الجمعة، 23 مايو 2008

انا و البعكوكه و أشياء أخرى

و البعكوكه يا اعزائى هى عربيتى الصغيره (السياره لمحبى اللغه العربيه )و هى عربيه محندقه نص عمر ..لكن ايه... حمارتك العرجاء تغنيك عن سؤال اللئيم و اللؤمه كتير زى ما انتم عارفين..و خد عندك
ازاى مش لاقيه مكان للركن طب ما تعلقيها فى الميداليه

حاسبى و انتى ماشيه لعربيه سريعه تعدى من جنبك تشقلبك

مش كنتى تجيبى هامررررر


وهكذا و هكذا ورغم كل شيئ لا اخفى عليكم حبى لها... يعنى اللى يرشها بالمايه ارشه بالدم و الا بلاش المايه دى عشان بقالى شهر باتحايل على البواب انه يرشها باى حاجه ان شاالله حتى يتف عليها ..لكن لا حياه لمن تنادى

صحيح هى ناقصها القليل جدا جدا من الكماليات ..يعنى تكييف و سمكره و دوكو و بطاريه و موتور جديد ..بس ماشيه زى الفل و الله رغم عدم موافقه البعض على كلامي

الحقيقه انا جبت العربيه دى على كبر ..يعنى تحويشه العمر كله ..و شمس قلبى و ضله
و بمناسبه الفلوس ..احب اسجل هنا دعواتى الحاره على كل اللى طلب العلاوه.. على اللى اداها.. على اللى اخدها ...على اللى رفع سعر البنزين عااااااااااااااا

يلا احكيلكم عن بعض مواقعى مع البعكوكه... من حوالى سنتين كنت لسه جايبه العربيه طازه و كنت وقتها اعمل فى الرعايه المركزه و اخذ نبطشيات24 ساعه و تحتى حوالى 12 ممرضه و معى 2 اطباء من هواه النوم اللذيذ

كان يوم شنيع (كله ضرب ضرب مفيش شتيمه) لم اجلس حتى الساعه الثالثه بعد منتصف الليل (كان زملائى قد ناموا بعد العشاء تقريبا )و كانت الدنيا قد هدأت و لم يبقى الاتحليل لاحد المرضى موعده بعد ساعه

انا قلت افرد ظهرى ساعه و لا حاجه و اكدت على الممرضات انهم يسحبوا التحليل رغم يقنى انهم لن يفعلوا شيئ الا و انا فوق رؤوسهم و بالفعل قمت بعد ساعه و نصف لكن ياللعجب الدنيا هس هس و ظلام دامس الا من انوار الاجهزه احمر و اصفر و الانذارات شغاله تيت تيت تيت ...و لا ممرضه موجوده و لا بيت الاشباح يا اخى

يا فلانه ...يا علانه ...يا زييييييييد .......يا عبيييييييييييد....يا ماما

هو ايه اللى حصل ...كل الغرف فاضيه الا من المرضى...هو انا نمت قد ايه؟


المهم علشان ما اطولش عليكم....وجدتهم اخيرا متكومين على سرير و فى سابع نومه...اصحيهملك يقوموا يقولوا و الله صاحيين يا دكتوره...اكيد انا اللى نايمه.. معلش ....بالمناسبه نبطشيه الممرضات 8 ساعات فقط

كظمت غيظى و انتظرت حتى الصباح حيث انه لا سلطه مباشره لى عليهم فى موضوع الجزائات...المهم فقعتهم الشكوى المتينه و نزلتها للمدير

طبعا تصرفهم هو منتهى الاستهتار و عدم الاحساس بالمسئوليه لكن موضوع الضمير ده متوفى من زمان..اخدوا خصم بسيط لكن ازاى ؟كيف اجرؤ على فعل كهذا؟؟؟و ثانى نبطشيه على طول لقيتهم فرغوا عجل البعكوكه


انا الاول كنت خايفه اكون ظلماهم(عبيطه والله) لكنهم كانوا يتفاخروا باعمال البلطجه هذه امام الآخريين و حتى يومنا هذا..طبيب جديد لم يعاصر هذه الحادثه لكنه سمع عنها وصفها بتحالف قوى الشعب (اللى هو الممرضات )ضد الشيطان الاعظم (اللى هو انا)

