الجمعة، 16 مايو 2008

شجار

لم اكن انوى الكتابه الا ان موقف حدث امامى اثار فى افكار و مشاعر متباينه..موقف بسيط يحدث كل يوم.. ابن جارتنا (8 سنوات تقريبا) تشاجر مع ابن البواب (7 سنوات تقريبا)و سبه و ضربه

زوجه البواب اشتكت لجارتنا من ابنها و الولد نفى عن نفسه التهمه و قال بكل صلف "عيب تكذبينى قدام مامتى" ..المشكله انى متأكده انه كاذب..انها خصله رذيله فيه..هل تعرف امه بهذا ..لا اعرف..جارتنا سيده فاضله و متواضعه و لم ترض عن تصرف ابنها لكن لم يأخذ الصبى الصغير حقه,منظره و هو يبكى بحرقه و يقول لقد قال لى "يا ابن ال...." اوجع قلبى و نكدنى

رباه كيف لابن جارتنا ان يقول مثل هذه السبه,المفروض انه (ولد متربى),ترى ايجرؤ ان يقولها لاحد اصدقائه؟؟لا اظن.
البواب عندنا هو البيه البواب حقا..حتى انه كان ينادينى بتدليل اسمى لفتره غير بعيده ,اولاده متعلمين مظهرهم محترم(لم يصدق زمايلى فى المستشفى عندما شافوا الابن الاكبر,كان قد جاء يكشف و هرونى غتاته) و رغم ذلك لم يغنى عنهم شيئا

تؤلمنى الفروق بين البشر..يؤلمنى رؤيتها و يؤلمنى اعترافى بوجودها..و ادعو الله الاأؤذى اى انسان..اترانى لم اجرح احدا من قبل؟يا ليت
يولد البشر و ليس فى نفوسهم ذره من كبر و تمر السنين ولا تعرف ماذا حدث؟؟؟

مع ان كل الخلق من اصل طين
و كلهم بينزلوا مغمضين
بعد الدقايق و الشهور و السنين
تلاقى ناس اشرار و ناس طيبين

عجبى!!!

عجبى كما قال صلاح جاهين,ذكٌرنى هذا بمنظر رأيته في شارع عباس العقاد, طفلتين فى الثالثه..آيتين فى الجمال مصرتان على اللعب معا و مشاركه بعضهم الآيس كريم رغم ان كل ام كانت تجذب بنتها بعيدا عن الاخرى..لماذا؟ببساطه كانت واحده شحاذه و الاخرى سيده راقيه..هل لو كانت الطفلتين تفهمان هذا,اكانوا استمروا فى اللعب؟؟؟؟

اعود و افكر ..ان ما حدث هو نتيجه تدليل زائد لجارتنا لابنها و الحق يتفرد هو بهذا التدليل عن باقى اولادها فهى انجبته بسن كبيره و تخشى الاتظل معه حتى يكبر.. خاصه بعد شفائها من ورم خبيث مؤخراً....على رأى أمى كل الناس غلابه!

هناك 20 تعليقًا:

قلب صغير يقول...

سلامو عليكم
دي طبيعة بشر
لازم يفرقو لاي سبب
ولو مفيش سبب
حيجيبو سبب

د. إيمان مكاوي يقول...

هيه دي الدنيا ...ناس فوق وناس تحت..وهتفضل كده ليوم القيامه...مهما قالوامساواه وعدل...
شكرا على زيارتك وياريت تتكرر..وخاصة إننا دكاتره زي بعض..
ونورتي عالم التدوين

mohra يقول...

قلب صغير
هى فعلا طبيعه بس مؤلمه او يمكن الظلم و القهر هو اللى فعلا مؤلم

ema
اكيد هتتكرر انا لازم اطمٌن عليكى رغم ان شكللك بتدلعى علينا عشان تعرفى معزتك

يا رييييييييت تشاركوا فى الاستطلاع
plllllllllllllzzzzzzzzzzzzzzzz

wael يقول...

المصيبه ان الحاجات دي الواحد اصلا مابقاش يقف قدامها
ياترى عشان هو مليان كبر ولا عشان مابقاش يحس ولا ياترى عشان مابقتش فارقه ولا عشان ده هو الطبيعي ولا ايه بالظبط ؟
النحصله ان الواحد بردو مابقاش يقف قدام اي حدث بهذا المنظر
تحياتي

ibn nasser - ابن ناصر يقول...

