الأحد، 19 أبريل، 2009

ما بين المسأله الطبيه و ال anger management



تنتابنى هذه الايام حالات ضيق متكرره...اشعر بداخلى بغضب...موجات من الغضب....تضايقنى اشياء كثيره ..هى بالفعل تدعو للضيق و لكن كان يمكنى الاغضاء عنها من قبل لكن هذه الايام لم اعد احتمل ..تثور ثائرتى او ينتهى بى الامر لبكاء مر لا يستحقه كل هذا


ربما كان هذا بسبب العمل و مشاكله..نسيت ان اقول لكم انى توصلت لتسويه مع هولاكو يعطينى فيها جزء من حقى و لكن يحرم الاخرين من نفس الترضيه مع وعد منى بابقاء الامر سرا...اعترف ان تلك التجربه الاخيره ضايقتنى كثيرا فقد شعرت انه لا يمكن ان تحصل على حقك بطريقه شريفه ..ان الجميع و العقل يقولوا لك ان اقصر الطرق بل لعله الطريق الوحيد هو الالتواء..صحيح لم اغير نفسى و لكن اشعر ان جزء بداخلى انكسر و انى لم اعد كما كنت


لعلها ظروف العمل هى ما تصل بى لهذا ..الظروف غير انسانيه بالمره سواء فى ام محمود العام او الخاص ..لا احد يتعامل مع الطبيب باعتباره انسان له بعض الحقوق حتى المرضى و الناس و ابسط رد يقال "انها مهنه انسانيه"


حقا فاض الكيل لم اعد احتمل..فى اسبوع واحد استقلت من العمل الخاص و كدت افعلها فى العام..لكن مسكونى فى اخر لحظه للاسف


كل الظروف غير مواتيه..هل يعرف احد ما المقابل المادى الذى اتلقاه مقابل كم المرمطه التى تقابلنى؟؟اكيد تعرفون ..دعك من هذا فانا بالفعل استمتع بعملى و يسعدنى للغايه صوره انسان ساهمت فى اسعاده و اسعاد اهله و لكن فى النهايه انا بشر و قدرتى على تغاضى المنغصات لها نهايه


مثلا حكومتنا الموقره بعد قرار الحوافز التى هللت و طبلت له شهور لم تعد تصرف تلك الحوافز و من زمان كمان..الذى يضايق حقا ليس هو منع الحوافز (التى كانت تصل بالمرتب بالكاد لحفظ ما ء الوجه) بل هى الصفاقه التى جعلت نفس الحكومه تنبه على المديرين منع الاجازات فى اليوم الذى كان مقررا فيه اضراب العيادات الخاصه و تهديد الاطباء برفع اسمائهم للامن المركزى و لا الغذائى ..مش فاكره الحقيقه..و المثير للغضب ان النعاج انصاعت رغم ان تلك التعليمات كانت هاتفيه و غير ملزمه من الاساس

مسأله اضراب العيادات هذه اساسا مستفزه ..يعنى ان كنت انت طبيبا لا تعطيك مستشفيات الحكومه مالا و اضطرتك الظروف لفتح عياده خاصه بك فانك ستغلقها اعتراضا على الحكومه!!!يا سلااااااااااااااام

كل هذا بسبب اذناب الحزب و الحكومه فى النقابه و التى تجهض اى محاوله فعليه لاضراب فعلى يجعل اى بنى آدم يشعر بالاطباء



ارجوكم لا تردوا بان الجميع يشعر بنا و كل هذا لانه غير حقيقى ..اى انسان مريض هو خطأ الطبيب اولا و اخيرا و ثانيا و ثالثا و كل شيئ..اتدرون اكثر كلمه اسمعها فى عملى "ده كان جاى على رجله"يا الله يعنى كان جاى يتمشى يا اخى مادام جاى المستشفى يبقى تعبان..حاجه بديهيه يعنى"

المريض يفترض ان يشفى دون اى وخزات من ابر او علاج..لا تدرون كم السباب اليومى الذى نتلقاه لمحاولتنا حث المرضى المحجوزين بالمستشفى على تناول العلاج..اما اذا يأس احد الاطباء (بلاش يأس تعب زهق فطس)يبقى فين الضمير ما تحللوا القرش(هو فعلا قرش) اللى بتاخدوه..اما اذا استمر فى النضال فان السباب هو اقل ما يلاقيه ان لم يتطور الامر الى ركلات و صفعات او دعوات منتقاه