و رغم معرفه الجميع تمريض و اطباء و مديرين بما حدث و معرفه الجناه نفر نفر فانه لم يتخذ اى اجراء ..و اللى له ضهر ما يتضربش على بطنه


علاقتى بالممرضات معقده فهم يحبوننى (مش كلهم طبعا) لمعاملتى لهم و لكنهم فى نفس الوقت يأنفون من طاعه فتاه تقاربهم فى العمر و تنشأ مشاعر تشبه الغيره الى حد كبير....اتجنب الاوامر المباشره(و هو حقى ) و الصوت العالى الاحين الضروره...فى الحقيقه لا ينبغى ان تكون هذه مشكله فهذا مكان عمل على كل حال و لا ينبغى ان يتأثر العمل بمشاعرهم تجاهى ..لكن سوء الاداره و ضعف العائد المادى يزيدان المشكله حتى صارت غير قابله للحل...لا اتفرد بمثل هذه المشاكل مع الممرضات يشاركنى كل الاطباء كبارا و صغارا..ذكورا و اناثا..اكثر ما يتعبنى من الممرضات هو استهانتهم بارواح الناس ..ايحدث هذا عن جهل ام عن لا مبالاه؟؟


عامه لن يردعنى هذا من تكرار نفس الفعل..المره السابقه كان العجل tubless وبفضلهم صار عاديا فلو كرروها لن اخسر شيئا .... اش ياخذ الريح من البلاط؟؟؟

هناك 22 تعليقًا:

تايه في وسط البلد يقول...

ازيك يا دكتورة

انا باعز جدا الاشخاص الذين تقوم بينهم وبين اشيائهم علاقات حميمة جدا فهذا يطمئني نوعا علي علاقاتهم بالبشر من حولهم

اما عن علاقتك بطاقم التمريض فهو بالضبط ما كانت شقيقتي تسرده علي مسامعنا وتشكو منه ولا اظن ان له حلا في الوقت المنظور

انا اكون سعيدا اذا ما كانت هناك تدوينات اخري عن البعكوكة
تحياتي

واتمني لك نوبتجيات سعيدة

Zianour يقول...

اهلا يا دكتورة ومرحبا بالبعكوكة وبمغامراتها اللي مستنينها
اما عن الممرضات فهما والله العظيم وقسم احاسب عليه - معظمهم علشان الحلفان- عايزين الرمي بالرصاص في ميدان عام .. إسأليني انا 2 ولادة قيصري .. مدوباهم اتنين!!!
هههههههههه بس انتي عسل والله وعربيتك كمان !!!
المهم انا مررت لك تاج يلا فوتي عندي بس عند نور وزياد علشان تاخديه ويا رب يعجبك..
تحياتي..
زيانور

mohra يقول...

تايه في وسط البلد
بس كده ..بكره ازهقكم منها

Zianour
2 قيصرى؟و الله انت بطله
اما عن التاج ..ده محتاج قعده على ما افهم و كده و استوعب....بس بجد بجد شكرا

الدرعمي يقول...

السلام عليكم

شكرا عزيزتي على السيارة

وربنا يرزقك ب BMW

عن قريب يا رب

وبوست ممتع


تحياتي


آدم

الربان يقول...

تحياتي

اولا بارك الله لك في البعكوكة...و ان شاء الله يرزقك بـسيارة 4X4 ...
ثانيا...احييك لانك لم تهملي في اداء رسالتك النبيلة الا و هي الطب...

يفترض ان الرعاية المركزة تخصص دقيق و حرج...و يمكن ان يؤدي الاهمال في العمل في
هذا القسم الي عواقب لا تحمد عقباها..

لو كل مسؤول راعي الله في عمله لانصلح
حالنا...

تحياتي و تقديري

micheal يقول...

أحيييكي جدا جدا جدا يا دكتورة عليب موقفك و غيرتك علي مصلحة العمل ورسالة المهنة المقدسة
بجد...يا ريييت مصر كان فيها كتيير منك
وربنا يباكلك في البعكوكة و تبقي أحلي عربية في الدنيا
تحياتي

Unknown يقول...

التمريض دول ناس ليها العجب

الحمد لله مفيش حد منهم فضالي العجل

بس ممكن يحصل في القريب العاجل

:)

ابو العربى يقول...