موضوع جميل قوي
جه علي الجرح ..فعلا ده اكثر شيء بيؤلمني
وحصل قدامي لواحده اتخانقت واتنرفزت علي البواب عشان طرطش عليها ميه وقعدت تزعقلو تزعقلو وفي الاخر ندهتو
ادتو عشرة جنيه !
يعني الفلوس هتخليه صافي !!
تحياتي تدوينة جميله

موناليزا يقول...

سبحان الله فكرتينى بموقف مماثل لما كنت مدرسة واغلبية اولياء الامور كبار فى السن جدا والابناء مازالوا فى الروضة وطبعا تدليل ايه بقى على اعلى مستوى ولو حبيبت اوجه ولى الامر يجيبلى التاريخ من اوله وانه جاله على كبر ومش مهم تصرف ولاده مع المدرسين او حتى زمايلة
وفى موقف تانى نتيجة التدليل الزائد وما يسمعه فى البيت طبعا كان ولد فى تانية حضانة وكان شقى جدا ومابيسمعش الكلام وفى نفس الوقت اهله اغنياء جدا ولما قل أدبه مرة على المدرسة نهرته فرد عليها قائلا انتى شغالة بفلوسى!!!
الموضوع كبير وماينفعش بوست واحد
ولكنى اشكرك فقد اثارتى نقطة هامة
بالتوفيق دائما

mohra يقول...

wael
يمكن مجرد قله ملاحظه..الحياه مليانه هموم و كل واحد مشغول بهمه

ابن ناصر
الفقر اكيد هيخليه يفرح بالفلوس لكن قلبه هيصفى ؟..لا اظن

monaliza
معاك حق..المال بيغٌير نظره الناس لحاجات كتير

كوارث يقول...

اهلا يا مهرة
سعيد بزيارتك
وجامد الحوار ده
كلامك جميل جدًا طبعًا وهيعجب اي واحد بيتكلم في حقوق الانسان
مفس الفكرة اللي بيقوم الدين الاسلامي عليها المساواة ولا فرق بين عربي على اعجمي الا بالتقوى ولو أن فاطمة بنت محمد سرقت لقطعت يدها
جميل أدبك وكلامك واحساسك
ويا رب الناس تتخلص من الكبر
لانه سبب كل البلاوى
سبب الخناقات والحروب وقلة الادب و الجريمة
ان شخص بيفكر انه احسن من شخص او احق منه بشيء معين
بهنيكي على الموضوع

bastokka طهقانة يقول...

في رايي ان الامهات تفسد ابنائها بفرط التدليل و تعتبر ابنها ابن بارم ديله و فلته زمانه و الصادق الاوحد بين اقرانه
و هذا يزرع في عقل الطفل انه على حق دائما و لا يفيق الا عندما تسكعة الدنيا اول قفا ساعتها يفوق و يعرف ان لا فرق لعربي على اعجمي الا بالتقوى
عجبتني فكرة البوست
ربنا يخليكي للغلابة و كلنا غلابة كما قالت الست الوالدة
اوروفوار

mohra يقول...

كوارث و طهقانه
معكم حق.. لو عرفنا ديننا حقا لما تصرفنا هكذا..و فعلا الدنيا هى اللى تعلم المتبلم

Zianour يقول...

اهلا يا مهرة.. وانا سعيدة بزيارتك وكمان بالاثار الاسلامية اللي حطاهم اصلي مجنونة اثار وتاريخ ...
بالنسبة للموضوع باقول اقرأي كتاب د. جلال امين ماذا حدث للمصريين هتفهمي الانغلاق اللي اصبحنا فيه (ب 15 جنيه) وخسارة ان الاطفال كمان بنحطهم في جيتو من صغرهم على فكرة الانفتاح على الاخر اللي هو جارنا البواب او الي من غير دينا او اللي من غير جنسيتنا .. الخ دي ثقافة وتربية واسلوب حياة
وانا حريصة ان اولادي ينظروا بعين محايدة لجميع الاطفال ده ثراء ليهم وعمرنا ما قلنا ابن بواب ولا وحش ولا كلام من ده المعيار الوحيد ان اللي بيقول كلام وحش لا اقلده...
المهم بقى ان البداية بتاعتك واضح انها واعدة وانتي بقى دكتورة ف ايه عشان - زي ايما- ناوية استغلكوا باستشارات مجانية!!!!
بالنسبة للاستطلاع انا من دعاة ان اقرأ في كل حاجة واي حاجة لان الانغلاق -برضه- في نوع واحد فقط من اقراءات نوع اخر من الجيتو الفردي
تحياتي
زيانور

