الاثنين، 7 يوليو، 2008

واجب


الدنيا لسه حر و كنت ناويه اتنح و ماكتبش حاجه بس جالى واجب من الصديقه زمرده و طبعا اثبت انى تلميذه خايبه و اتأخرت فى عمل الواجب بس معلش اصلى بطلت حكايه الواجبات ديه من ابتدائى و ده كا ن من كااااااااااااااااااااااااام سنه؟؟يجيييييي اممممم..................ما علينا ما علينا


1. أذكر اسم من طلب منك حل هذا الواجب.
زمرده صاحبه مدونه كوكب زمرده


2. أذكر القوانين المتعلقة بهذا الواجب

مش عارفه و مافهمتش من زمرده...معلش الطب قضى على الربع اللى كنت ماشيه به


3. تحدث عن ستة أسرار قد لا يكتشفها من يقابلك للمرة الأولى.

سته مره واحده...الحقيقه انا انسانه واضحه جدا و صعب اتفهم غلط بس هاحاول الاقى 6 اسرار


1-صعب ان يعرف احد انى اهوى القراءه ببساطه اخاطب الناس بقدر عقولهم واكره التباهى بالعلم او المعرفه و موتى وسمى المصطلحات الكبيره المجعلصه و ارى ان ابدع الكتاب واقواهم هم اسهلهم لغه


2-اعطى ايحاء برقه شديده (طبعا انا بسكوته اكيد اكيد ) لكنى استطيع تحمل الكثير من المكاره و العمل الشاق بدون كلل و لكن مع الكثير من الملل


3-بعض الاخطاء لا يمكنى التسامح معها و تغير رأيى فى الانسان الى الابد

My good opinion once lost is lost forever

Mr. Darcy in Pride & Prejudice

Jane Austen


4-اذا غضبت اكلت


5-اسعى الى الكمال ..مثاليه بصوره مرضيه.... بصوره مزعجه لى شخصيا و لسوف اكتب قريبا عن هذا لانه يضايقنى حقا


6- عندى مدونه ولا يعلم احد من معارفى بهذا دعك من ان يتوقعه او انه يعرف يعنى ايه مدونه من اساسه


4. حول هذا الواجب إلى ستة مدونين، وأذكر أسماءهم مع روابط مدوناتهم في موضوعك.





زيانور (يا رب تكون فتحت المدونه تانى)

الربان (و ان كنت اظن انه حله قبل كده بس ديه هديه بقه)



5. اترك تعليق في مدونة من حولت الواجب عليهم، ليعلموا عن هذا الواجب.

حالاااااااااااااااااا



هناك 41 تعليقًا:

سبهللة يقول...

حبيبتى مهرة
انا حليت الواجب دة قبل كدة
وبجد أشكرك انك فكرتى فيا
دةمعناه انى قريبة منك وبصراحة انا اتبسطت اوى ..بجد والله
وادى اللينك بتاع الواجب
http://sabahlalah.blogspot.com/2008/06/blog-post_18.html

سمر الشافعى يقول...

حبيبتى مهره كدا انا احسدك لانك لما بتضايقى بتاكلى اصل انا اموت وابقى كدا عشان لما بتضايق مش بلاقى حاجه اطلع فيها غيظى

سمر الشافعى يقول...
أزال المؤلف هذا التعليق.
micheal يقول...

هي التاجات دي رجعت من تاني
:)
تحياتي

blue-wave يقول...

بجد اجابات تحفه
تحياتى

زمرده يقول...

ردودك روعه وقريبه من النفس
مع اني اشك في قصه (طبعا انا بسكوته اكيد اكيد )
هههههههه ..من اخر تدوينه لك عن
العريس رسمت لك صوره بخيالي بعيد عن البسكوت

ومثلك اكره المصطلحات الكبيره
ولكني عكسك اكل لمن اكون سعيده

الله يسعدك ان شاء الله ويوفقك
وياستي مش مهم التأخير المهم انك شطوره
عملتي الواجب اخيراً

alzaher يقول...

