الخميس، 26 نوفمبر، 2009

المصائر


كيف الحال؟

عاملين ايه فى وسط الحرب الضروس و المعمعه ديه؟

حرب غريبه اقتحمت حياتنا ..لم تدع لاحد فرصه للفرار منها

يعنى مثلا مواطنه عاديه مثلى تفتح اللاب توب فلا تجد على النت الا تدوينات و اخبار المباره و المعركه و "مصرفوق الجميع"

الجرائد ليس فيها الا "مصر فوق الجميع"

اترك هذا و افتح التلفزيون لاشاهد الاخبار فلا اجد الا " مصر فوق الجميع"

اغير القناه لعلى اتابع مهرجان السينما فلا اجد الا شهادات الاخوه المشجعين الفنانين و المناضله المصريه فردوس عبد الحميد و" مصر فوق الجميع"

ومثل اى ربه منزل عاديه احول على احدى برامج الطهى فلا اجد الا مكالمات المشاهدات المتشنجات و المتشحتفات و "مصر فوق الجميع"

اخر ملجأ قناه الافلام لاجد نصف الشاشه مغطاه " بمصر فوق الجميع "

يا الله ما الذى حدث لكل هذا

اجتمع مع الناس فلا اسمع الا هراء و تشنجات

و الجزائر كانت باعته الجيش ...لا لا باعته المساجين و المسجلين خطر...واحد تانى متحذلق يقول باعته الحيطست

كيف يصدق الناس هذا الهراء و كيف يقولونه بكل هذا الايمان

و الالعن ان علاء و جمال مبارك صاروا من الأبطال الشعبين....كيف يصير الناس بهذا التغييب

علاء مبارك ذلك الذى سكت دهرا و نطق كفرا...كيف يحرض الناس بهذا الشكل و بهذا الاسلوب ؟حتى فى اكثر الدول ديمقراطيه تُفرض بعض القيود على اقارب الرئيس فوضعهم ليس مثل الاخرين...ما يحزن حقا اننا نسينا مشاكلنا و الفساد و التوريث و هللنا للأخين كأنهم فتحوا عكا

توحد الناس على النواح و الصراخ و السباب و الجزائرين قالوا و اعادوا

الم ينظر احد لنفسه ماذا يفعل؟ الا نفعل المثل بالضبط..الم يتحد الجميع على سبابهم باقذع الالفاظ بدء من اجهل المواطنين الى اكبر المثقفين و المسئولين (حتى اليوم..هل قرأتم ما كتبه يوسف زيدان)

يا قوم اليس فيكم رجل رشيد

نغضب لأنهم قالوا اصحاب الاسرائلين كأن شيمون بيريز لم يكن فى القاهره فى الامس القريب

حطموا ممتلكات المصريين بالجزائر كأننا لم نهاجم سفارتهم بالقاهره و نحطم محال المصريين المجاوره لها

المصريون خائفين على رعاياهم بالجزائر كأننا لم نبيع اللاعب الجزائرىو نستغنى عن خدماته

سبونا كأننا لم نسبهم( فى احد المرات النادره التى استطعت متابعه أحد برامج الكراهيه سمعت المذيعه المهذبه تسمى واحد اسمه روروه بهوهوه)

حطموا اتوبيساتنا كأننا لم نحطم اتوبيس اللاعبين بالقاهره و ندعى انهم عوروا نفسهم

اما السبب الرئيسى ضربونا و عورونا و فتحوا راسنا...طب يا مؤمنين حد شاف واحد متعور.. مقتول..متخربش... مضروب بعصايه الستيك حتى

كلها حالات فرديه و بسيطه..... شغب مشجعين كوره حدث و يحدث و سيحدث و نراه فى مباريات مزارع دينا و بترول اسيوط عندنا...عادى يعنى...و لو جمهور الدرجه الثالثه هو الذى سافركانت بقت معجنه

اعلامنا الاهوج الذى لم يكف عن التهييج و السباب و الجزائرين كذا و كذا و بالمره نشتم فى السودانين الغلابه اللى ماعملوش حاجه غير انهم شجعونا رغم انهم لم يروا منا الا كل شر...لم تبدأ المشكله اليوم او بعد المباره انما من قبلها بكثير عندما لم يعد هناك حديث الا عن المباره و كأنها نهايه المصير ..عندما شجعت الحكومه هذا التوجه لتلهى الناس عن مشاكلها الفعليه ..لتشعر بالكرامه (الشعور المهدر فى مجتمعنا و الذى ينبغى ان يشعر به كل انسان ) فى اشياء هى ابعد ما تكون عن الكرامه الفعليه..يعنى مسكنات ليس الا

نفس ما نفعله دوما من خداع الذات ..الم يرى احد كيف لعب المنتخب ( او بمعنى اصح كيف لم يلعب ) اللاعبين متسمرين فى اماكنهم.. لم يحاولوا حتى ..لو كنا نلعب امام فريق اخر لهزمنا 5\0 على الاقل

