الجمعة، 22 أغسطس 2008

اولمبيات...خمس حلقات




الحلقه الاولى


من صغرى و انا اهوى متابعه بعض الالعاب الاوليمبيه... الجمباز الفنى و الايقاعى..العاب القوى..السباحه و الغطس و السباحه التوقيعيه و احيانا رفع الاثقال!!!


لظروف العمل و الحياه لم اتمكن من المتابعه جيدا و لكن مهما قلت متابعتى فان الجزء الذى تابعته ينجح فى استفزازى ضد الولايات المتحده الامريكيه



حتى فى الرياضه !!ورغم انها تمتلك مجموعه من افضل الرياضين على مستوى العالم الاانك تجد ممارسات ابعد ما تكون عن الاخلاق الرياضيه بدأ من اضافه بعض الرياضات التى لا يلعبها الا الامريكيين مثل كره اليد الشاطئيه ..سوفت بول(لا اعرف لها ترجمه الا الكره الناعمه) و كره القدم النسائيه...كل هذه الالعاب اضيفت فى دوره اتلانتا و لا يزال الامريكيين يحتكروا الميداليات الذهبيه فيها حتى اليوم...(ربما لو نظمنا الالعاب الاوليمبيه يوما اضافوا كره السرعه (ولكننا سنخسر ايضا



الجمباز من الالعاب التى بدأ الامريكيين يبرعون فيها و يحصدون الذهب و لكن لننظر اكثر





الامريكى بول هام حصل على ذهبيه ا ثينا متفوفا على لاعبيين كوريين و بعد مراجعه النتائج وجد خطأ فى الحساب و ان الجائزه من حق اللاعب الثالث و قامت اللجنه الاوليمبيه بايقاف ثلاث حكام و بعثت بخطاب الى هام تطلب منه التخلى عن الميداليه لمستحقها الفعلى لانها لا تستطيع تغيير النتيجه...هام رفض التراجع و قال انه يتفهم ما مر به اللاعب الكورى من معاناه لانه يعانى ايضا!!!!





فى نفس تلك المنافسات كان يلعب البطل الروسى اليكسى نيموف و قام الحكام بمنحه درجه متدنيه بعد اداء جيد فما كان من الجمهور الا الاحتجاج الصاخب بصوره منعت استكمال اللعب (كان الدور على هام مما اثار الجماهير اكثر) لمده ربع ساعه..اضطر الحكام الى اعاده التقييم و رفع النتيجه قليلا فاستمر الجمهور على صخبه و لم يتوقف الا بعد تدخل نيموف نفسه و طلبه الهدوء من الجماهير


فى الصوره نرى الغضبه التلقائيه للجماهير ..لم تكن الجماهير روسيه فقط بل كانت من مختلف الدول و كل يلوح بعلم بلاده ...حتى باقى المتسابقين كانوا مؤيدين لتلك الثوره الغير مسبوقه


لم يفز نيموف بالميداليه وقتها و لكن تمت تغيير قوانيين التحكيم بعدها!!!!


فى منافسات بكين شاهدت الامريكيه ناستيا لوكين تفوز بالذهبيه ..كان الاسم و الملامح و حتى اسلوب الاداء يشى بنكهه روسيه خالصه و بحثت لاجد انها من اصل روسى و ان الاب (هو المدرب فى نفس الوقت ) و الام هم ابطال جمباز سوفيت هاجروا لامريكا و انشأوا معهد رياضى هناك...لا اقول ان هذا خطأ الامريكيين و لكن بعدما كانوا يستوردون المدربين الروس و الصينين صار اللاعبين ايضا هديه فوق البيعه...للامريكيين تاريخ طويل فى هذا و لا ننسى نافرتلوفا و ناديا كوماتشى و غيرهم