أدعوك الى تأبين الدكتور المسيري
فقيد مصر والأمة
يوم الخميس القادم ان شاء الله
بنقابة الصحفيين المصريين
الساعة السابعة مساءا

Zianour يقول...

حبيبتي ونور عيني مهرة
شكرا جزيلا على الواجب وشكرا اكثر على الميل
انا حبيت امر زي العادة واسيب السلام ولسه بينا كلام في الميل
الواجب ده صعب وهيفضحنا... يلا كله فدا مصر
بوسات كتيرة
زيانور

rovy يقول...

اجابات جميله و واضح انك شاطره فى حل الواجب مش تلميذه خايبه ولا حاجه ..
شخصيتك جميله و واضحه ..
احيكى اختى الكريمه
دمتى بخير فى رعايه الرحمن

rovy

mohra يقول...

سبهللة
معلش يا سبهلله ..انا ما كنتش قريته بس تتعوض


سمر الشافعى
تحسدنى ؟؟؟ده الدنيا كلها مشاكل و لو مابطلتش العاده ده هابقه فيل صغير فى يوم من الايام


micheal
هي لها مواسم و لا ايه؟فهمنى يا مايكل



alzaher
رحمه الله عليه


blue-wave
شكرا يا دكتور


زمرده
انا مش بسكوته؟؟؟ده لولا انى مش عايزه اقلب المدونه اعلانات زواج كنت افحمتك :)
المهم اخدت كم من عشره؟؟



Zianour
اخيييييييييييرا
انا فى انتظارك
حضن كبييييير


rovy
شكرا يا rovy
نورتى

عايش ولكن يقول...

ههههههه
حلوه اوى لما تدايقى بتاكلى
هحسدك انا كده هههههههه

بس ردودك حسيت انها سهله ومفيهاش مبالغه وصادقه الى ابعد الحدود
تحياتى
علاء

mostafa rayan يقول...

ربنا يوفقك
لكن حسبي من الأكل عند الغضب يحسن كدة ممكن وزنك يزيد جامد لأن كل اللي حوالينا بدعو للغضب

فاتيما يقول...

بت يا مهرة يا شقاوة
هتيجى التجمع النسائى و لا هتنفضيلينا ؟؟
اوعى ازعل منك خالص مالص بالص
طب يعنى حاولى عشان نشوفك
التاج دا حلو و مرعب و ربنا يكرمنى و محدش يباصيهولى عشان ساعتها المدونة هتتقفل بالضبة و المفتاح
أشوفك على خير يا قمر
و حكاية الاكل دى مشتركة أنا كمان لما بزعل اكل و دى حاجة مزعجة قوى قوى
ربنا يقدرنا و نبطلها

mohra يقول...

عايش ولكن
مش عارفه و الله الحسد على ايه..ديه لعنه يا شيخ
نورت المدونه


mostafa rayan
انا بقول نفسى ماينفعش يا بت لايميها...ده العيش و العيشه و اللى عايشينها يطهقوا


فاتيما
عرفتى ازاى؟؟...مش تنفيض و لا حاجه بس عندى شغل و الله...يلا خيرها فى غيرها
بس اخيرا لقيت زميله فى موضوع الاكل ده
ده انا كنت بقول يظهر انى عجبه

Darsh يقول...

ما أجمل المثالية

ربنا يوفقك يا رب

الموضوع صعب بس بيخلق سعادة داخلية

Desert cat يقول...

اذا غضبت اكلت
ليه بس يا دكتورة ده بيزود الوزن
ربنا يبعد عنك كل غضب

كاتب مصري يقول...

تحيتي
أنتظر تشريفك مدونتي
كل الود

موناليزا يقول...

جميلة هى شجاعتك فى الاجابة انا بعتبر اللى يعرف يتكلم عن نفسه شجاع بجد
على فكرة احنا ذى بعض فى رقم5

شفقة هانم واحسان بك يقول...

اجاباتك حلوة اوى.......برافو عليكى ومبروك

mohra يقول...