الاعجب انهم سيعطوا اللاعبين مكافأت و تخرج الجرائد بمانشتات مثل "شكرا ..فعلتوا ما عليكم" امال لو ماعمملوش كان ايه اللى حصل ....فريق عجوزو معوق و يحتاج للكثير و الكثير

ما نهايه كل هذا ؟ ايريدوا للمباره ان تعاد؟سبحان الله... لكى نهزم من جديد

ام لعلهم يريدوا ان نعلن الحرب على الجزائرو نحتلها أو تحتلنا ...مش فارقه بقه ...المهم هيكون لينا فريق فى كاس العالم و نرجع نهيص و نهلل من تانى و نسميه "المصائر" أو "جزر" ...ايه رأيكوا؟؟؟؟؟؟

هناك 17 تعليقًا:

موناليزا يقول...

بغض النظر عن اللى حصل
بس فعلا الموضوع اخد اكبر من حجمه وكأننا جميعا لا ننتبه إلا كونها فتنة
----
كل سنة وانتِ طيبة
وعيد سعيد علينا جميعا

ola يقول...

يا خرااااااابي
أحمدك يارب
والله بقيت أفرح لما بلاقي حد بيفهم كدة
ماشية ألمهم من النت :)
الله يفتح عليكي

micheal يقول...

وهو لو فيه راجل رشيد كان جرى ربع كده
:)
الحكاية أن نظامين فاسدين أرادا إلهاء شعبين بواسطة إعلام موجه يقوده حفنة من المرتزقة
كل سنة وانتي طيبة
تحياتي

تايه في وسط البلد يقول...

السلام عليكم ورحمة الله

كل سنة وانت طيبة

تفسير المصائر او جزر ده مش فهمته الا قبل التعليق مباشرة!!!

وانا من هنا لابد ان اعلن يقيني ان من سار ورائهم (نقبه هيطلع علي شونة) ولا فيه اي اجراء من اي نوع

تحياتي واحترامي

Zianour يقول...

بوست معجون بالمرارة والسخط

عندك حق...

والناس دي لعبة في ايدي القادة

شىء مذهل بجد...

يلا معلش .. مينفعش غير معلش مفيش حل تاني:))

كل سنة وانتي اسعد

قبلاتي

snohe يقول...

كل سنه وانتى طيبه يا مهرة

عندك حق --فعلا الاعلام بيحاول يوجه الرأى العام بعيدا عن المشاكل الحقيقيه التى لا يستطيعون حلها فى المدى القصير

لكن شكلنا سىء جدا واحنا شايفين ناس المفروض انهم رموز ثقافه ورياضه وفن
منساقين وسط القطيع


معلش
انا عايز اقول كل سنه وانتى طيبه

mohra يقول...

موناليزا
الحمد لله الدنيا هديت شويه و الناس ابتدت تعقل


ola
الله يخليكى يا علا..انا الاول كنت حاسه ان انا الغريبه الوحيده فى البلد بس الحمد لله لقيت ناس تانيه و الباقيين حتى بيتهيألى عقلوا شويه



micheal
عجبتنى مرتزقه دى ..انا كنت مسمياهم الغوعاء




تايه في وسط البلد
ليه مافهمتش؟؟؟دى سهه خالص..ده حل وسط

انا معاك ان مش هيحصل اى حاجه لكن مازلت لا ارى الموضوع مبيتا من الجانب الجزائرى
و الخلاف فى الرأى لا يفسد للود قضيه




Zianour
مش عارفه حسيتى بالسعار اللى كان هنا فى الغربه بنفس الحجم البشع و لا لأ؟؟
بس سيبك ..كل سنه و انتى طيبه



snohe
الاول كل سنه و انت طيب
ثانيا انا فعلا ضايقنى انى الاقى ناس مثقفه و مفكره بتفكر بنفس الطريقه للاسف

Zianour يقول...

مهرة الجميلة

انتي ليه فاكرة انني في غربة؟؟؟

يا بنتي انا معاكوا قلبا وقالبا

وشفت كل حاجة بعد الماتش والفديوهات وعمرو اديب والناس الفلة في المحور والحياة وفيديوهات محمد فؤاد والاخت فردوس عبد الحميد ومداخلات علاء وخلافه

غير بقى انني هنا محاطة بالمغاربة والجزائريين والعرب من كل صنف ولون


وكمان كل العرب هنا تابعوا اللي حصل

احنا معاكوا في مصر في كل حااااااجة

:))
بس مهزلة والله

وللامانة الجزائريين فعلا فيهم عنف وشدة وتصلب غير عاديين

على فكرة انا لي صديقة عزيزة علي جدا جدا جزائرية ...

