فاكره انا قلت ايه بس هو كان على كلمه واحده انا انسان محترم

و طبعا خلصت كل اللى عندى و لفيت و سيبته بقه مفتوح و سبحان الله كرشه النفس اختفت تماماننننننننن

فيما بعد اعترضت امى على رد فعلى لكن لست حزينه و لا نادمه

كان عندى كرشه نفس!!!!!!!!

هناك 41 تعليقًا:

blue-wave يقول...

طبعا دى نداله متناهيه او جبن وعدم احساس بالمسئوليه
او سوء تقدير للموقف
لكن مالوش لازمه ربط الموضوع بالصعايدة
لأن دا ممكن يحصل من اى حد
ولا ايه؟

موناليزا يقول...

هو احسن حاجة فى الموضوع انه اخيرا انتهى:)

بس فيه حاجة انا مش معاكى فيها
يعنى ايه تبقى عارفة ان اهله كارهينك وانتى عادى وتقولى ماانا هعيش بعيد!
لازم اهله يبقوا فرحانين بيكى وتبقى غالية اوى فى عينيهم عشان بعد الجواز يوم مايزعلك ولا حاجة هما اللى يجيبولك حقك

وبعدين بتاع ممرضات تاخديه ليه؟؟
معنى كده انه معندوش لادين ولا اخلاق يبقى قلته احسن

ولكعى ومش عارف يخلص طب بدل عارفة هتوافقى ليه لو كان عايز يخلص كان خلص من بدرى

مش عشان لقب مدام تتنازلى اوى كده لان فيه لقب تانى لو ما احسنتيش الاختيار هيكون فى انتظارك فليه بقى؟؟ عيبه ايه لقب "انسة"
بجد الحمدلله ان الموضوع ماتمش
ربنا بيحبك وعارف مصلحتك اكتر منك
وبعد كده تريثى ولا تتنازلى عن اى شرط وضعتيه فى صفاته الخاصة
عارفة انك كنتى جد معاه وجبتى من الاخر بس كلامك معناه انك كان ممكن توافقى وترتبطى بواحد ماظنهوش مناسب ليكى

ربنا يرزقك بالزوج الصالح اللى يتقى ربنا فيكى

تايه في وسط البلد يقول...

ههههههههههههههههههههههه

ههههههههههههههههههههههههههههههه

ههههههههههههههههههههههه

الله يجازي شيطانك !!

سوري مقدرتش امسك نفسي والله بس اصل المواقف والردود - ولا اريد والله ان اقول تعبيرات الوجه - تخيلتها حرف بحرف

هو فعلا الموقف كان مع واحد صعيدي لكن انا عارف انه مش المرتكز لتصرفاته

انا كمان ضد اي محاولة لعصر كيلوات الليمون واراها موتا مقنعا

طبعا هتقولي اللي ايده في الميه بس عاوز اقولك اني هاكون اسعد لوحدي عن اني اكون مع شخص يطلب مني ان اصبح اخر لكي يستريح هو..التغيير مطلوب صحيح لكنه متبادل وعلي الضفتين

انا رغيت كتير ؟!!

يمكن بس التدوين عجبني ..دايما بتفكريني باختي الكبيرة يا مهرة عانت مما تعانين منه لكني لم اكن املك ان احذرها مما احذر منه الان..بصراحة انا معاكي باتكلم بصراحة وباقول اللي انا عايز اقوله

كله كان كوم بقي وحكاية امبراطورية ع دي كانت فعلا ختام صاروخي

بعيد عن التدوين يا مهرة باتمني بكل صدق ان تتزوجي رجلا يعرف قدرك

تحياتي

Sou يقول...
أزال المؤلف هذا التعليق.
Sou يقول...

على رأيك والله نكتة كان في واحد صعيدي
بصي يا بنتي انا وصحباتي عندنا مقوله دايما بنرددها بتقول

يجي وقت ما يجي ...المهم لما يجي يجي على مزاجي...