Darsh
و الله احيانا بيخلق تعاسه داخليه

Desert cat
مصيبه و قال بيحسدونى قال


كاتب مصري
انا قريت لكن ماعلقتش بس هاعلق المره الجايه


شفقة هانم واحسان بك
نورتونى و اخجلتم تواضعنا يا فندم

موناليزا
مادمتى تشاركنى نفس الصفه اكيد حاسه بمشاكلها
لكن انا فى انتظارك تتكلمى عن نفسك

wael يقول...

انا بجد شفت التاج ده كذا مره بس اموت واعرف اشمعنى 6 اسرار
ثانيا هو ايه حكاية طب هو اكتر من 90 في الميه من المدونين دكاتره اعتقد الطب بجد لسع اخر فيوزات فاضله في مخنا
حسبي الله ونعم الوكيل في الطب

زمرده يقول...

هههههههههههههه
بسكوته .. بسكوته ولا يهمك
و اممممممم 9 من 10
لازم اخلى 1 لي

سلام ياعسل

سوسا ومودى يقول...

مهرة
أجاباتك قربتنا منك وعرفتنا بيكى أكتر وأكتر

وسعيده جدا أنك متابعه قصتى أنا ومودى
وأنتظرى مفاجأه البوست الجاى
بس متخليش عقلك يروح لبعيد أوى يعنى
هههههههه

تايه في وسط البلد يقول...

مهرة العزيزة

ميرسي كتير علي الواجب وجاري رفعه يا فندم

هتعلميه امتي؟

أنونيمس يقول...

اذا غضبت أكلت

زيي بالظبط الفرق الوحيد اني لو غضبت أو فرحت أو اكتابت أو احتفلت
في كل الحالات الممكنة .. أكلت

:)

mohra يقول...

wael
معاك حق ..شويه شويه هايصرفونا على بطاقه التموين


زمرده
ما دام 9 من 10 يبقى سامحتك خلاص


سوسا ومودى
انا فى الانتظار و نورتى



تايه في وسط البلد
لأ فعلا تلميذ ممتازززز



أنونيمس
ههههههههه
مش عارفه ابطل ضحك..ديه نهايه الطب

نهر الحب يقول...

اجاباتك صريحة ومنطقية
وكمان رائعه
فينا اشياء مشتركة

بالتوفيق يارب

bastokka طهقانة يقول...

انا بقالي عشرتاشر سنة معملتش واجب
بس الواجب بتاعك صعب قوي
اوروفوار

snohe يقول...

رقيقه وقويه
لما تزعلى تنتقمى من الاكل
عندك مدونه وبتخبى افكارك عن المحيطين
تبحثين عن المثاليه
اكيد اصدقائك كلهم سعداء بصفاتك الغير مرئيه
وانا ايضا سعيد بالتعرف على مدونتك
تحياتى

نور يقول...

مهره
ازيك اول مره اجى وجيت على تاج و على اسرار كمان
بصى انا كمان زيك واحد او اتنين اللى يعرفوا انى عندى مدونه و اظن ما تفرقش معاهم اصلا
هعدى كتير استحملينى بقى
سلام مؤقت

micheal يقول...

ده إيه الواجب المحرج ده
:)
تحياتي يا مهرة

alzaher يقول...

إنتهيت لتوي من قراءة الرواية التي إخترتي اسمها عنوانا لمدونتك
عشت مع ملحة الحرافيش لحظة بلحظة وقصة بقصة
تعايشت مع شخصياتها
تعاطفت مع أبطالها
وبقيت مثلهم
أنتظر عودة عاشور الناجي
وأحلم بنبوت الفتوة
وتوت التكية

واحدة مفروسة يقول...

يا صباح الواجبات
هوه انا كل ما ادخل مدونه الاقي فيها واجب واجب
هيه مش الامتحنات خلصت و لا ايه؟

سنووايت يقول...

