الأحد، 20 يوليو، 2008

حدث الاسبوع الماضى يا babyyyyyyyyyyy


قضيت الاسبوع الفايت كله لف فى انحاء القاهره الكبرى ما بين العتبه للتحرير للعباسيه فى عز الضهر ده غير المرمطه ما بين مكاتب الموظفين اللى شعارهم "ليه تسهل على الناس مادمت تقدر تكلكعها" و يدور الحوار التالى

-لو سمحت

-نعم (تعبير وشه اهانه فى حد ذاته)

-كنت عايزه كذا

-ما ينفعش يا انسه

-ليه

-هو كده

-طب....

-ماطبش,اخوكى كان هنا امبارح و مشى قفاه يقمر عيش

-اخويا؟؟؟ده انا سايباه فى اسكندريه من اسبوع؟؟

-يووووووووووه ,زميلك زى اخوكى يعنى ...امال دخلتوا طب ازاى

-.................

و اخرج اسأل فين المدير؟ و يتكرر نفس الحوارلكن لانه لايأس مع الحياه فانا باكمل و اسأل عن المدير الاكبر و هكذا لمده ساعه ساعتين او يومين و فى النهايه اخد الامضا الشريفه فى خمس دقايق

المهم عشان ما تتعلوش قدرت اقدم الطلب المكون من 18 ورقه (بجد مش هزار)و لا كأنى هاقدم على منصب مساعد وزير الرى بس المعاناه ديه ادت الى انهيار حالتى النفسيه الى الحضيض لكن لانه لا يأس مع الحياه و لا حياه مع اليأس (منه لله مصطفى كامل ) قررت أرٌوح عن نفسى و اروح حفله موسيقى فى ساقيه الصاوى اصل انا مابحبش حفلات الاغانى يعنى

قوم ايه اتفقت مع لولو قريبتى اننا نروح و بعد يوم شاق و عمل كام مشوار على الماشى قبل الحفله و لف على الركنه قد ساعه و طبعا ماكناش حاجزين لكن وصلنا بدرى ساعه و لوسمحت تذكرتين.....هنا كويس؟ بس ما تتأخروش بكره بقه


بكره؟؟؟؟؟؟


لولو:تاننننننننننننننى(اصل انا ليا سوابق فى موضوع الحول فى قرايها المواعيد من النت من زمان)


و العمل ؟؟

انا يا قاتل يا مقتول انهارده ده انا حزمت امتعتى و هابيت عند لولو انهارده على حس الحفله...كل ده يروح عالفاضى

-شف لنا عندك ايه انهارده


" افضل اغانى الخمسينات و الستينات بصوت الهام امين"


-ما بحبش الاغانى القديمه

-يا عبيطه حد مايحبش عبد الوهاب و فريد و يمكن يكون توزيع جديد او تكون الاغانى اللى بتتعاد دلوقتى يعنى ياحبيبى عد لى تانى-حكايتى مع الزمن - اسمهان ...كده يعنى

و طبعا لانى شخصيه ساحقه ماحقه البنت الغلبانه وافقت و حجزنا فى وش المسرح بالظبط

و قبل الحفله الناس عماله تيجى ثمانين سنه و طالع ..عشر سنين ما يضرش و كمان اجانب

-شايفه يا جاهله حتى الاجانب بتيجى تسمع الفن الشرقى الاصيل

-طب و العيال؟؟

-اهلهم بيعلموهم ازاى يحبوا تراثهم

-تراثهم!!ماشى يا ختى

وبدأت الحفله و دخل علينا الهام لابس اسود فى اسود و رابط شعره لورا و طول بعرض بارتفاع يفكرك كدا بزعماء المافيا بتوع السينما(طلعت الهام رجل مش ست!!!!)

و اشتغلت الموسيقى و مش غريبه عليا الموسيقى ديه...ايه يا مهره؟ايه يا مهره؟


make me swayyyyyyy


يا نهار اسود و منيل ديه طلعت حفله انجليزى و كمان ستينات...يا سلا سوخه يا ولاد...ماكنش يومك يا مهره ده انا لما باسمع فرانك سيناترا باقفل التلفزيون مابقلبش القناه حتى


لولو بتزغرلى (و فريد و شرقى و التراث اكيد هاتسبنى اروح موتورجل النهارده) قعدنا نسمع و لا حول و لا قوه الا بالله و الهام والناس اخر صهلله و الله لولا انه مكان محترم كانوا اتحزموا و رقصوا و الناس حافظه الاغانى و ماحدش قاعد متنح غيرنا خاصه انه بدأ يغنى بلغه تانيه ايطالى اسبانى الله وحده اعلم و فى نهايه احدى القصائد لولو لفتلى

-اخر مره هاسمحلك تصقفى

-ليه؟

-انتى كده بتخدعيه

-مين؟

-الهام

-الهام مين؟؟؟؟؟؟؟؟آآآآآه


الجدير بالذكر هنا ان الهام يمتلك احد اقوى الاصوات التينور اللى يحسده عليها بافروتى نفسه الله يرحمه و كل اغنيه يرزعلنا حته يا BABYYYYYYYYYYYY تنقح اللى قبلها و الله خسارته فى ساكن فى حى السيده كان هايبدع بس اشك انه او اى واحد من اللى قاعدين( باستثنائى انا و لولو) يعرف ان عندنا حى اسمه السيده


الحفله استمرت لمده ساعه (لو زادت كان السقف وقع علينا مع واحده من يا BABYYYYYYYY )ولجل حظى السعيد طلعت اول حفله لالهام و انا باتمناله من قلبى والله كل توفيق بس بعيد عنى عاااااااااااااااااااااااااااا


اسيبكم دلوقتى مع هذه المقطوعه و كل حفله وانتم طيبين



هناك 29 تعليقًا:

momken يقول...