يدفعنى هذا للتفكير فى مأساه هجره العقول...ايمكن ان تتفهم موقف من ترك بلده و تجنس بجنسيه اخرى..قد تكون الظروف صعبه و لكن ايكون هذا مبررا لمثل تلك الاساءه ..كيف يمكن ان ترتقى اذن؟؟لذا اجدنى غاضبه من ذلك الاحتفاء بزويل و هو رجل لم يرى بلده او يحاول مساعدتها لمده ربع قرن و بعد الفوز بنوبل كمواطن امريكى ظهر ثانيه كمصرى و رحنا نهلل كعادتنا و نسينا اخرين هاجروا و لم ينسوا بلدهم د.مجدى يعقوب و اخرون لم يرحلوا و ظلوا ينحتون فى الصخر كل يوم د.احمد شفيق





الحلقه الثانيه


السباح الامريكى مايكل فيليبس سباح فذ استطاع الفوز بثمانى ميدليات ذهبيه بهذه الاوليميات لكن الجدل دائر حول ذهبيه 100 متر فراشه و هو السباق الذى كان متأخرا فيه نتيجه لعيب فى نظاره الماء و لكن فيما يشبه المعجزه استطاع الفوز على الصربى كافيتش بفارق فنيه (اللى هى اقل من الثانيه على رأى سعيد صالح بالضبط 01. ) و قد قدم الصرب شكوى قائلين ان بطلهم لمس الحائط اولا و النت ملئ بفيديو و صور من كل جانب( الامريكى و الصربى ) تؤيد وجهه نظره الا ان المسئولين الصرب اقتنعوا فى النهايه حتى كافيتش نفسه و هو مدون زميل كتب عن سعادته بالميداليه الفضيه و ساترك لكم الصور لتحكموا (كافيتش هو صاحب البدله الكامله)




































الحلقه الثالثه


العداءه الامريكيه الاسطوره ماريون جونز و الفائزه بخمس ميداليات بسيدنى منهم ثلاث ذهبيات اعترفت مؤخرا بتعاطيها منشطات ممنوعه رغم نفيها هذا مرارا و تكرارا سابقا وقد قامت اللجنه الاوليمبيه بسحب كل الميداليات منها...ليست وحدها من تفعل هذا ففى هذه الاوليميات سُجلت خمس حالات تعاطى للمنشطات ..السؤال الآن من يعوض هذا الذى حصل على ميداليه ذهبيه بعد سبع سنوات و قد حرم من زهوه الفوز فى حينها ؟؟؟؟






الحلقه الرابعه


حتى قناه الجزيره الرياضيه بكل امكانياتها لم تجد سوى رياض شراره ليشرح لنا نحن "اعزاءه المشاهدين فى كل مكان صحرا ان كان او بستان ان حوا (حواء)اخدت نص ام الالعاب (اللى هى العاب القوى ) من الراجل المسكين اللى هو ولد"


يا الله


رحمتك يا رب (و لكن لا انكر للرجل حماسه الغير طبيعى لكل ماهو عربى و للامريكيين ايضا )






الحلقه الخامسه و الاخيره


قامت اللاعبه الاسرائليه بالاداء على موسيقى جبار لعبد الحليم


سرقوا الارض و الآن الموسيقى


ماذا سيسرقون غدا...لعله لم يبقى شيئ ليسرقوه


هناك 30 تعليقًا:

صباح الصباح يقول...