إيما ( أم البنين) يقول...

أنا دايما رأيي إن الواحده تفضل من غير زواج أحسن ما تبلي نفسها بواحد زي ده ما عندوش دين ولا أخلاق
ربنا يرزقك بالزوج الصالح

Zianour يقول...

مهرتي الجميلة
ولا يهمك
تجربة وعدت ومتديش لها اكتر من كده اهمية
ولا تخليها توقفك ف المحطة دي الغضب
تجاوزي الموضوع
وهو مسكين والله لانه شحط طويل عريض وميعرفش يقرر لنفسه ولا ماسك اي خيط من حياته على فكرة ده عالمي
وانتي تستحقي الافضل وسياتي الافضل ف الوقت المناسب
بس ابتسمي للحياة
بوسات كتيرة

mohra يقول...

blue-wave
انا ما ربطش الموضوع بالصعايده..بس القافيه حبكت
على فكره انا صعيديه (بس صعيديه بجد)و افخر بده و دايما بازور اهلى هناك


موناليزا
و الله معاك حق فى كل كلمه قلتيها و الواحد بيتعلم من كل تجربه بيقابلها
ربنا يكرمنا جميعا يا رب



تايه في وسط البلد
اختك الكبيره؟؟؟ماشى يا عم و الله انا يشرفنى بس و الله مش كبيره قوى
انا مقتنعه تماما بانه ماينفعش عصر لمون خالص بس قلتلكم كانت لحظه يأس مدلهمه :) لكن فى الاخر لا يصح الا الصحيح


Sou
و الله كلامكم حكم
يجى وقت ما يجى ورانا ايه؟؟؟



إيما ( أم البنين)
ربنا يخليلى دعواتك الجميله دى و مايحرمنيش منك...كل سنه و انت وال3 القطاقيط بخير



Zianour
زيانور الجميله الموضوع ده قديييييييييييم و كمان انا استريحت خالص بعد ما خرجت كل شحنتى فيه
لو شفتنى تعرفى انى ماببطلش ضحك مهما حصل
كل سنه و انتى و النور و الزياد بالف خير ...بوسيهملى كتير

doaa يقول...

عزيزتي مهرة

ولا يهمك مواقف كتير غلسة الواحد بيمر بيها ونماذج غبية المفروض الواحد يتجاهلها تماماً
بس كويس إن حصل كده عشان تعرفيه على حقيقته ,, بس أنا معترضة على إن مفيش حاجة عاجباك فيه أصلاً ليه تمري بالتجربة من الأول ؟ أنا مش بلومك أنا بس عايزة أقولك اعملي اللى مقتنعة بيه ومتضغطيش على نفسك في حاجة وتقولي لما أشوف آخرها إيه .. ربنا يوفقك ويكرمك بالزوج الصالح اللى يستاهلك

msafa يقول...

فعلا فكرة ربط افعال الاشخاص السيئة بالأماكن او بالقبائل او بتصنيفهم على انهم صعايده وبحاروه دى فكرة مش مستحبه ...
لان ه وار يحصل من واحد ندل واخد تعليمه حتى من فوق القمر لان النداله مش ببتجزاء ... بصرحه كونك انك تصرخى كده فى وشه ه اقل واجب مع واحد زى ده
المدونه لطيفه جدا
تحياتى

مولان يقول...

يالهوي ايه ده هو في ناس كدا

بس جميله كلمه نزلت فهنت

ربنا يعوضك خييييييييييييييييييير

ويرزقكك بالزوج الصالح

تايه في وسط البلد يقول...