ههههههههههههههههههههه
والله انتى دمك سكر

وكمان طاله بتاع اوبرا وحركات
ال فاروتى ال

انا كان قصدى يادكتور تنظفى ودانك بالموسيقى الجامده دى

وبعدين خوليو اجلسيوس

والناس المحترمين المعتبرين بتوع زمان

الا قوليلى صحيح فين السيده زينب
ومين حى بافاروتى
دى السيده زينب بتاعه ايطاليا

وسلميلى على اوبرا عايده

تحياتى

Desert cat يقول...

هو الراجل كانت نيته سليمه
وبلغتهم بيقول للحاج ابوه
يا babyyyyyyy
ماهو ساكن فى منشية ناصر ايش فهمه هو فى حى السيدة

blue-wave يقول...

ههههههههههههههههه
بجد بجد
الله يكون ف عونك

mohra يقول...

momken
انضف ودانى؟؟ماشى مقبوله منك برضه بس انا بادعوكم كلكم تنضفوا ودانكم و تسمعوا اغانى القرن الماضى اما عنى فانا اتخدت فمين معتبرين


Desert cat
منشيه ناصر ايه يا شيخه؟بقولك طول بعرض بارتفاع
خافى على نفسك يا بنتى


blue-wave
مش كده و النبى؟؟

بنت القمر يقول...

:))))))))
هو بس سؤال يعني ايه طموح الملائكه؟ظ
اول مرة اسمع ام الملايكه عندها طموح!!
تحياتي لخفةدمك

snohe يقول...

احسن
عشان نتعلم نعرف احنا رايحين فين
ههههههههههه
والله البوست دمه خفيف
انا حضرت حفلات كتير بنفس الشكل
وكنت بحضر اما مجامله لاصدقاء مثقفين ومخهم طاقق
المهم بتون تجربه جميله وانت جالس مش مستمتع ولا فاهم ولا عارف الدنيا ماشيه ازاى
صديقتى العزيزه كان يوم صعب عليكى صباحا ومساء كان الله فى عونك


تعيشى وتحضرى حفلات غيرها

سلام

وينكى يقول...

هاهاهااااااااااااى
يانهارك ابيض
مش تبقوا تاخدوا بالكو من المواعيد يابنتى
اقولك على الاجمد من كده
السنه اللى فاتت كانوا عاملين نظام ان مواليد كل شهر يحضروا حفله ببلاش
ضربتلك يا أوختشي السواريه ورحت وانا مش عارفه اصلا هاسمع ايه
لجل الحظ .. فرقه اسمها اسفلت.. راب شرقى
ماقعدتش اساسا واللى حواليا كلهم كانوا مجانين بيصرخوا مع موسيقى هبد وخبط والكلام بسرعه مش لاحقه اسمعه اصلا ولا كأنها حفله زار
روحت البيت باتطوح وقلت ياخسارة السواريه

سبهللة يقول...

ههههههههه
دمك زى العسل
بس سيبك انتى
اهم حاجة انك خلصتى الورق اللى عايزة تخلصيه

mohra يقول...

بنت القمر
الجمله دى هى جمله النهايه لروايه الحرافيش لنجيب محفوظ(اقرى اول بوست )...الملائكه هم الذين لا يخطئون الذين لايحملون شرا بداخلهم و كل طموحهم عدم اقتراف الاخطاء و نيل رضا الله
لو قرأت الروايه ستصلك الفكره بصوره افضل من كلامى ....جربى و مش هاتندمى


snohe
فعلا انا استاهل
لازم اشوفلى حل فى السطله اللى انا فيها دى
نورتنى


وينكى
دا انا كده احمد ربنا اقله كان فى كام اغنيه كده عرفتهم بالشبه
صحيح اللى يشوف بلوه غيره تهون عليه بلوته
نورتى


سبهللة
معاك حق و الله ..اهم حاجه العريضه

!!! عارفة ... مش عارف ليه يقول...

انت فكرتيني بفيلم

"عماشة في الأدغال" :)

حمد لله على السلامة

تحياتي
وليد

.:.-=- ELGaZaLy-=-.:. يقول...

بصى انا عايزك تسمعى حاجة تانية..

اغنية الرائع عبد الباسط حمودة...

انا مش عارفنى لكى تصبحى مشبرنشقة...

بجد صعبتى عليا
ههههههههههههههههههه

سمر الشافعى يقول...

