الجمعة، 30 مايو 2008

تاج الاحلام



العزيزه زيانور اهدتنى تاج و ام البنين كمان


الحقيقه لا اعرف معنى تاج ..هل هوتاج (اللى بنلبسه فوق راسنا ده) ولا tag اللى بالانجليزى؟؟؟؟


التاج عن الاحلام و هتبقى فضايح




1- اذكر 5 احلام على الاقل تخص ماضيك وتحلم فيها بتغير الاشياء .. ماذا ستعدل وماذا ستترك؟؟


سوف أحكى هنا عن أحلام الطفوله الاولى


طبعا كان اول احلامى ان يكون شعرى اصفر و عيونى زرقاء..و بعد السنين بعد ان اصبح من السهل ان احصل على الشعرو العيون الملونه لم اعد اريد هذا دعك من ان اعتبره نموذج للجمال...بل ان نظرتى للجمال نفسها اختلفت فلم يعد الجمال هو جمال الوجه فقط بل لم يعد الجمال المحسوس هوالاساس..فكم رأيت من عيون جميله كاذبه و وجوه مورده هى عنوان لقبح لا تتخيله.....لكنى ايضا رأيت وجوها تضيئ بنور داخلى لا يعرف احد مصدره


و اكيد اكيد كنت اتمنى ان اصبح مدرسه لكن سرعان ما تركت هذه الامنيه غير نادمه و مازلت عند رأيئ فما اصعبها من مهنه فى هذه البلد و كم من اصحابها يدركون اهميتهم بحق


الحلم الثالث للاسف هو الحلم المستحيل و هو سر لم احكيه كثيرا من قبل...و انا فى ابتدائى كان عندنا عروض مدرسيه راقصه دائما و ابدا على انغام اغانى صفاء ابو السعود و كانت مدرسه الالعاب تختار حوالى 5\4 الفصل لهذا الغرض ...لماذا لم يتم اختيارى (رغم انى كنت طفله مقطقطه و الله) السبب طولى ...اى و الله ...كان العرض و لسبب مقدس لا اعلمه ينبغى ان ينقسم الى مجموعتين من بنات طوال و بنات قصار و لا عزاء للمتوسطين.....ثم تبدأ مرحله العذاب عندما تتحول الحصص كلها لبروفات العرض و لا يكون لى انا و الشرذمه المنبوذه الا الفرجه.....مره صعٌبنا على مدرسه موسيقى و علمتنا نشيد عشان نقوله فى الحفله لكن الحمد لله الذى لا يحمد على مكروه سواه جالها تيفود قبلها و رجعنا للفرجه من تانى


الحقيقه لا يمكننى ان استبعد هذا الحلم...فرغم عدم قدرتى على تحقيقه الا انى اتمنى ان ارى ابنه لى تحققه...يمكن اعرف وقتها ماذا كان سيكون مصيرى لو تعلمت بعضا من هز الوسط


نظرا لانى لا اتذكر احلام طفوليه اخرى فانى ساقفز لمرحله ثانوى..كنت اتمنى ان اصبح طبيبه و قد حققت هذا الحلم للاسف و بالتأكيد ارغب فى تغييره


الحلم الخامس هو حلم دائم بالصحه و الستر والنجاح و السعاده...و استطيع القول انى لن اتخلى عن هذا الحلم ابدا و هو يتحقق بنسب متفاوته على مدار الايام




2- اذكر5 احلام على الاقل تخص مستقبلك..


اولا و حتى الف اتمنى ان اصبح اما ...اعشق الاطفال و لااستطيع منع نفسى عنهم...احلم بذلك الطفل الذى اذا بكى بحث عنى و اذا بكيت فلا دواء الا عنده...انا امنه و هو امنى


يجرنى هذا بالضروره للحلم الثانى (و لا اقول كابوس؟؟) فللاسف لا نتكاثر جميعا كالاميبا....انا امزح بالطبع لكن الزواج يبدو مشكله فالناس اما تستخف به تماما و( اهى اى ست و السلام) او تصعبه فلا توجد من تستحق و العكس صحيح طبعا ...لا احلم الا بمن اقدره و يقدرنى فنتقى الله فى بعض..ولسوف احكى لكم عن بعض حوادثى مع العرسان فيما بعد


حلم ثالث...اتمنى ان اغير عملى..مكان عملى اصح ..فمازلت اريد ان اكون طبيبه و لكن فى اى مكان ثانى


رابعا...اريد ان اسافر و ان ارى الدنيا...فسحه يعنى و ليست هجره


خامسا...ربما لم يكن ينبغى له ان يكون الحلم الاخير و لكنى لا استطيع الا الصدق...اريد ان احج و ان يغفر الله لى ذنوبى...قولوا يا رب




3- اذكر شخصين على الاقل متواجدين في حياتك حاليا كنت تود وجودهم قبل الأن بزمن..