يعني اقل من ستة وعشرين مثلا؟

mohra يقول...

doaa
اهلا و سهلا و خطوه عزيزه
معاكى حق و الله بس ساعه القدر يعمى البصر
شرفتى



msafa
و الله انا مش رابطه و لا حاجه بالعكس انا صعيديه و افخر بكده و شايفه ان الاخ عار على الصعايده بس هى القافيه حبكت
شرفتنى



مولان
عايزه اقولك انها بقت من لازمتنا انا و صحابى ...هى نفسها بقت بتقولها لبنات تانين
نورتى بالاسم الجديد




تايه في وسط البلد
26؟احنا هنهرج و لا ايه؟؟؟ :)))))))))))
انا لسه هأتم 29 السنه الجايه (اللى هى بعد 3 اسابيع :))))))))))

محمد الكومي يقول...

عايز اضحك بس خايف تزعلي خصوصا دي اول نوبة ازورك

الموضوع باين من الاول

هو يعني عاجبه انك تكوني معاه

بعد ماتكوني معاه - تكوني معاه يعني تبقي جزء من حياته و رايح جاي خارج معاكي و كدة - يفكر بقى هل العلاقة دي ممكن نتممها بالجواز ولا طيبة على كدة و اهو بكرة نقول كانت ذكرى و عيشنا لنا يومين

و على فكرة نصيب الانسان بيصيبه فعلا يعني عادي ولا في بالك

بس اهم حاجة انك اتخلصتي من كرشة النفس

نيجار يقول...

ألف ألف سلامه عليكي من كرشه النفس
وجدعه في اللي عملتيه أنا مش صعيديه بس بجد كان لازم تعملي كده ،
وكل سنه وانتي طيبه
وعيد سعيد عليكي

شهرزاد يقول...

كل سنة وانتي طيبة يا مهرة
عيد سعيدأسعدتني زيارة مدونتك

نهر الحب يقول...

عيد سعيد
وكل عيد اضحى وانت بخير
وان شاء الله العام القادم على عرفات متجمعين

M.K يقول...

هههههههه
ما إنتي معذوره يا بنتي ..
ده العلاج الوحيد لكرشت النفس...
أهم حاجه إن الموضوع خلص ..
وروحك الحمدلله لسه موجوده..
.........
كــل عام وأنتي بيخر ..
وعيد سعيد..

زمرده يقول...

أعشق صراحتك
ولكن يابنتي اقتنعي مثلي النصيب بيجيك
بدون تقديم اي تنازلات
الله خلق لكل انثى رجل يفهمها ويحبها
وهذا لي انا مقتنعه به ,فريحي بالك
واياك تقبلي بشخص مايستحقك
يابنتي انتي رائعه وروحك حلوه وتستحقي
الافضل فلا تتنازلي ... مفهوووم؟

واخيرا شكرا لانك كالعاده ترسمي ابتسامه
على وجهي ,بوقت صرت افتقدها فيه
وكل عام وانتي بخير

rovy يقول...

عييييييد سعيييييييد

كل عام وانتى بالف خير و ان شاء الرحمن العام القادم محققه كل احلامك و اجملها
انتى تستاهلى كل خير ربنا يكرمك و يسعدك و يرزقك بالزوج الصالح اللى يسعدك يااارب

كل سنه و انتى طيبه و بصحه و سلام

Sou يقول...

كل سنه وانتي طيبه يارب نكون سوا على عرفات السنه اللي جايه

تايه في وسط البلد يقول...

اهلا مهرة

والله لقيت نفسي قريب من المدونة بتاعتك ولقيت النور منور في اودة النوبطشية - خصوصا انك علقتي عند زمردة من شوية - فقلت اجي اخد الشاي معاكي واطمئن علي احوالك خصوصا وانا مستني الكتاب اللي بانزله ده يخلص!!

ازيك عاملة اية؟

يا رب تكوني بخير دايما

وايه اخبار الشغل؟

علي الله يكون مزاجك عالي عشان تعرفي تواصلي

اه صحيح ، فيه حاجة دايما بانسي اطلبها منك وان كنت عاوز اقراها من ايدك قريب وهو تدوين بسيط كده تعملي فيه بانوراما لاخر الكتب او القصص اللي قريتيها ، متهيألي هيبقي هايل ، بس يعني انت براحتك!!ه

هو الكتاب خلص بس كوباية الشاي لسه مش خلصت!!!

