الجمعة، 14 أغسطس، 2009

و الفقى لما يسعد

عدنا بعد الفاصل
كالعاده فى الحر القائظ ده لا يمكن اكتب حاجه جديده عشان كده هاحكيلكوا حكايه قديييييييييييييييييييييييييييييييمه من باب التسالى

مشهد صباحى فى المستشفى
دكتور ماعرفوش:يا دكتوره انا عندى لكى عريس.......موافقه؟
-موافقه على ايه؟
دكتور ماعرفوش:هو دكتور و ماعرفش عنه حاجه
-طب اشوفه الاول
دكتوره ريا :خلى بالك الدكتور"ماعرفوش "ده اصلا متجوز3 !!!!!!
-تلاته؟؟؟؟؟؟؟؟؟


مشهد مسائى فى البيت
واحده صاحبتى" مخطوبه قريب" :فى واحد شافك فى الخطوبه و عايز يتقدملك
-طب انا متقدملى واحد تانى الايام دى
-و ماله شوفى الاتنين
- انتى عريسك بيشتغل ايه؟
- دكتور
-و التانى برضه دكتور
- بصره ....بس عريسى تخين شويه
- مش مشكله .....المهم الجوهر


قوم ايه ظبط المسائل بانى اشوفهم فى يومين ورا بعض (انتهازيه بعيد عنكم)
اليوم الاول


كنت فى المستشفى باعرض حاله على الجراحه و لقيت أمه لا اله الا الله بتكلمنى على الموبايل و الداخلى والخارجى و النداء الالى بتاع المستشفى و باعتنلى العامله تنادينى و مش ناقص غير البوكس وامين شرطه يقفشنى ...حاجه اخر فضايح
المهم رحت على ملا وشى لقيت ريا و سكينه مظبطين القعده و قاعدين بيستجوبوا عريس الغفله ابص عليه لقيت واحد بدقن و ماسك كيس هدايا ورق من اللى بيكتبوا عليهم


Habby nu yeer

و" كيسه" بلاستيك اصله كان بيقضى مشاوير و لقى نفسه فاضى قام قال يعدى علينا ...قوم انا نفسى اتسدت و بصيت لتحت ( و بالمره اعمل مكسوفه) و ابصلك لتحت لقيته لابس دبله فاتسدت نفسى اكت.....قصدى اتكسفت اكتر و بصيت على الارض الاقيه لابس صندل مترب ... المشاوير زى مانتم عارفين

و لانى شخصيه عقلانيه لا تهمها المظاهر ابدانننننننننننننننننننننننننن بدأنا الحوار لقيت الاخ البالغ اثنين و ثلاثين ربيعا لسه متخرج السنه اللى فاتت(يعنى بعدى بيجى خمناشر سنه!!!)
-و انت ليه قعدت فى الكليه كل ده؟
-حكايه طويله مش وقتها دلوقت
امال امتى وقتها؟مش مهم و بلاش نتكلم فى الماضى على رأى" الهضبه"
-طب بتشتغل ايه دلوقتى؟
-فى ديوان عام الوزاره بس فاتح عياده
-عياده ايه؟
-ابر صينيه و علاج بالموجات الكهرومغناطيسيه
-كهرو.....ايه؟؟؟؟
-مغناطيسيه
-وده فى انهى فرع فى الطب الكلام ده؟؟؟السالب و لا الموجب؟؟؟؟؟يعنى تخصصك ايه؟
-لا انا لسه ما تخصصتش
-امال فتحت العياده ازاى؟
-دى كانت دوره تدريبيه فى الابر الصينيه
-آآآآآآآآآآآآآآآآآآ............................................يلا بلا طب بلا غم ....طب انت لابس دبله ليه؟
-هو انا مش متجوز لكن بلا بلا بلا بلا بلا بلا بلا بلا بلا بلا بلا بلا بلابلا بلا و لو انتى ماشيه فى الصحرا ...بلا بلا بلا بلا بلا بلا بلا بلا
-.....................................(لا تعليك)
و هكذا قررت الانتقال لليوم الثانى و وداع اليوم الاول غير مأسوف عليه بلا هضبه بلا جبل

اليوم التانى
العريس كان عن طريق خطيب صاحبتى و الاجتماع المزمع عقده كان يتضمن كل من السيده الوالده و السيده والدتها و السيد خطيب صاحبتى والسيده حرمه (على اعتبار ما سيكون) و السيد العريس و انا و...كفايه كده
و بعد اكتر من ساعه انتظار فى بيت صاحبتى شرف خطيبها و خطيبى (على اعتبار ما سيكون برضه) طبعا انا كنت شعله من الغضب لكن العريس الحقيقه كان مهذب و لطيف وطموح و مكلبظ و ليه خدود حمر مكلبظين زى الاطفال وانتو عارفين قد ايه بحب الاطفال.....المهم عرف يمتص غضبى
الخلاصه هو كان طموح و مجتهد و انا استريحتله و انتهت المقابله وهو كمان متحمس جدا جدا جدا و عايز نمرتنا عشان نخلًص و قلت خلاص بقه
...فرجت و لسوف تحملى اللقب يا بت
موقف غير معتاد بالمره ..حاجه غريبه مش كده ؟؟خرجنا انا و ماما للعربيه و احنا ماشيين ماما ماقدرتش تقاوم و سألتنى

ايه الاخبار؟؟؟
قوم انا مربوطه من لسانى و ربنا ما يفتحش عليا غير بكلمه "ملظلظ" مع تحريك الذراعين بامتدادهم!!!!!!!!!!!
تسألونى و ليه كده اقولكم قله ادب بس ما تخلوش عندكم فكر ...العقاب جاى حالننننننننننن
و انا فى غايه الانسجام وعماله احرك دراعى يمين و شمال لتأكيد المعنى...الحاسه الساسه (فاكرينها طبعا) خلتنى ابص لورا اذ فجأتن
و الاقيك مين معانا يشارك فى الحوار بقلبه و ودانه و سلاطته و بابا غنوجه.....................



العريس الملظلظ بذات نفسه



يالهول مأساه اليقين...اتارى طنط ام صاحبتى "الله يكرمها" قالتله مايصحش تسيبهم يروحوا للعربيه لوحدهم (يعنى هايجرالنا ايه يعنى) و هكذا خرج يهرول ورانا و كانت المأساااااااااه
طبعا مش محتاجه اقولكم ان الموضوع اتنسف من اساسه و انا اريد و انت تريد و الله يفعل ما يريد
بس انا مش مضايقنى فى الموضوع الا انى جرحت مشاعر شخص بدون ماقصد و الله و اعترف انى كنت ناويه اكمل بس يالا خيرها فى غيرها




ملحوظه
تم تغيير اسم التدوينه الى " المتعوس متعوس و لو علقه فى ديله فانوس"
وبمناسبه الفانوس كل سنه و انتم طيبين