الاثنين، 4 يناير 2010

نظريه المؤامره

اتعرض لمحاوله اغتيال

حقا يا رفاق ...هناك من يحاول قتلى

و للاسف الشديد انا اعرف من هو و ينفطر قلبى لذلك

انها بعكوكتى الحبيبه...بعد كل هذه العشره

لا اعرف لماذا تفعل هذا

قد تحسبون انى قد جننت اخيرا و ان نظريه المؤامره تسيطر علي و لكنها الحقيقه التى لم اعد استطيع تجاهلها

و الالعن انى لا استطيع الاستغناء عنها ..انى فى مأزق حقيقى

و لكن لاحكى لكم اولا مشوار العذاب مع البعكوكه

بدأت المؤامره منذ عده شهور عندما لاحظت ان الفرامل صارت غريبه و تصدر اصواتا عجيبه طاخ طاخ طاخ
وعلى الرغم من مشاغلى ( انا فرى بيزى وومن) اخذتها على عجل (بعد حوالى شهر) للطبيب الذى قرر ان الفرامل بتاكل فى الطنبوره ؟(يالهوى الطمبوره باظت...انا معرفش هى ايه بس شكلها حاجه جامده) و هكذا يعنى نجيب طمبور ه تانيه ؟؟

طمبوره ايه يا مدام احنا هنغير التيل

تيل؟؟؟ماشى ...تلى هذا تغيير زيت الفرامل و الذى كنت اسمع عنه لاول مره

بعد هذا بدأت البعكوكه فى اصدار صوت مختلف تماما طراخ طراخ طراخ...الامر الذى اعتبرته تهريجا فانا مش فاضيه مما اغضب البعكوكه تماما و استمرت فى عصيانها مع تطوير الامر الى هزات و رجات تطورت فى النهايه الى ان الدريكسيون بدأ فى العمل على مزاجه بمعنى انه يحود فى الناحيه اللى تعجبه و هكذا شعرت بتهديد فعلى لحياتى و ببعض الاحساس بالذنب (يعنى عشان سبتها تعبانه شهر شهرين كمان ) فقررت ان اعوض البعكوكه و اجعلها عروسه ( وبالمره اعمل هدنه و امن على حياتى )

وهكذا فقد قرر الميكانيكى وضع قطعه كاوتش لعلاج مشى العجله على حل شعرها (قال يعنى هى دى المشكله ) كما غيرنا قواعد الفتيس و زيت الفتيس والعجل و طقم كهرباء وركبت مساحات و مرايات جانبيه و غسلت الموتورو وغيرت الزيت و غسلت الردياتير و شربته ميا ه خضراء ( و انا اللى بشرب مياه من الحنفيه ) و بعد كل ده ما طمرش فيها


بعد فوم الغسيل بتاع الموتور و الرادياتير الهانم رفضت الحركه و بعد مشوار لا بأس به فى عز الشمس اتحركت و ادعى الكهربائى انها كانت مبلوله و لكنى اؤكد لكم انها فقط لم تعتاد النظافه


هنا قد يتسائل البعض ..امال هى كانت ماشيه ازاى اساسا ...ارد و اقولك العنايه الالهيه و له فى خلقه شئون

المهم بعد هذا العذاب و الجهد و نزيف المال والكرامه توقعت ان يطمر فى البعكوكه و تمشى زى الالف

قوم ايه ..نازله الصبح متأخره على الشغل كالعاده و بافطر فى البعكوكه و سايقه على الرابع و باقول يا رب اوصل فى المعاد أقوم الاقيللك الكبوت فتح عليا و واقف على حيله و الدنيا ضلمت و مابقاتش شايفه حاجه ...كل ده و انا سايقه باقصى سرعه و السندوتش قى ايدى...طبعا انا قلبى وقف و مش عارفه ازاى عديت ...طبعا وصلت المستشفى و انا رجلى زى المكرونه المسلوقه و احاول افتح الكبوت تانى ....ابدا علق و فضل قافل