عموما اذا كنت سهرانة - نوبطشية وكده بقي - فكري في الموضوع كده وقوليلي رأيك

فوتك بعافية

سبهللة يقول...

يا بنتى ما هو كان واضح من الاول
اى فيلم يبتدى بضرورة جواز بنت العم لازم تكون دى نهايته
معلش يا دوك
خيرها فى غيرها
ولو تاخدى نصيحة من واحدة مجربة
بلا جواز بلا نيلة
والله بتكلم جد
وجد جدا
ما كنت مهندسة زى الفل
عايشة فى بيت امى ليا اوضتى لوحدى عندى عربيتى معايا فلوسى
اخرج ادخل كما يحلو لى بس كله بالادب
اقابل اصحابى
اجى من الشغل اكل من ايد مامى واتأمر عليها وادخل انام زى الهانم
حتى طبقى ماكنتش بشيله من مكانه
حياتى كانت ملكى وحدى
دلوقتى بقى
العيال عايزين ياكلوا ويناموا ويستحموا ويذاكروا ويتفسحوا
والزوج ما يفرقش عنهم كتير ليه نفس المتطلبات واكتر شوية
وياريت عاجب ولا ياريت انا ملاحقة عليهم
وخصوصيتى اتمسحت بأستيكة
حتى ماليش الحق انى ادخل اوضتى واقفل على نفسى الباب لوحدى كل دقيقة حد يخبط عايز حاجة
دة غير ان حبى للنوم اصبح شفوى بس
بحب انام وعايزة انام من غير ما اى حاجة تصحينى لكن طبعا استحالة
مع اول وأوأة لاول نونو اتمسحت كلمة النوم العميق الونوم المريح من قاموس حياتى
والله يا مهرة انا بكلمك بجد
لو الزمن رجع بيا ولا كنت فكرت فى الجواز من اصله
صحيح هو سنة الحياة
وصحيح ان اى ام منى عينها تشوف بنتها عروسة
وصحيح ان البنت بتحلم بفستان الفرح
لكن فكرى الف مرة قبل ماتوافقى على حد لان بعد الجواز هايكون كفاية عليكى اوى مشاكل الحياة اليومية ومسئولياتك كأم وزوجة وربة منزل وطبيبة
مش ناقص كمان تاخدى راجل نص لبة
معلش طولت عليكى
بس نفسى كل البنات يعرفوا ان الجواز
اى جواز مش املة خاااااااالص
سلام

mohra يقول...

محمد الكومي
لا اضحك و لا يهمك...انا مش قماصه خالص و احب الضحك على طول و على عرض
طريقه تفكيره دى غريبه اوى و مافيش فيها ريحه الضمير بس يلا ادينا بنتعلم
نورتنى


نيجار
و انتى طيبه يا جميله
شكرا على المسانده


شهرزاد
و انتى طيبه
نورتى المدونه



نهر الحب
يا رب يا ايناس يا رب
كل سنه و انتى طيبه



M.K
الحمد الله انها لسه موجوده
ما خفى كان اعظم
كل سنه و الامارات كلها طيبه


زمرده
و الله انا مقتنعه بس احيانا باضعف شويه...اسعدنى انى استطعت رسم ابتسامه صغيره على وجهك الجميل


rovy
و انتى طيبه و بالف خير و السنه الجايه نكون على عرفات سوا انشاء الله


Sou
و انتى طيبه يا سو يا قمر



تايه في وسط البلد
و الله تنور فى اى وقت
انا فعلا فكرت اكتب عن كذا كتاب قبل كده بس انا مشغوله بشكل غريب و اوقات فراغى القليله جدا باستغلها فى النوووم....بس ان شاء الله قريب قوى اكتب عن الكتب هو انا ورايا غيرها...لو تلاحظ انا باحاول احدث الكتاب اللى بقراه فى المدونه اول باول
سلام




سبهلله
ايه يا بنتى الكلام ده؟؟
ده انا على وش جواز ..بلاش كده
هو الجواز مسئوليه و تعب اكيد
بس تعب لذيذ..يعنى ولادك اللى مش مخلينك تنامى دول ابتسامه واحد فيهم تسوى الدنيا و ما فيها؟؟؟؟
بس انا معاكى ان مشاكل الحياه كتيره و مافيش داعى ازودها باختيار غلط لواحد يطلع روحى
كل سنه و انتى طيبه يا جميل

myoopie يقول...