كل هذا قد تتحمله على اعتبار انه مريض لا يؤاخذ و ان هناك هدف اسمى و لكن الامر لا يتوقف عند هذا ..خذ عندك تمريض و عمال و اهل المريض و كل واحد معدى عنده مشكله و المفروض ان عندى كل الحلول


ما ذنبى انا ان كان احدهم ليس معه بطاقه او ليس عنده رغبه فى رعايه ابوه او انه بيضرس مثلا فى مشاعره لما يشوف حد تعبان..ما ذنبى ان مسئول الامن لا يريد اعطاء عامل الاسعاف 50 جنيه ..ما ذنبى انه لا توجد اسره كافيه لكل المرضى ..ما ذنبى ان زينب تعند مع هبه و لا تريد ان تعمل معها..ما ذنبى ان احدهم جاء بعد موعد الزياره لانه كان مشغول...ما ذنبى؟؟؟

مشاكل و ليس فى سلطتى الحل بسبب مركزيه غير طبيعيه للسلطه..مجرد وصول كل هذه البلاوى لى مركزيه ..الا يوجد بعدى اى انسان يمكن ان يحمل مسئوليه القرار..لا تتخيلوا كم الامضائات التى الطعها لكى يسير العمل..اظن ان نهايتى ستكون كارثه

اما اذا طلبت الاستعانه بصديق( اوعدو مثل هولاكو مثلا) فان الردود تتراوح ما بين التنصل من المسئوليه او (سيبيه يتفلق) بالله عليكم انا فى المواجهه كيف سيتركنى الناس اخبط راسهم فى الحيط؟ كما نصحنى مديرى الهمام

كل هذا لا يمت بصله لعملى ثم يأتى دور عملى الاساسى فاجد نفسى اجرى (بالمعنى الحرفى لكلمه جرى و لا توجد اى شبهه تهويل هنا) فى اى وقت لالحق احد المرضى و يكون على اتخاذ قرارت حاسمه بصوره مستمره....قرارات من شأنها ان تساعد احدهم على الشفاء و قد تقتله و عليك ان تتعايش مع اختياراتك و تتحمل تبعاتها مع ضميرك قبل ان تتحملها رسميا ..احيانا فى وسط تلك المعمعه اتمنى فى داخلى ان يأتى غيرى ليأخذ القرار

بعد نوبتجيه لعينه اكره حياتى فيها..اذهب لانام فاجد مكان قذر فى حجره وصفتها امى يوما بالقبر عندما اضطرت للجلوس فيها نصف ساعه بينما انام فيها منذ سنين..بسهوله شديده يمكن ان يوقظنى اى انسان لاى سبب"العيان ضهره بياكله قومى اهرشيله"



كيف اصبر و لا احد حتى يشعر بتلك المعاناه المستمره حتى اقرب الناس ..منذ ايام استنكر ابى ان استطيع ان اقوم بعمل لولو قريبتى (فاكرينها؟؟) و الذى يتطلب منها الجلوس على الكومبيوتر عده ساعات خمس ايام فى الاسبوع مقابل عده الاف فى الشهر...هل يمكنى ان اشرح لكم شعورى وقتها... اشك

.يمكننى ان اقايض عملى معها بكل سرور و لكن هل سترضى هى؟؟؟ لااظن

هناك 15 تعليقًا:

موناليزا يقول...

كان الله فى عونك
وربنا يديكِ طولة البال
ماتزعليش ياحبيبتى ولا تضايقى كله بثوابه

Inevitable يقول...

مكنتش اعرف ان الطبيبات بيتعبوا قوى كده كنت فاكر الشباب بس هما اللى بيتبهدلوا -:)
معلش يا دكتورة ربنا يقويكى ويثبتك ويجازيك كل خير على اللى بتعمليه , هى الفترة ديه عادة بتكون متعبة جدا وبيحصل فيها تغير كبير فى الشخصية ونظام اليوم وهتلاقى حاجات كونتى بتعمليها قبل التخرج مش عارفة تعمليها بعد التخرج بس اللى مستغربه لما الدكتور الامتياز بيعمل كل ده وبياخد قرارات مصيرية كده امال فين النواب?

micheal يقول...

مسأله اضراب العيادات هذه اساسا مستفزه ..يعنى ان كنت انت طبيبا لا تعطيك مستشفيات الحكومه مالا و اضطرتك الظروف لفتح عياده خاصه بك فانك ستغلقها اعتراضا على الحكومه!!!يا سلااااااااااااااام
والله قطعتي قلبي
الواحد لما يسمع عن بلاوي الناس تهون عليه بلوته
هو الحزن الوثني ده ورا أي مصيبة تحصل في البلد
امتي يغوروا بقي ونرتاح منهم
شدي حيلك..محدش بياكلها بالساهل
:)
تحياتي

mohra يقول...