بالنسبه للبعكوكه بتعتك البنزين ال 80 مغلاش ومتؤوليش بحط 90 بعد الوصف الشنيع الى انتى وصفتيه للبعكوكه
ثانيا الممرضات عندنا فى بورسعيد حاجه ايه ولا فى الدماغ الموبيلات ومشغلين الاغانى ومدينها صارمه والدكاتره كركر معاهم والدنيا بايظه والمرضى فى حته وهما فى حته والدكتور يقول كمان ساعه شيلو التنفس الاصطناعى وملقتش حد يشيلو للماما بتاعت الانا شيلتو انا وقفلت المحبس لا والحجه تقولى هى بتاعت الاكسجين دى معقمه سالت الممرضه بصيتلى بستحكااااااااااار
ربنا يكون فى عونك
تحياتى
ابوالعربى

موناليزا يقول...

ياسلام لو كل الدكاترة والممرضات بيهتموا بالمرضى كما تهتمين لكانت الاحول اتصلحت
عجبنى حبك لعربيتك وانتمائك ليها رغم عدم امكانياتها كما العربيات الحديثة
وانا كمان كده على فكرة عندى انتماء فظيع لممتلكاتى مهما كانت فى اعين الناس
وخليكى على موقفك اللى يغلط يتعاقب ولو بخصم بسيط بس يبقى فيه عقاب

mohra يقول...

ADAM &الربان
BMW و 4X4 كمان...ليه لأ؟؟..ما هو بعد العلاوه الجديده خلاص هنلعب بالفلوس لعب :))

micheal
شكرا جدا يا مايكل

أنونيمس
take care ya dr الحرب خدعه زى ما انت عارف و ممكن ينقضوا عليك فى اى لحظه

ضد الظلم
اولا: انا لا اتهاون فى حق البعكوكه اطلاقا و لا يمكن اشربها اقل من 90 (فى اشاعات عن 92 بس انا باعمل مش واخده بالى)

ثانيا:مدونتك دمها خفيف جدا جدا جدا

ثالثا:.....................انا مش لاقيه ال80


العزيزه monaliza
كسفتينى و الله....و يا ريت تحكى عن اشيائك انت كمان

Hosam Yahia حسام يحيى يقول...

ماشاء الله بوست جميل

ربنا يكرمك ويكرم العربيه الصغيره وتكبر

والعلاوه كبرت والاسعار لعبت

:d

د. إيمان مكاوي يقول...

ضحكت كثيرا..لأن زوجي عندما خطبني كان عنده بعكوكه شبه دي بالضبط وكنت بحبها جدا وزعلت جدا لما باعها ( فقريه )
أما لموضوع الممرضات فحصل منه حاجات كتير لدرجة إنهم كانوا بيحاولوا يوقعوا بيني وبين زوجي وكنا وقتها لسه مكتوب كتابنا ..لكن على مين يابنتي صاحبتك ناصحه وفهماهم

أنا بهديلك التاج إنت وكل قراء المدونه ياريت تقبليه
تحياتي

Unknown يقول...

هتقوليليييييييي
اتقي شر الممرضات في النبطشيات
يجعل كلامنا خفيف عليهم

Mai Mohamed Rizk يقول...

Who cares about what people say?! excuse me ya3ni.. toz fihom.. LOL.. what is important is for you to love your car & be content with it. that's enough :)
yalla.. waiting for more.

read for you soon :)

Soooo يقول...

معلش قبل اي حاجه .. ايدك على حق النيسكافيه اللي شربته وانا بافللي مدونتك
اي نعم استمتعت بيها وكللو تمام .. بس معلش حق الفيسكافيه
وان كنتو اخوات اتخانقو
وقال سلامه في خير .. وخير ان شاء الله
----
اسم مدونتك عاجبني جدا جدا .. اسلوبك ساخر جدا وحلو جدا

ونشكر الحاج جوجل اللي بعتني على هنا لما عملت سيرش على جريدة البعكوكه الساخره اللي رأس تحريرها عبد الله النديم

اول زياره ليكي .. بس استمتعت جدا جدا جدا

وعايز حق الفيسكافيه برضه



سلاموووووووووز

Layla يقول...

العجل التيبوليس ده اختراع جامد جدا...من افضل اختراعات القرن

الا هو مين اللي عمله!؟

خيرالدين يقول...