الا يؤكد هذا شكوكى..اليست هذه محاوله قتل مع سبق الاصرار و الترصد ؟؟؟

فى نفس ذات اليوم ليلا و انا ماشيه فى امان الله و بعد اقل من 10 دقائق سمعت الاصوات المعهوده كررطاخ كررطاخ مع تصاعد الدخان الكثيف و ارتفاع الحراره و اقف لاجد كل الماء الاخضر الذى دفعت فيه دم قلبى سايح فى الارض و لم يبقى منه سم واحد فى الهبابه (البعكوكه سابقا)

المهم اصابتنى حاله هستيريه و تيقنت انها تحاول قتلى و يا بنتى طب نوديها للكهربائى ..لأ ...طب تحت البيت ...لأ....استحاله اركبها تانى


عااااااااااااااااااااااااااااااااااااااااااااااااا

هناك 25 تعليقًا:

موناليزا يقول...

أكيد العيب من المياه الخضرا
إلا إيه هى المياة الخضرا دى صحيح؟

الكلمة نور يقول...

على سوق العاشر من غير ما تفكرى

Unknown يقول...

أنا رأيي لو صرفتي كل هالصرف على وحده جديده كان أوفر!!

ديري بالك على حالك المؤامره من أقرب الناس شكلو:)

وصح شو هي المية الخضرا؟

north flower يقول...

لو كنتى اشتريتى عربيه جديده كا اوفرلك

ده كله بسبب الميه الخضرا
لو كنتى حطيتى ميه من الحنفيه كان طمر فيها

خلى بالك من نفسك

Zianour يقول...

انا شايفة المؤامرة اعمق من كده

انا رأيي انها متفقة مع الميكانيكي

:))

لذلك غيري الميكانيكي

واحرميها نمن الميه الصفرا اقصد الميه الخضرا دي

ربنا يسترها معانا معاكي


:))

لاسع افندى يقول...

من لم يمت بالبعكوكه مات بالميكروباس
او اخد انفلونزا فى المترو
تعددت الاسباب والمؤامره واحده



تحيه لاسعه

dr/shiko يقول...

ههههههههههههههههههههههههه هههههههههههههههههههههههههه

تايه في وسط البلد يقول...

هو الموضوع مش مؤامرة فيما اري

الموضوع وصل لاستحالة العشرة لدرجة ان كل اللي اتعمل لها مش طيب خاطرها

انا باقول كفاية كدة والأحسن انه زي ما دخلنا بالمعروف نخرج بالمعروف!!

mohra يقول...

موناليزا
تفتكرى؟؟؟انا برضه بقول انها اتمرعت من الدلع
يا ستى الميه الخضرا دى ميه ضد الصدا ...كان مله الصدا ماكانت ماشيه بيه زى الالف



الكلمة نور
لأ لسه ما تهونش عليا...و بعدين اعمل ايه من غير البعكوكه؟؟؟


مياسي
يا ريت ...العربيات بقيت اسعارها نار..و انا فى خحيم البعكوكه حتى اشعار اخر
الميه الخضرا بتاعت الصدا ...الجركن ب25 جنيه عاااااااا




north flower
فعلا ...الدلع خلاها تتملعن عليا



Zianour
مممممممممممممم
مافكرتش انا فى الميكانيكى
تصدقى احتمال وارد برضه





لاسع افندى
يعنى خلاص "مافيش فايده"
على رأى سعد زغلول



dr/shiko
كده برضه...مافيش تعاطف خالص



تايه في وسط البلد
لألألألأ...كله الا ابغض الحلال
انا برضه لسه باقيه على العشره
وبعدين اخرج فين ..انا اتزنقت خلاص

micheal يقول...

هههههههههههههه..رغم أن البوست يحكي عن مأساة بعكوكية إلا أني مقدرتش أمنع نفسي من الضوحك
يا مهرة المهم سلامتك أنتي
:)
تحياتي

Tears يقول...

فعلا واضح ان عمرها الافتراضى انتهى

mostafa rayan يقول...

ولكن ألست معي ان بعكوكتك العارجه تغنيكي عن تاكسي أو ميكروباص اللئيم ؟
تحياتى لك يا مهرة ودمت بكل الخير

لبنــــــــــى يقول...