موناليزا
الله يكرمك يا موناليزا ...دعواتك


Inevitable
امتياز؟؟؟؟؟؟؟؟؟؟؟كل ده و امتياز
ليه كده البدايه اللى مش و لابد ديه؟
انا مساعد اخصائى مع وقف التنفيذ و منه لله اللى كان السبب


خطوه عزيزه




micheal
ربنا معايا و معاك و معانا كلنا يا رب يا مايكل

rovy يقول...

ازيك يا دكتوره؟
وحشانى ..

ربنا معاكى بجد مش عارفه اقولك ايه
ربنا يثبتك و يعينك و قادر برحمته يصلح الاحوال ..

دمتى بكل الخير فى رعاية الله

ارق تحياتى

snohe يقول...

صديقتى العزبزه

تعرفى انا معاكى ان جو العمل محبط

لكن اكيد ان شاء الله ربنا ههيوفقك وتحققى كل احلامك سواء كلنت ماديه او معنويه
وكمان مهم اننا منغرقش فى الشغل وننسى مشاعرنا واحلامنا

صدقينى حاولى تخرجى من مشاكل العمل واهتمى شويه بمشاعرك ههتلاقى الحياه اسهل


اخرجى مع اصدقائك زورى اقاربك روحى مسرح وسينما وسافرى حتى


كل دى حاجات بتسهل الحياة


ربنا يوفقك
صدقينى

مصطفسي ريان يقول...

كل مابقرأ كلامك بفتكر كلام صديقتي الطبيبة الالكترونية لما قالتلى ( الحمد لله انك مابقتش دكتور)
ربنا يعينك ويوفقك

alzaher يقول...

المشكلة الوحيدة في كل ما ذكرتي هو تصورك انها مشكلة تخصك وحدك
والعكس هو الصحيح
انها مشكلة تخص الجميع
والحل يجب ان يكون جماعيا ايضا

تايه في وسط البلد يقول...

حالة الغضب بالطبع لن أتحدث عنها مرتين!

بخصوص التسوية مع هولاكو فهو أمر كنت أتوقعه ولكنه ليس نهاية المطاف والأفضل أن تبدأي في تسريب الخبر كنموذج جيد للنجاح في المطالبة

ولننظر لاضراب العيادات بنظرة الحكومة نفسها ولا تنظري من حولك فقط..هل تعرفين الدور الذي تقوم به هذه العيادات والمستوصفات في مصر..ان مجال الصحة ضمن المجالات التي انسحبت منها الحكومة ومعني غلق العيادات هو إتجاه جيش المرضي الجرار الذي كان يتجه للعيادات الي المستشفيات الحكومية..ساعتئذ فقط ستعرف الحكومة ما تتحمله العيادات عنها

خذيها من مشاهد عن قرب..العلاقة بين الطبيب ومن حوله شبه منقطعه الا ما رحم ربي..اما من جهة الطبيب او من جهة المريض

بصراحة لم تكن لي طاقة لتعليق طويل - ولا قصير - ولكن الحالة التي وراء التدوين ينبغي ادخالها العناية المركزة !!

ونصيحة قلتها لك قبلا وسأكررها:

سافري
جددي الوجوه
حددي مكان أفضل تستطيعين أن تنجزي فيه أفضل وبدون تردد اتجهي اليه..

الدنيا واسعة جدا

mohra يقول...

rovy
دوما انت العزيزه الرقبقه يا روفى


snohe
لقد بدأت بافعل ..فى الغد يوم حر
ربنا يسهل


مصطفي ريان
الطبيبه الالكترونيه ؟؟؟دى غير الطبيبه الباطنيه؟؟؟؟
هههههههههههه معلش يا مصطفى القافيه حبكت



alzaher
بالعكس تماما ..انا مقتنعه انها مشكله عامه ..لا تؤثر فى الاطباء فقط بل كل المجتمع...و لكننا للاسف نعاج...بالفعل لا يوجد حل الا حل جماعى لكل المشاكل فى بلدنا ..كل المشاكل و ليست مشكله فئه معينه




تايه في وسط البلد

اولا : دعنا من هولاكو وسيرته

ثانيا:العيادات لا تحمل هم المرضى الغلابه ..اكثريه المرضى فى مصر ..الناس تذهب للعياده لكى تستطيع الحجز فى مستشفى مجانى ..العيادات دورها ضعيف جدا فى خدمه الطبقه المحتاجه فى مصر..دعك من هذا ,اُختير يوم الخميس لان اساسا اغلب العيادات مغلقه فى هذا اليوم..اجهاض للاضراب ..صدقنى الامر كله ملفق بصوره تدعو للغثيان