واجب سهل دا وبسيط
وجاوبتي عليه بطريقة سلسة ومش مملة :)

بس موضوع المثالية دا متعب جدا علي فكرة , بس طالما مؤمنة بحاجة بجد تمسكي بيها

بالتوفيق يا رب

mohra يقول...

نهر الحب
انا يكون لى الشرف و الله
و ان شاء الله نعرف بعض اكتر



bastokka طهقانة
بس على مين ....انا خدت 9 من 10



snohe
انا كل ده
ربنا يكرمك و يخليك
انا قريت تعليقك على البوست اللى فات و متفقه معاك تماما
نورت المدونه



نور
استحملك؟يا خبر ده انتى تشرفى
اسعدتنى زيارتك فعلا



micheal
عايزه اشوفك و انت بتحل واجبات يا مايكل



alzaher
مرحبا بك واحد من الحرافيش
سعيده باعجابك بها و بانك شعرت بنفس ما اشعر به عند قرأتها
كلنا فى الانتظار مثلك
تحياتى


واحدة مفروسة
زى مايكل نفسى اشوفك حاله الواجب ده
نورتينى



سنووايت
انا هاكتب قريب احكى عن مشاعرى و مشاكلى فى موضوع المثاليه ده
تحياتى لكى

!!! عارفة ... مش عارف ليه يقول...

اسعى الى الكمال ..مثاليه بصوره مرضيه.... بصوره مزعجه لى شخصيا و لسوف اكتب قريبا عن هذا لانه يضايقنى حقا
---------
فعلا الموضوع ده مؤرق جدااا مع إن في ناس بتكبر اوووي ومش في دماغها خالص
ساعات الواحد بيبقى عايز يموت ضميره ده علشان يرتاح من الزززن بتاعه
يلا الحمد لله

..
في كاتب رائع في سهولة اسلوبه وتمكنه من اللغة مبهرررر .. الراجل ده معجزة ربنا يدي له الصحة

اسمه إبراهيم اصلان بيكتب في الاهرام وله عمود كل تلات وعلى فكره هو صاحب قصة مالك الحزين اللي اتعملت فيلم الكيت كات بتاع داوود عبدالسيد

تحياتي لشخصيتك السمحة الودوده
وليد

Desert cat يقول...

اصدقائى الأعزاء المدونين والمدونات
موعدنا السبت 19/7/2008 مع حلقة جديدة من برنامجنا الإذاعى
أنت تسأل والكمبيوتر يجيب
الذى يذاع يوميا الساعه 9.10 صباحا على اذاعة البرنامج العام ماعدا يوم الجمعه
والحلقة تتضمن رودو المدونين الأعزاء على سؤال من المخطأ ( الطلاق بالمحمول )
والتعليقات التى ستذاع
سومه
سلوى سمير
رافتولوجيا
عدى محمد يونس
habiby
ميسوسوب
استرالي
دعوه للأمل
أيوية
احلام اليقظه
مجرد خواطر
mohra
جيهان على
عبده الرايق
هانى ميشيل
ٍSOU
حاجات جوايا
روفى
مواطن مصرى

كما يمكنكم سماع الحلقة مباشرة فى نفس موعد اذاعتها الساعة 9.10 صباحا
من خلال موقع البرنامج
http://dear.to/cairo
تمنياتنا بدوام التواصل

bastokka طهقانة يقول...

جميل يا دكتورة بسكوتة
انا كمان بستوكة بس مكرة


اوروفوار

عروسة ننوسة يقول...

مبروك على التاج....واجاباتك عرفتنا بيكى
تحياتى

mohra يقول...

عارفة ... مش عارف ليه
ابراهيم اصلان من كتابى المفضلين و دايما بقراله فى الاهرام او كتبه


Desert cat
و الله و طلعت فى الراديون يا ولاد



bastokka طهقانة
بكره ابقى مكسره انا كمان



عروسة ننوسة
الله يبارك فيكى يا ستى
اسعدتنى زيارتك

Shereen يقول...

كله دةواجب
بس اجابات متميزة
واكتر من كده حبك لعدم التعالى والتباهي بالعلم
احييكى
سلام