هاي مش مواصفات سيارة
او بعكورة
لا هاي اف16
يعني لو اشتريتي سيارة جديدة كنتي وفرتي اكتر :)
سلامة قلبك من الاغتيال بس هي بتدلع عليكي

زمرده يقول...

سلامتك
ان شاء الله تتصلح وتعقل
وان ماعقلت الله يعوضك ببعكوكه افضل منها
يااااااارب

حصان المرجيحة يقول...

زمان قالولي :
العربية تتركب ماتتصلحش
انا مجرب كل اللي انتي قلتيه و ماببقاش طايق نفسي هههههههه
تقبلي مروري

مهرة سالم يقول...

السلام عليكم..
لا دي مؤامره على تقيييل كمان ....
الحمدلله على سلامتك ..

نور الدين (محمد الجيزاوى) يقول...

ههههههههه اصلح الله بعكوكتك
ونصرك على مؤآمراتها بفتح مجيد بان تتخلصى منهاا بخير منها
تحياتى العميقة

rovy يقول...

ايه ده أنا قرأت التدوينه دى قبل كده و ربما أكثر من مره ..
أزاى ما علقتش عليها ؟!!
بجد غريبه أكيد حصل حاجه قومتنى قبل ما أعلق .. معلش سامحينى بجد تأخير غير مقصود و الدليل أنك وحشتينى و كنت جايه أسلم عليكى ..
طبعا ألف سلامه عليكى من مقالب البعكوكه .. بس بجد حاولى تبعيها و تدفعى الفلوس مقدم عربيه جديده و تقسطى الباقى لو فى ميزانيتك ما يسمح بكده ..ده الحل الأمثل العربيه الجديده فلوسها حلال ده رأيي بجد أن أى عربيه قديمه بنصرف عليها أكثر من ألى كنا حندفعه فى الجديده اللى حتريحنا ..
ربنا ييسر لك الأحوال ..و أبقى أحكى لنا وصلتى لأيه مع بعكوكتك :))

تحياتى لكى أختى الغاليه

mohra يقول...

micheal
ما نت عارف شر البليه ما يضحك


Tears
فعلا للاسف


mostafa rayan
فينك يا درش من زمان
و الله هى مابقتش بتغنينى قوى



jafra
بعكوكه مش بعكوره
بس f16
اسم مناسب جدا


زمرده
يسمع من بقك ربنا



حصان المرجيحة
زياره عزيزه ايها الزميل



نهــــــــــار
مش بقولكم مؤامره
الله يسلمك يا جميل



نور الدين
آآآآآآآآآآميييييييييييييين


rovy

و لا يهمك يا روفى
انا نفسى و الله لكن العين بصيره و الايد قصيره

NeVeN يقول...

واضح اوى ان بعكوكة اتمردت
بصت لقيت نفسها احلوت ونضفت

ادبا ليها بقا متتنضفش تانى
ههههههههههههه

ربنا يكفيكى شرها

تحياتى يا قمراية
neven

!!! عارفة ... مش عارف ليه يقول...

واضح انها مش متعودة

على الدلع ده كده

شوفي لك حل تاني

أحسن ما ترفع عليكي قضية خلع :)

وليد

تايه في وسط البلد يقول...

ياااااااااااااااااااااااااا مسهل

مشروع جديد ناجح يقول...

قريت مدونتك بالصدفة من غير اى دعوة
لما قريتها بعناية عجبتنى وشدتنى الى الواقع اللى احنا فيه

حبيت ابلغك تحياتى واعجباى بمدونتك

كلام على بلاطة يقول...

يارب اجعل ايامنا اعياد والكل يفرح ونعيد/
ونعيش فى سلام وامان وبالتوفيق نتأيد..../
ونعلو ونسمو ونملك ارادتنا بانفسناونتسيد/
ولا يتحكم فينا كأننا من كان لاعبد ولا سيد/
وعن الشر نبعد بعيد ونكون بالخلق الجيد/
ونغفر ونسامح ولا نكون بالطبع الكيد..../
وبالاخلاق والمثل والقيم نتمسك ونتقيد/
ونقيم جسور الحب مع البشر نبنى ونشيد/

عروستى يقول...

مجهود رائع منك