اول مرة اشوف بوست فنى معملى كدة؟
هوة انتى جبتى المعلومات منين يا بنتى؟؟
بس انا ليا تحفظ صغنن كدة بعد اذنك طبعا:
*زويل.. انسان عبقرى مثل ناس غيرة كتير حس انة لوفضل فى بلدنا الحبيبة المخروبة المنهوبة هيضيع فى الكازوزة.. واعتقد الراجل معاة حق فى كدة
سافر.. اتغرب.. اجتهد.. ناس تانية حسوا اد اية هوة مهم.. يفطوا فية؟ طبعا لا.. ادولة الامكانيات.. وكمان الستاف الجامد.. اداهم عمل باخلاص ..عشان كدة خد نوبل
لما رجع مصر وقالهم انا عاوز اطبق علمى فى بلدى (اعتقد المنصورة) قالولة ادى امكانياتنا وعلى قد لحافك واخبط دماغك فى الحيط!!!!
يا جمااااعة دة مش معمل فى مدرسة.. وبدل ما تصرفوا على حفلات نانسى وهيف ومارينا والكفتة اللى انتوا عايشين فيها.. اهتموا اكتر بالبحث العلمى.. ادولة ودن من طين والتنية برضة من طين؟
طب اية العمل.. المشكلة مش فية هوة.. وانتى عارفة بقى؟
ما شؤبتش من نيلهاااا
بلا نييييلة
انا طولت.. انا اسف بس مش احنا بنتناقش يا جميل
تحياتى

Layla يقول...

في لعبات كتيرة مالهاش شعبية ومع ذلك داخلة في الاوليمبياد زي كرة الريشة اللي مش بتتلعب غير في دول شرق اسيا و سباق العجل الBMX .. مش بس البيسبول و الكرة الشاطئية

لو مصر نظمت ممكن تدخل كرة السرعة والاسكواش و البلاي استاشن ضمن الالعاب


بس بصراحة انا فرحان في الامريكان.. في الجمباز معرفوش يعملوا اي حاجة مع الصينيين.. وفي العاب القوى كانوا بياكلوا التراب ورا الجامايكيين

الامريكان هيراجعوا نفسهم جامد بعد البطولة دي

ملحوظة..العاب القوى و كرة السلة من غير رياض شارة مالهاش طعم.. جربي تتفرجي عليهم من تعليق اي حد تاني و هتحسي بالفرق

mohra يقول...

صباح الصباح
فنى معمل ؟تريقه دى و لا ايه؟؟
طبعا احنا بنتناقش و كل اللى بتقوله حصل فعلا مع زويل بس امتى؟؟؟
هو ده اللى اباتكلم فيه..الراجل جه مصر لاول مره بعد هجرته ب25 سنه بعد نوبل يعنى (من لسانه شخصيا)و طول الفتره اللى قبلها كان بيدرس فى كل العالم و منهم اسرائيل
طب ليه يسيب بلده تماما بالشكل ده
ده فى ناس اعتقلت و اتمرمطت بمعنى الكلمه و ماهجرتش
قصدى انه كان لازم يحاول اكتر من كده
و طول براحتك
البيت بيتك


M@RV3L
معاك حق تماما...بس اللعبات ديه مادخلتش نتيخه ضغط خارجى او محاوله لارضاء طرف معين
طبعا بيكون فى محاولات لمجاملات الدوله المضيفه ...طبيعى مش بس امريكا

عامه انا اعتراضى انه ايه هى الكره الشاطئيه يعنى طب ما نعمل الجبليه كمان و لا نخليها سله و قدم شاطئيه و لا ندخل الراكت...يعنى الباسبول و قلنا لعبه حتى لو مافيش غيرهم بيلعبها بس شاطئيه و جويه ....تهريج
بس بجد انا كمان فرحانه فيهم ...اتبهدلوا

blue-wave يقول...

ايه الروعه دى؟
بجد بوست هايل متخم بالمعلومات
دا عاوز يتقرى كدا على رواقه خالص
بس عجبتنى حكاية فيلبس
واعتراف الصربى باحقيته فى الميدالبيه
تحياتى

Zianour يقول...