الربان يقول...

تحياتي

الاصل ان الناس سواسية كأسنان المشط

و كلكم لادم و ىدم من تراب

ولا فرق بين عربي و اعجمي الا بالتقوي

لكن يا اختي الفاضلة النفس دائما أمارة بالسوء الا من رحم ربي...
و في رأيي ، ان هذا الصبي لم ينل قسط وافر من التربية...وا هناك قصورا او خللا ما...

تأكدي من ان البر لا يبلي و الذنب لا ينسي و الديان لا يموت...افعل ما شئت
كما تدين تدان...

يعني سيأتي اليوم الذي يكون فيه الصبي
قد اصبح شابا يافعا...و سيجد من يسبه
و يسخر منه كما فعل هو...و حينها سيعلم كم هو قاسي علي النفس ان تُعير بما ليس عار...

تحياتي و تقديري

Hosam Yahia حسام يحيى يقول...

مدونه جميله

اول زياره وساكررها ان شاء الله

mostafa rayan يقول...

انا متفق مع رأي مامتك كل الناس غلابة

mostafa rayan يقول...

انا قرأت قصتك عند برايد بصرف النظر عن الموقف نفسه إلآ انك بتكتبي حلو
تحياتي ليكي

mohra يقول...

Zianour
كده بقينا اورطه مجانين..ادخلى على لينك رنك هتعجبك جدا..انا هشارك فى الاستطلاع بدالك المره دي بس ..دلع كده

الربان
اوافقك تماما..شكرا لزيارتك و اتمنى تكرارها

حسام يحى
شكرا جدا جدا يا حسام

mostafarayan
لسه سامعه حوار بين صديقتين,واحده فيهم هاجت و ماجت لما الثانيه قالت احنا غلابه...الكلمه عند اغلب الناس مرادف للسباب او بمعنى اصح الناس بتستكبر تعترف بضعفها
شكرا لتشجيعك..اللى قدرته اكتر لما قريت لك

Darsh يقول...

مهرا

لو كل واحد فكر انه لما هيدخل القبر هيبقى جثة "ينخر في أحشائها الدود " زي الجثة بتاعة الشحات في القبر اللي جنبه زي جثة ابن رجل الأعمال اللي في القبر اللي جنبه ما اعتقدش هيعمل فرق في الدنيا بينه و بين اي حد

بس للأسف كام واحد بيفكروا كده

كام واحد بيفكر ان قدام ربنا هيقف "عاريا" من غير بدلة و لا كرافت جنب ابن الوزير جنب ابن الغفير جنب الأحمر و الأصفر و الأبيض و الأسود مفيش فرق بينهم غير العمل الصالح

كام واحد بيفكر كده ؟؟؟؟

في النهاية ... احنا بشر زي بعدينا .... اتولدنا من طين و هنبقى طين ... و على الرغم من كده لو طين غطا واحد مننا بنقرف منه ....

كلام على بلاطة يقول...

دونة جميلة واسلوب رائع
واسم كلا سيكى يفكرنا بنجيب محفوظ
تحياتى

قلب صغير يقول...

ازيك يامهرا
انا غيرت الاغنيه
وصرفت نظر عن "انجليش "
يارب اللي موجوده دلوقتي تعجبك

mohra يقول...

Darsh
معاك حق و الله يا درش بس هو فيه كم واحد بيفكر من اساسه ؟؟

كلام على بلاطة
شكرا جدا جدا و اتمنى انك تكرر الزياره

قلب صغير
حد يقدر يفتح بقه على فيروز؟؟اختيار جميل يا هبه