ثالثا:السفر كتجديد مناظر و فسحه لا غبار عليه ابدا اما ان كنت تدعونى للهجره فانا لا اعلم ان كنت ستصدقنى و لا تقول انى اقول كلام شعرى و لكن اِن ترك الناس المتعلمين البلد من سيبقى فيها تن سيعالج الناس من سيعلمهم من سيبحث فى المعاهد من سيبنى و يزرع و يصنع ؟؟؟كيف ستتقدم بلادنا ان هجرناها كلنا
لماذا نعطى مجهودنا لمن لا يحتاجه و هناك من هم فى امس الحاجه له؟؟
لا استطيع ان اجد فى نفسى ما يقول انه من الصواب ان افعل هذا

كيــــــــــــارا يقول...

ربنا يكون في عونك يبنتي بلاش تضغطي علي نفسك الضغط كدا هيجيلك وبما تلحقه بقيه الامراض

احتسبي اجرك عند الله

فاتيما يقول...

يا قلب الأسد
مش تمسكى نفسك كدا
و ميهميكيش من هولاكو دا حاجة
النوعية دى من الناس ربنا خلقهم عشان ناخدهم كمثال على كعبيلة كانت ف طريقنا و مسيرها تعدى و نبقى نفتكرهم بكل خيييييييييير كعبرة على التخلف و المكر مش اكتر
حكاياتك دى فكرتينى بأخت واحدة صاحبتى برضو متعذبة زيك فى شغلها
و المدير و زمايلها متوالسين عليها عشان يدبسوها فى البيات
و كل يومين يغيروا الجدول و يقعدوها ساعات نبتشيتين برضو ....
العيانين بتوعها بيرفعوا عليها مطاوى و بيتخانقوا معاها على أتفه سبب
الله يكون ف عونكم
بس أرجع و أقولك إنتى دكتورة
يعنى مش حد عادى
و مش نعرة إجتماعية منى و لا محاولة لتسكين المك ...
بس دا رأيى بجد
انا ببص للدكتور و المهندس
و استاذ الجامعة و الناس اللى شغلها دقيق كدا بصة فيها إكبار شديد
و متهيألى الناس كلها لازم تبص كدا
إنتوا تعبتوا و إجتهدتوا و بتشتغلوا شغلانة مرعبة و عظيمة
مش هقولك مهنة إنسانية لحسن بتزعلى
بس دى مهنة خطيرة مهما حد حاول يسفه من قدرها أو قدرك ...
المعاناة اللى بتعانى منها دى مسيرها الى زوال إن شاء الله
و هولاكو دا هيطلع معاش و محدش يفتكره
و بكرة هتخدى وضعك
و قبل ما دا يحصل عاوزة أقولك
إفتكرى إنك إنسانة جميلة من جواكى و التغييرات اللى فيكى دى آنية حاجة مؤقتة و مش دايمة
و إفتكرى كمان إنك دكتورة زى الفل
و الالاف تمنوا يحصلوا على الدال نقطة اللى قبل إسمك دى و معرفوش ....
لأنهم مكنوش فى شطارتك و إجتهادك
أنا شخصيا فخورة بيكى و من غير ما أقابلك خالص ....
خالص الحب ليكى يا دوك

rovy يقول...

ايه الحكايه يا دكتوره ..؟؟
اتأخرتى علينا قوى ؟؟
وحشتيناااا
لو مشغوله ربنا يعينك ياارب
طمنينا عليكى حبيبتى


ربنا يحفظك من كل سؤ

تحياتى

mohra يقول...

كيــــــــــــارا
شكرا على اهتمامك يا جميل و مبروك الشهره يا عم


فاتيما
ياااااااااه يا فاتيما
اخرستنى و الله
ربنا يكرمك على تشجيعك و اهتمامك و حسن ظنك بالدكاتره
بس صدقينى هما ناس زى اى ناس قيهم كده و كده
وحشانى جدا



rovy
انا جاااااااااى حالااااااا
الله يخليكى يا رفى و الله هى مشاغل بس

أفكار مسموعة يقول...

ما أروع أسلوبك سيدتى حين يفيض وجدانك فى سطورك السلسةسيما تنطق بالعامية فهى أقرب الى القلب دائماً ..
فوزى البحيرى
مدونة أفكار مسموعة