لن اقول الا امى رغم انها معى من قبل ان اولد...اما عن الاخريين فالحق انى اقدر وجود الاشخاص معى فى مختلف الاوقات ..فصديقه ثانوى التى لم نكن نفترق قد لاتكون هى من تصلح لان تكون نفس الصديقه الآن ولكنى شاكره لكل من كان بجانبى فى اى وقت من عمرى و لو كان لساعه من نهار




4- اذكر شخصين على الاقل غير متواجدين في حياتك حالياً كنت تود وجودهم الآن أو في حياة اولادك مستقبلاً..


جدتى ..يروون عنها ما يشبه الاساطير..توفت و انا فى الثانيه....مما اسمعه احسب اننا كنا سنتفق كثيرا كما ان عندى رغبه خفيه شريره فى ان اعرف هل ما يقولونه حقيقه ام هو خيال المحبين؟؟؟


فى مستقبل اولادك ؟؟....امممممممممممم....اكيد ابوهم




فعلا تعبت....بس لازم ادبس حد....امرر التاج لموناليزا امه الله و شيماء الصراحه خنقه؟


هناك 25 تعليقًا:

شيمـــــاء يقول...

تانى واحدة بتدبسنى فى التاج ده بعد لعلها خير
اهرب من واحدة الاقى التانية
:)
ماشى يا جميل
يكتب التاج لاجل عويناتكم

Zianour يقول...

مهرة . . انتي جميلة قوي بجد !!
وانا مبسوطة انني تعرفت عليكي .. على فكرة انا كمان كنت من المتفرجيت المتحسرين في حفلات الطفولة اللي صوت صفاء ابو السعود اهم ملامحها!!

المـــفـــــــقــــــــوعـــــة مــرارتـهــا يقول...

انا عملت ذيك كدة كان نفسي اشنرك في حفلة المدرسة ولما اشتركت لان صوتي كان حلو والميس كانت مش عاوزة تاخدني عشان قصنونة لما اشتركت بفضل موهبتي انا اللي ماروحتش تقوليش كانوا مخليني اشترك غصب
لاني عييت طول فترة البروفات بالتهاب الحلق ومااشتركتش

إخوانى حتى النخاع يقول...

السلام عليكم ...


تااااج جميل جدااا
وإجابات جمييييييييلة جداااااااااااا



دى أول زيارة ومدوووونة راااااااااائعة


أخوكى : إخوانى حتى النخاع

mohra يقول...

شيمـــــاء
احنا فى الانتظار يا فندم

Zianour
انت كمان؟؟بكره زياد و نور يشاركوا فى كل الحفلات و يرفعوا راسنا

المفقوعه مرارتها
هو ده الانتقام...برافو عليك

إخوانى حتى النخاع
شكرا جدا و عقبال نتيجتك ما تكون ان شاء الله جميله

تايه في وسط البلد يقول...

انا شاكر ضعف ذاكرتك عن اهدائي مثل هذا التاج
وانا قلت قبلا اني قد اعرف الناس من علاقاتهم من اشياء من حولهم ...واظن ان نظرتي فيك كانت في محلها
لي تعليق بسيط علي الاجابة الخاصة بالسفر وهي اني اشجعك جدا علي السفر للفسحة ومن الافضل ان تكون لبلاد بعيدة وأؤكد لك انك ستملكين زاوية جديدة للنظر للحياة مع كل رحلة

قد يكون هذا صعبا مع طبيعة عملك لكن الامر يستحق صدقيني

دمتي بخير

عايش... ولكن !!!! يقول...

مهره
ولا اخليها حرفوشه
بجد احلام بسيطه... نبيله
بس انا كنت غيرك فى حكاية الحفلات
انا كنت فى فريق المسرح
وشهادات تقدير بقا وكده
ههههههههه
حتى كنا عملنا مسرحيه اخدت المركز الاول ع الاداره
كانت ايام جميله فينها دلوقت
تحياتى
علاء

mohra يقول...

تايه في وسط البلد
شاكر ضعف ذاكرتك...يا ترى اهذا عتاب؟؟اتصدق انى احب ان اعرف اجاباتك عن هذا التاج حقا؟انا اهديه لك و اتمنى لو اجبت عنه...السفر هو امنيه عزيزه تقف اشياء اخرى مع العمل ضد تحقيقها و لكنها دائما بقلبى...شكرا لك كثيرا

عايش ولكن
آه ...انت كنت من الاعداءءءءءءءء...و لسه بتغيظونى...يا بختك يا عم:)

Sou يقول...