لا كله الا الممرضات
مش عارف انت وانونيمس متضايقين منهم ليه
دول حتى ملائكة رحمه
ومش بيزعلوا حد خالص
ناس طيبييييييييين قوى

mohra يقول...

حسام يحى
تصدق لسه ما اقبضناش العلاوه

Ema
على كده احمد ربنا انها جت على قد العجل

لماضة
يا رب يا اختى يا رب

Mai Mohamed Rizk
شكرا على تشجيعك يا مى ...شكلك زميله فى المواضيع دى

Soooo
ماشى يا سيدى بس فين حق المشاريب بتاعتى و انا بكتشف مدونتك؟؟؟
شكرا لك كثيرا بس كنت بتدور ليه على عبد الله النديم؟؟

M@RV3L
اكيد الحاج تيوبلس

e7na
صحيح احنا مفتريين...اكيد العجل هو اللى شتمهم الاول و اكيد بيناموا بالليل عشان ياكلوا رز مع الناس مهم ملايكه بقه

Soooo يقول...

ماشى يا سيدى بس فين حق المشاريب بتاعتى و انا بكتشف مدونتك؟؟؟
----
ايه ده .. ده انا سايب اوفيس بوي على باب المدونه بيسقي الناس اللي هي عايزاه .. هو خد منك فلوس؟؟؟
وديني لاعمللو لفت نظر


شكرا لك كثيرا بس كنت بتدور ليه على عبد الله النديم؟؟
-----
كنت بادور على اول مجله ساخره ألفها عبد الله النديم .. وكان اسمها البعكوكه
دوري عليها ولو لقيتيها ليكي اللي انتي عايزاه




سلامووووووووووز

أبو عمر يقول...

أولاً: أنا بحييكي على مدونتك الظريفة، عجبتني...ظريفة ودمها خفيف.
ثانياً: أنا بسجل إعجابي بأسلوبك الظريف، الكلام عامي وسلس، عندك أسلوب ساخر وكوميدي مع إنك اتكلمت في موضوع حساس وهو إهمال الممرضين ومع ذلك أنا كانت ابتسامتي على شفاهي وأن أقرأ الموضوع.
ثالثاً: أنا سعيد جداً بحبك لبعكوكتك الصغيرة...لسه فيه ناس كده....إنت أثبتيلي فعلاً إن هذا الزمن مهما الناس وصموه ووصفوه بالمادي؛ هو مش مادي أبداً طول ما فيه ناس جميلة وظريفة وحساسة زيك وعندهم احساس بالحب والارتباط لكتلة حديد، أنا حسيت فعلاً إن فيها روح ولسان وبتكلميها.
رابعاً: موضوع إهمال وعدم مبالاة الممرضات والممرضين مهما هقلك وأحكيلك عن تجارب أصدقاء أو أقارب أو معارف لي عن سلبياتهم، فإنت أكيد أدرى وأعرف، بس الواحد اللي يقدر يقوله..حسبي الله ونعم الوكيل...المفروض الواحد فيهم يفتكر يوم الحساب أمام الله...ماذا سيقول عندما يُسأل عن إهماله؟؟؟؟
أخيراً وأنا أسف لأني طولت، أنا كمان جديد في عالم التدوين ومدونتي هي
masrychamy.blogspot.com
وعندي أفكار كتير حابب أكتبها وأمور ساخرة وفكاهية...بس مش عارف، كل ماأكتب؛ أجد نفسي أكتب مواضيع يعني سياسية وشبه جادة وألاقي روح الفكاهة اختفت تماماً مني!!!
فأرجو منك إعطائي بعض النصائح لكتابة مواضيع قريبة من القلب كمواضيعك خصوصا إن الأفكار كثيرة وغنية عندي.
أنا آسف مرة تانية على الإطالة...وأتمنى لك التوفيق فعلاً ولكل المدونين والقراء.

mohra يقول...

Soooo
انا هادور مخصوص علشان الحلاوه

أبو عمر
مش عارفه اشكرك ازاى ربنا يكرمك يا رب...على عكسك انا اتمنى ان اكتب بالفصحى لكن لما باحكى القافيه بتحكم...الكتابه الجاده بالفصحى الرصينه ميزه ليس من السهل الحصول عليها...شكرا لتشجيعك جدا جدا جدا

الميكروباص يقول...

عقبال ما نبارك لك على المرسيدس