دلوقتي انا هديت وباضحك من كتر الغيظ من التردي اللي وصلنا له على جميع المستويات

ايه الدبلوماسين المعوقين دول

هو الفساد وصل للدرجة دي ؟؟؟

مكنتش متخيلة التخبط والتهريج ده

يلا...

ولايهمك

كله بيروح في الغسيل

المهم ...

كل سنة وانتي طيبة
:)))

ياسمين يقول...

عندك حق يا مهره

هما فعلا بيدوروا على اى حاجه

يعملوا بيها زيطه و هلليله عشان

يلهونا عن الفساد اللى احنا عايشيين

فيه

فاكره لما العباره غرقت و كانت الناس

كلها ثايره و معرفش ايه جم بعدها

على طوول قالولك انفلونزا الخنازير

و عملوا هليله و الناس اتلهت و

نسيت موضوع العباره ده خالص

الحكومه دى مبتعملش حاجه غير انها تدور

على حاجه تلهى الشعب فيها

و احنا غلابه بنهرب من الواقع و

ماشيين وراهم

زمرده يقول...

فتنه وللاسف وقع فيها كثير
الله يهدي ويصلح
ومؤلم انه يوم الاساءة لرسولنا وحبيبنا محمد "صلى الله عليه وسلم"ماحصلت كل هذه الضجه الاعلاميه
وايام حصار غزه مافتحت الجسور الجويه
تصرف مايدل الا على ان الحكومتين تلعب بشعوبها


ومع انها متأخره بس كل عام وانتي بخير

Zianour يقول...

ya rab tkony b5ir w kol sana wi inty ass3d
bossssssat ktiiiiiira

نهــــــــــار يقول...

السلام عليكم...
وحشتيني يا مهره جدا ..
وحبيت اعدي اسلم..
...
أن شاء الله تكوني بخير حال ..
في امان الله

rovy يقول...

السلام عليكم .ز
أزيك يادكتوره وحشانى جداا ..
الموضوع ده بيحرق دمى من أوله من أول اللى جرى للمصريين فى السودان من الهمج اللى كانوا هناك و من التوابع بعد كده و بمنتهى الصراحة حسيت انى تايهه و كل ما الوقت بيفوت بأحاول اهدأ و افكر ..اما و الأول كنت كارهه الجزائر اسما و شعبا و بعدين لقيت انه ما ينفعش نحكم على كل الجزائرين و أن أكيد فيه ناس محترمه فى كل بلد فى الدنيا ما بالك ببلد عربى بيننا و بينهم كفاح مشترك .. و بدأت أدين الحكومه الجزائريه اللى تركت جريده كاذبه تشيع اشاعه تشعل بها الفتنه و تمادت فى اجرامها و ارسلت مجرمين محترفين ليرهبوا المصرين و صدقينى انا ليلتها تابعت الموضوع طول الليل و كان فعلا حاجه مؤسفه جداا و لكن ده ما يمنعش انى بأحمل المسؤلين عندنا اخطاء كثير أهمها انهم فشلوا فى ادارة الأزمه من أولها لأخرها و حتى الأن .. أدعوا الله ان ينير بصيرتنا جميعا ياارب ..

كل سنه و أنتى طيبه و بخير دايما ياارب

تحياتى

NasEr يقول...

من يوم الزفت المباراة وأنا بستنى حدا يحكي هالحكي، بس 99% من الأخبار والتدوينات تصب في اتجاه الجهل والتخلف
أشكرك

mohra يقول...

Zianour
ازيك..كل سنه و انتى طيبه
اخبارك ايه؟
جميل انك لسه عايشه بينا و متابعه الدنيا عندنا اخبارها ايه..انا نفسى باتوه فى الزحمه اللى عندنا


ياسمين
معاك حق يا ياسمين
وكل يوم و التانى هليله جديده



زمرده
للاسف با زمرده الضجه نادرا ما تكون عفويه دايما فى تحريض اعلامى و حكومى و الناس ديه عمرها ما تهتم بغزه او غيرها بالعكس تحاول تثير اى مشكله عشان الناس تنسى و تهدا



نهــــــــــار
ازيك ...كيف الحال؟؟
انا بخير و الحمد لله
كل سنه و انت طيبه و بخير


rovy
جميل انك هديتى بعد كده و صدقينى الموضوع لم يكن يستحق الغضب اصلا و يحدث دوما فى مباريات الكره و لكننا دوما بغيدين عن هذا المجال
منهم لله المحرضين من الجهتين



NasEr
شكرا لك انت على مرورك

حصان المرجيحة يقول...

علي فكرة يمكن احنا كده
بنحب نتلم علي اي حاجة
مش مهم هي ايه
حتي لو حاجة تافهة برضو بنحب نتلم
اصل احنا زي م بيقولو عاتشفيين اوي
هههههه
شكرا علي الموضوع

غير معرف يقول...

الحمد لله
مازال هناك بعض العقلاء


السيدة العجوز