التحليل ده اجمل من التحاليل اللي كنت باتابعها على راديو كندا الدولي وبداخلي حنين ودبيب خفي انه سيذكر اسمك يا بلدي في يوم من الايام

بس سيبك انتي هنا طبل وزمر لان كندا فازت بيجي 9 ميدليات اعلاه فضية فيما اذكر لاني بطلت اتابع

بس شوفتي الصين والابهار والاعجاز اللي عملته في الحفلتين

هما خدوها تحدي وندية لذلك احتلوا المركز الاول

باقول لك

قشطة

ولا بلاش انهزامية

كل سنة وانتي طيبة رمضان كريم

جبتي الفانوس ابو شمعة ولا لسه

اوعي تكوني جبتي فانوس صيني

نور وزياد هيشرفهم انهم يشوفوكي ف يوم من الايام

بوسات كتيرة

mohra يقول...

blue-wave
انا مبسوطه انه عجبك
ماتوقعتش ان حد يقراه من اساسه


Zianour
تحليل مره واحده...الله يخليكى
للاسف ماشفتش الحفلتين
على فكره جو الاحتفلات ده معدى حتى لو مالكيش دعوه بيه...مناسب لرمضان يعنى

انا عندى فوانيس تذكاريه قد الكف من الصاج ...قد نور و زياد
سلمى عليهم كتير

صباح الصباح يقول...

لا طبعا انا مش ياتريق
البوست فعلا فنى معملى.. اصدى specified and technical بالدلائل والارقام
اوعى تكونى زعلتى.

صباح الصباح يقول...

وبعدين اديكى قولتى بنفسك
فية ناس اعتقلوا واتمرمطوا وشافوا الويل وقلة الادب اللى فى الدنيا كلها من البلد.. من البلد اللى هية المفروض اهلهم!!!!!!
يبقى يقعدوا لية
تانى هاقولك
ما شربتش من نيلها!!!!!!!!!!!!!!!!
تقبلى تحياتى يا جمييييل

مهرة سالم يقول...

شكرا على البوست الرائع ..
المليئ بالمعلومات ..والتهكمات الممتعه..
مع تحياتي..

micheal يقول...

ولا تزعلي روحك..الصين البطل وبفارق 15 ذهبية كمان..صباحو ذل يا أمريكت
:)
يعني الدورة طول عمرها حكرا علي أمريكا والاتحاد السوفيتني حتي عام 1992 ومن أول دورة 1996 والهيمنة الامريكية مستمرة إنما علي مين..دي الصين
والمدهش أن الصين حصدت أول يميداليتها في لوس أنجيلوس 1984 وبعدين ترتيبها كان ال11 في سيول 1988 وبعيدن الرابع في برشلونة 1992 وأتالانتا 1996 وبعدين الثالث في سيدني 2000 ثم الثاني في أثينا 2004..شفتي النظام
:)
تحياتي

alzaher يقول...

لست من محبي متابعة الرياضة بطبيعتي
أضيفي الى ذلك أنني كنت خارج القاهرة في توقيت الأولمبياد
فلم أتابعها
لكنني أتصور انها يمكن أن تلخص في كلمة واحدة
"فازت الصين...وخسر العرب"!

تايه في وسط البلد يقول...

مهرة
تقرير شامل وفي منتهي العمق
وعلي الرغم من انني لم ار ولا مشهد من مشاهد الدورة الا انني استمتعت جدا بالتقرير والذي صنعتي له خلفية ثقافية وفكرية في منتهي العمق والاستنارة
موقفك من زويل مفهوم وان كنت اتصور ان هناك بعضهم ممن ليس لهم وطن سوي افكارهم اينما كانت وكيفما تحققت

وعرفت ايضا ان كل الناس ليسوا عبد الناصر وليسوا شاهين وليسوا نجيب محفوظ وليسوا ..

اختصارا فضلت ان اخذ الناس علي عواهنهم
*************
كل عام وانت بخير
واعاد الله رمضان عليكي بالخير واليمن والمغفرة

snohe يقول...

كل عام وانت بخير بمناسبة شهر رمضان المبارك


شكرا

الميكروباص يقول...

