انا و البعكوكه و أشياء أخرى

و البعكوكه يا اعزائى هى عربيتى الصغيره (السياره لمحبى اللغه العربيه )و هى عربيه محندقه نص عمر ..لكن ايه... حمارتك العرجاء تغنيك عن سؤال اللئيم و اللؤمه كتير زى ما انتم عارفين..و خد عندك

ازاى مش لاقيه مكان للركن طب ما تعلقيها فى الميداليه

حاسبى و انتى ماشيه لعربيه سريعه تعدى من جنبك تشقلبك

مش كنتى تجيبى هامررررر

وهكذا و هكذا ورغم كل شيئ لا اخفى عليكم حبى لها... يعنى اللى يرشها بالمايه ارشه بالدم و الا بلاش المايه دى عشان بقالى شهر باتحايل على البواب انه يرشها باى حاجه ان شاالله حتى يتف عليها ..لكن لا حياه لمن تنادى

صحيح هى ناقصها القليل جدا جدا من الكماليات ..يعنى تكييف و سمكره و دوكو و بطاريه و موتور جديد ..بس ماشيه زى الفل و الله رغم عدم موافقه البعض على كلامي

الحقيقه انا جبت العربيه دى على كبر ..يعنى تحويشه العمر كله ..و شمس قلبى و ضله

و بمناسبه الفلوس ..احب اسجل هنا دعواتى الحاره على كل اللى طلب العلاوه.. على اللى اداها.. على اللى اخدها ...على اللى رفع سعر البنزين عااااااااااااااا

يلا احكيلكم عن بعض مواقعى مع البعكوكه... من حوالى سنتين كنت لسه جايبه العربيه طازه و كنت وقتها اعمل فى الرعايه المركزه و اخذ نبطشيات24 ساعه و تحتى حوالى 12 ممرضه و معى 2 اطباء من هواه النوم اللذيذ

كان يوم شنيع (كله ضرب ضرب مفيش شتيمه) لم اجلس حتى الساعه الثالثه بعد منتصف الليل (كان زملائى قد ناموا بعد العشاء تقريبا )و كانت الدنيا قد هدأت و لم يبقى الاتحليل لاحد المرضى موعده بعد ساعه

انا قلت افرد ظهرى ساعه و لا حاجه و اكدت على الممرضات انهم يسحبوا التحليل رغم يقنى انهم لن يفعلوا شيئ الا و انا فوق رؤوسهم و بالفعل قمت بعد ساعه و نصف لكن ياللعجب الدنيا هس هس و ظلام دامس الا من انوار الاجهزه احمر و اصفر و الانذارات شغاله تيت تيت تيت ...و لا ممرضه موجوده و لا بيت الاشباح يا اخى

يا فلانه ...يا علانه ...يا زييييييييد .......يا عبيييييييييييد....يا ماما

هو ايه اللى حصل ...كل الغرف فاضيه الا من المرضى...هو انا نمت قد ايه؟

المهم علشان ما اطولش عليكم....وجدتهم اخيرا متكومين على سرير و فى سابع نومه...اصحيهملك يقوموا يقولوا و الله صاحيين يا دكتوره...اكيد انا اللى نايمه.. معلش ....بالمناسبه نبطشيه الممرضات 8 ساعات فقط

كظمت غيظى و انتظرت حتى الصباح حيث انه لا سلطه مباشره لى عليهم فى موضوع الجزائات...المهم فقعتهم الشكوى المتينه و نزلتها للمدير

طبعا تصرفهم هو منتهى الاستهتار و عدم الاحساس بالمسئوليه لكن موضوع الضمير ده متوفى من زمان..اخدوا خصم بسيط لكن ازاى ؟كيف اجرؤ على فعل كهذا؟؟؟و ثانى نبطشيه على طول لقيتهم فرغوا عجل البعكوكه

انا الاول كنت خايفه اكون ظلماهم(عبيطه والله) لكنهم كانوا يتفاخروا باعمال البلطجه هذه امام الآخريين و حتى يومنا هذا..طبيب جديد لم يعاصر هذه الحادثه لكنه سمع عنها وصفها بتحالف قوى الشعب (اللى هو الممرضات )ضد الشيطان الاعظم (اللى هو انا)

و رغم معرفه الجميع تمريض و اطباء و مديرين بما حدث و معرفه الجناه نفر نفر فانه لم يتخذ اى اجراء ..و اللى له ضهر ما يتضربش على بطنه

علاقتى بالممرضات معقده فهم يحبوننى (مش كلهم طبعا) لمعاملتى لهم و لكنهم فى نفس الوقت يأنفون من طاعه فتاه تقاربهم فى العمر و تنشأ مشاعر تشبه الغيره الى حد كبير....اتجنب الاوامر المباشره(و هو حقى ) و الصوت العالى الاحين الضروره...فى الحقيقه لا ينبغى ان تكون هذه مشكله فهذا مكان عمل على كل حال و لا ينبغى ان يتأثر العمل بمشاعرهم تجاهى ..لكن سوء الاداره و ضعف العائد المادى يزيدان المشكله حتى صارت غير قابله للحل...لا اتفرد بمثل هذه المشاكل مع الممرضات يشاركنى كل الاطباء كبارا و صغارا..ذكورا و اناثا..اكثر ما يتعبنى من الممرضات هو استهانتهم بارواح الناس ..ايحدث هذا عن جهل ام عن لا مبالاه؟؟

عامه لن يردعنى هذا من تكرار نفس الفعل..المره السابقه كان العجل tubless وبفضلهم صار عاديا فلو كرروها لن اخسر شيئا .... اش ياخذ الريح من البلاط؟؟؟