Selam,greetings from Turkey....

mostafa rayan يقول...

لاء يا ستي الحمد لله حصل خير فداك الف عريس المهم ان كرشة النفس راحت وانتي عدت إلى قواعدك سالمة
- بهنيكي بالنحوي -
ههههه
لاء بجد من غير هزار اللي زي دة مايتبكيش عليه
وعلى رأي الأغنية الشهيرة :
اعتبره دكتور وراح
واخد معاه الجراح وكرشة النفس
- دمت بكل الخير والود

حاسوباتيه يقول...

ههههههههههههههههه معلش تعيشي وماتخديش غيرها

م/ الحسيني لزومي يقول...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا
م/ الحسيني لزومي
مدونة /مواطنون ضد الشعب

فركشاوي ..ناوي يقول...

السلام عليكم ورحمه الله وبركاته
لا ألوم عليكي في موقفك من البدايه ...ولكن تحمل كرشه النفس الوقت دا كله وراه انسانه جاده في معاملاتها ...لكن سلاح (منتظر الزيدي) تأخر شويه كان لاز من بدري بدري ...الجزمه..
أهنيكي علي اسلوبك الرائع وأخلاقك النبيله....فركشاوي.

عازف انغامsaaary يقول...

طريقة كتابتك حلوه

الربان يقول...

تحياتي يا دكتورة

الف مبروك انتهاء الموضوع علي خير ...
و تجربة سخيفة و مرت....الشخصية الضعيفة لا انصح بالاقتراب منها كثيرا
لان من وراء ضعفها بيحصل اشياء لا تسر
وانما تغم و العياذ بالله....

ايضا الممرضات ...و انا لا انتقص من قدرهن او احترامهن...لكن ان كان الاخ
يلهث ورائهن...فحياة زوجته ستصبح صعبه ان لم تكن تعيسه.

احترام الذات واحترام الاخرين من اهم اسباب النجاح للعلاقات الانسانية سواء زواج او صداقة...

تحياتي و تقديري

mohra يقول...

myoopie
happy feast to you, i hope you can read some arabic and understand my blog ,i couldnt understand anything in your blog ,all turkish!!!!anyway it was nice of you to pass by
salam



mostafa rayan
ازيك يا مصطفى؟؟انا كنت فاكره الاغنيه بتقول كلب و راح؟؟؟



حاسوباتيه
ان شاء الله
نورتى




م/ الحسيني لزومي
انا عندى بطاقه
مممممممم افكر







فركشاوي ..ناوي
الله يخليك يا رب
زياره اولى و يا رب ماتكونش الاخيره
تحياتى



عازف انغامsaaary
شكرا لك
نورت المدونه


الربان
اهلا يا استاذ ...حمد لله على السلامه
كالعاده ...كلامك كله حكم
منورنى دايما

Manamino يقول...

هو كله من كرشة النفس علي فكرة
ههههههههههههههههههههههههه
يالله طويس ان ربنا خلصك منه
قال بعد 3 سنين قال
اقولك نصيحة يا اوختشي؟
ابعدي عن الصعايدة
هههههههههههههههههههههه

وينكى يقول...