عجبتني أوي صفحتك..وعجبتني فكرة التاج ...هو صحيح محدش مررلي التاج بس تقريبا أنا همرره لنفسي D:

موناليزا يقول...

اولا اشكرك جدا على تمرير التاج لى واعذرينى فى الاجابة عليه على الاقل فى الفترة الحالية
ثانيا تعرفى ان انا كمان عايزة اسافر فسحة وليس هجرة (اعتبرى دى احدى الاجابات) ربنا يحقق لك كل احلامك وتروحى تحجى يارب وتدعيلى وانتى هناك لانى كمان عايزة احج (ودى اجابة تانية)
ربنا يهيئلك كل الخير

ibn nasser - ابن ناصر يقول...

تاج لطيف
و
تحياتي

Unknown يقول...

تاجك حلو واجاباتك جميلة

كل الاحترام

غير معرف يقول...

مدونتك حلوة كتيير وإجاباتك علي التاج موفقة ربنا يزيدك

بنكون مسرورين كتير لو بتمري لعدنا وتشرفينا بزيارتك :)

الربان يقول...

تحياتي

اولا ربنا يحقق حلمك...و يرزقك حج البيت الحرام وزيارة المسجد النبوي الشريف..انت و كل من تهفو نفسه اليه.

ثانيا...رزقك الله الزوج الصالح الذي يخاف الله و يتقيه فيك...و يرزقكما الذرية الصالحة ان شاء الله.

بالنسبة للتدريس...بالفعل اتفق مع حضرتك...مهنه صعبة ..و تحتاج لقدرات
خاصة...

اري ان احلامك بسيطة و جميلة و مشروعة
و تعكس نفس آمنه...و شخصية جميله.
ربنا يحقق لك كل احلامك...و يعطيك خيري
الدنيا و الاخرة.

تحياتي و تقديري

.:.-=- ELGaZaLy-=-.:. يقول...

اجباتك جميلة اوى يا مهرة واحلامك بجد


ربنا يكرمك بجد جميلة اوى

mohra يقول...

Heart Whispers
يا خبر و دى تيجى...انا امرر التاج لغايه عندك بنفسى والله

monaliza
ربنا يفرج عنك يا رب...هنكتفى بالاجابات دى بس مؤقتا

ابن ناصر
شكرا لك كثيرا

نهر الحب
كل الاحترام و الحب لك انت

شلة بط
اهلا بالبطابيط الحلوين و اتمنى انكم تكرروا الزياره


الربان
بل التحيات لكل من يمتهن التعليم و يناضل فى بلادنا

-=- ELGaZaLy-=-
شكرا لزيارتك و لكلماتك الرقيقه و اتمنى تكرار الزياره

الدرعمي يقول...

السلام عليكم

حلوة الأحلام دي

وربنا يحقق لك كل اللي تتمنيه

ولو روحتي الحج قبلي

يبقى لازم تدعي لي

ده حلمي

نفسي أحج

ربنا يوفقنا لما يحب ويرضى



تحياتي لصراحتك ومصداقيتك


آدم

المخبر العام يقول...

كل دي أحلام
هنفرض عليها ضرايب قريب

نور الدين (محمد الجيزاوى) يقول...

ارجو ان تحققى كل ما تصبو اليه نفسك
لم استطع قراءة كل ما فى مدونتك لانه مرورى الاول
ولا احسبه الاخير
بالتوفيق
...........
نور الدين محمود

تايه في وسط البلد يقول...

لا فعلا انا شاكر ضعف ذاكرتك عشان انا ما باحبش موضوع التاج ده وبيكون لي ترتيب واولويات باحس انه هيضرب لي كل حاجة
عموما انا شاكر تمريرك التاج لي برغم كل شئ وسأحاول الرد عليه

تحياتي

mohra يقول...

ADAM
ربنا يرزقنا احنا الاثنين يا رب و اكيد لو رحت هادعيلك

المخبر العام
ليه كده يا بيه؟؟هو انا ناقصه؟؟؟

Nour eldin
شكرا لزيارتك و اتمنى تكرارها قريبا

mohra يقول...

تايه في وسط البلد
لا بيضرب و لا حاجه...ده حتى طيب و امير...انا فى انتظاره قريبا ان شاء الله

micheal يقول...

تاج لذيذ جدا يا مهرة وبجد لم أمل من إجاباته البسيطة
أتمني أن أحلامك كلها تتحقق حتي ولو كانت في بنتك بإذن الله مستقبلا
تحياتي

mostafa rayan يقول...

ربنا يحققلك كل احلامك

mohra يقول...

micheal & mostafa rayan
شكرا لكم و ربنا يحقق احلامنا جميعا