يالهوى عالاحساس وانتى قاعده فزمن سعد زغلول مع ناس ميته من كام سنه كدا بس والنعمه انا لو مكانك كنت هموت من الضحك

موناليزا يقول...

كنتى روحى السينما ارحم

تايه في وسط البلد يقول...

اهلا يا دكتورة

هي كانت حفلة عمر خيرت يوم عشرين يوليو اللي كان عليها العين؟

كده يبقي فاتك كتير...اما بالنسبة للتقديم لامتلاك فيللا علي القمر فاحب ان انبهك انها لن تنتهي بسهولة

تحياتي

قصاصه يقول...

تحياتى يا مهره على مدونتك فى رائعه ومسالمه جدا
ارحو ان تقبلى اضافه مدونتك للينكس عندى فى مدونتى وارجو اضافت مدونتى عندك .
شكرا
د/ ماجد

mohra يقول...

عارفة ... مش عارف ليه
انا عماشه؟؟؟؟الله يسامحك :)))


.:.-=- ELGaZaLy-=-.:.
يعنى ايه مشبرنشقه؟؟؟
بس انا اكيد كنت مشبرنشقه فى الحفله ديه


سمر الشافعى
ما انا ضحكت برضه
نسيت اقولكوا ان الضحك عندى احتراف يعنى اضحك طووووووووول الوقت


موناليزا
و هى الحته دى فيها سينمات
اهو اتدبسنا و السلام


تايه في وسط البلد
لا و الله كانت حفله تانيه و ضاعت حفله عمر خيرت زى اختها(لولو مارضيتش تروح بعد اللى حصل :)))
بس انا عايزه فيلا على القمر يمكن الحفله الجايه ان شاء الله



قصاصه
اقبل؟؟؟ده انا يكون لى الشرف
شد انتباهى كلمه مسالمه لكن زال العجب لما عرفت انك غاوى شكل :))
نورت المدونه

نهر الحب يقول...

دمك زى العسل
وبوستك حلو
بالتوفيق ان شاء الله

ibn nasser - ابن ناصر يقول...

هههههههههه
مفيش تعليق انسب من مواقف وطرائف فعلا !!
تحياتي

سوسا ومودى يقول...

هههههههههههه
موقف بجد تحفه
بس أكتر جمله عجبتنى فى البوست
كله
بل
وفى تاريخ المدونه كلها

ومستنى جدا وحسسسسسيييييييت أوى بيها
جمله
ليه تسهل على الناس مدام تقدر تعقدها

عاااااااااااا
أنا كنت فى جوله مماثله الفترة اللى فاتت
عشان شغل
كنت بعيد عنكم بعمل أجراءات
ومش حتكلم
حسيبكوا أنتوا تتخيلوا أيه اللى حصللى

Sou يقول...

عسل يا مهرا ....بموت فيكي :)

rovy يقول...

السلام عليكم

كان الله فى عونك و عون كل من يأخذه حظه العثر لرحلة الشقاء بين مكاتب الموظفين اللى شعارهم زى ما قلتى ليه تسهل على الناس .......

بالنسبه للحفله معلش ربنا يعوضك ...
و ممكن تعتبرى اللى حصل تغير وكسر للروتين .. انا لو منك كان زمانى ضحكت ولا كأنى فى اجمل مسرحيه مهو هم يبكى و هم يضحك .. اضحكك الرحمن و اسعدكى دائما
تقديرى و تحياتى

عروسة ننوسة يقول...

دمك زى السكر والبوست تحفة
تحياتى

mohra يقول...

نهر الحب
شكرا لكى
اسعدتنى زيارتك


ibn nasser - ابن ناصر
نورت المدونه


سوسا ومودى
ازيك يا سوسا
وحشانى
مش هتكملى بقه


Sou
ازيك يا sou و لا اقول يا باشمهندسه



rovy
الله يكون فى عوننا جميعا
تحياتى و حبى


عروسة ننوسة
من بعض ما عندكم يا فندم

مصطفي ريان يقول...

معلش بس المرة الجاية اقرأي مظبوط
تحياتي ليكي

صباح الصباح يقول...

هوة ما كانش فية عنب العنب ام سمك السمك!!
انتى كوميدية مووت وحلوة اوى عاااا اللى ف الاخر

قلب مصرى يقول...

ههههههههههههههههه
تستاهلى علشان مش بتقرى الحاجة كويس.
طبعا مش فرحان فيكى ولا حاجة
المهم إن ربنا يكرمك وتخلصى ورقك

كلام على بلاطة يقول...

ايه الحلاوة دى يا مهرة
عسل
تحياتى

mohra يقول...

مصطفي ريان
ان شاء الله بس على الله يكون فى مره جايه


صباح الصباح
عنب و سمك .....اهو ده اللى ناقص ده انا كنت افقعكوا حته عااااااا معتبره


قلب مصرى
استاهل ....ماشيييييييى ...ده عشان دعوه الورق و بس
نورت المدونه


كلام على بلاطة
الله يخليك يا استاذ
نورت المدونه

شفقة هانم واحسان بك يقول...

معلش تعيشى وتاخدى غيرها
المرة اللى جاية تاخدينى معاكى