تؤ تؤ تؤ
لالالا ما ينفعش كده
ألف سلامه عليكي من كرشة النفس الأول
يا أمى ادى اخرة اللى يقولولا اللى نعرفه ومشي المراكب ومش عارفه ايه
بس احساسك بالاهانه دا كان زياده
انتى مش وحشه .. هو اللى دماغه فيها صراصير
بدليل انى مش فاهمه هو اختفى ليه اساسا وعلى اى اساس قال زمايل ومش عارف ايه
هو كان ايه الموضوع اصلا
يخرب بيت الكلاكيع
كبري دماغك يابنتى
وهابي نيو يير
:)

غروب يقول...

ههههههههههههههههههههههه

احسن انه راح

احنا ناقصين صعايده

بس انا اول مره اجى هنا

مدونتك عسسسسسسسسل والله

ومن الناس القليله اللى ضحكتنى بجد


طريقتك رغم جديتها لكن كوميديه

تحياتى

micheal يقول...

هههههههههههههههه...مكنتش أعرف أنك مسخرة أوي كده
بس بجد موقف يفطس من الضوحك واسلوبك هو اللي محليه
تحياتي يا مهرة

بس خلاص ... يقول...

السلام عليكم
عزيزتى حرفوشة
اول مرة ازور مدونتك بس فعلا اسلوبك دجميل وبسيط
لكن اعتب عليكى انتى من الاول عارفه ان مش ده الانسان اللى ينفعع تقضى معاه باقى حياتك من خلال الانطباع الاول زى ماقولتى ليه دخلتى تجربة انتى متأكده من فشلها
بصى ياطبيبه ... لازم لازم شريك حياتك تكونى مقتنعه بيه وتعرفى ان ده اللى هتكملى معاه حياتك وكمان هتقابليه فى الاخرة زوج انشاء الله فى الجنه ... شفتى بق دنيا واخرة فلازم تختارى صح والا فلا
الحريه ياعزيزتى اهم
تقبلى زيارتى ولكى كل الود

الربان يقول...

تحياتي يادكتورة

أين انت ؟ لماذا ليس هناك جديد، لعل المانع خير ان شاء الله.

تحياتي و تقديري

rovy يقول...

دكتوره مهره وحشااااانى جدا
زيارتك طمنيتنى عليكى .. يارب تكونى دايما بخير حبيبتى
لكن فين الجديد ؟؟
ربنا يعينك اختى العزيزه و يوفقك دايما

دمتى بكل الخير

تحياتى

ستيته حسب الله الحمش يقول...

الانسة اللي على اسم بنتي
قريت البوست وضحكت جدا وفي نفس ذات الوقت زعلت جدا
حالتك ياعزيزتي اصبحت حااااااااااااااالة عاااااااااااااااامة
بنات شخصية وعيلة ونوفوخ ومن ضغط مجتمع اهبل وخوفهم لحسن القطر يعدي بيرضوا بالدنية في حياتهم
انتي عقلية علمية معملية فذه فسيبي القطر يعدي طظ فيه ها تلحقيه لما يكون راجع تاني
اما اللي عملتيه فيه فده انك بتردي مش على تصرفات هذا الإمعه نو ابسلوطلي
انتي بتصحي مهرة بتقولي لها قومي فوقي انتي اتهطلتي ولا ايه علشان كده كرشت النفس راحت علشان مهرة رجعت لمهرة
تحياتي يا قمر ولما تخلصي كشف ع العيانين ابقى تعالي مدونتي نشرب شاي وندردش

snohe يقول...

صديقتى العزيزة

ان شاء الله يرزقك انسان يفهمك وتفهميه
واهم حاجه انك تحترميه ويحترمك
صدقينى الزواج اساسه الاحترام والتقدير المتبادل من الطرفين

الحمد لله ان الموضوع انتهى
صديقتى لا تتسرعى فى قرار زواج حتى لا تعيشى مع شخص لا تحبيه

الزواج بدايه حياة كامله بها الكثير من المشاكل اليوميه

ان لم يكن الزواج على اساس الحب فلن تستطيعى الاحتفاظ بلقب زوجه لفترة طويله

واعتقد ان كلمه انسه افضل كثيرا من لقب مطلقه

اتمنى لك الخير
تحياتى