اليهود يسرقون كل شيء
حتى الأفلام العالميه يعرضوها في التليفزيون الحكومي الاسرائيلي وهي لسه في السينما في أمريكا
كده بالدراع
ومفيش حد يقدر يتكلم معاهم
هي العمليه بلطجه
عشان كده الخنازير دول مش نافع معاهم حاجه
لا تفاوض ولا غير تفاوض
دول لازم اللي يتعامل معاهم يضربهم على دماغهم
بس الومين دول وقتهم مع الأسف


مجهود جبار في الموضوع
سلمت يداك

موناليزا يقول...

اشكرك على هذا التحليل الوافى لانى لم اتابعها من اصله

وكل سنة وانتى طيبة ويارب يكون رمضان سعيد علينا جميعا

rovy يقول...

كل عام وانتى بخير
رمضان كريم .. و ايامه مباركه علينا جميعا ان شاء الرحمن ..

بوست رائع و مجهود مشكور

خالص التقدير و التحيه

الربان يقول...

تحياتي يادكتورة


بالنسبة لمارك فيلبس...تعرفي حضرتك
انه كان Hyper activity ...و ان
الاهل استغلوا هذا في تعليمه السباحة
و هو يتمرن 6 ساعات يوميا....

لو كان في بلد عربي لاسرعوا باعطائة
ادوية و علاجات مختلفة ليتخلف عن الاخرين.


تحياتي و تقديري

المستنصر بالله يقول...

موضوع مفيد جدا وماشاء الله معلوماتك غزيره
كل سنه وحضرتك طيبة
رمضان كريم ومبارك عليكى

mohra يقول...

صباح الصباح
لا طبعا مازعلتش
عامه ما ينفعش نهج كلنا و لا ايه؟؟؟
كل سنه و انت طيب


M.K
الله يخليك
نورت المدونه
اتمنى انك تكرر الزياره


micheal
معاك حق و الله
نظام نظام نظام


alzaher
اوجزت و انجزت
تحياتى


تايه في وسط البلد
اخجلتم تواضعنا يا فندم
تقرير مره واحده
"اختصارا فضلت ان اخذ الناس علي عواهنهم"
حكمه تسهل الحياه لو اتبعناها
كل سنه و انت طيب


snohe
كل سنه و انت طيب


لورنس العرب
فعلا يسرقوا الكحل من العين
خنازير زى ما انت قلت
كل سنه و انت طيب


موناليزا
يا ريت تتابعيها المره الجايه
بيبقى فيها حاجات لطيفه
ربنا يسعدنا جميعا و كل سنه و انتى طيبه


rovy
الله اكرم يا روفى
و كل سنه و انتى طيبه



الربان
اول مره اعرف المعلومه دى
شكرا لك
كل سنه و انت طيب يا استاذ



المستنصر بالله
شكرا لك
كل سنه و حضرتك طيب
تحياتى

!!! عارفة ... مش عارف ليه يقول...

كل عام وأنتم بخير

اللهم تقبل منا صيامنا وقيامنا وركوعنا وسجودنا

رمضان كريم
وليد

Zianour يقول...

مهرتي الجميلة

حبيت بس امر

واسلم عليكي

اصلي بجد..

باتونس بيكي

رمضان كريم
زيانور

:))))))

Unknown يقول...

ان شاء الله يوم السبت الموافق 13/9
هيكون فى تجمع للتبرع فى مستشفى ابو الريش للاطفال
بناء على اقتراح قوس قزح
اتمنى انى اشوفكم هناك
تعالوا نحاول نرسم بسمه ونطهر ذنب
وبعدين هيكون فى افطار جماعى

Unknown يقول...

كان لازم
اجى واقولك جزاك الله خيراا
على التصحيح
ربنا يبارك فيك
ويارب تعرفى تجى يجد
ربنا يوفقك

mohra يقول...

عارفة ... مش عارف ليه
ربنا يتقبل منا و منكم
كل سنه و انت طيب

Zianour
انا اللى بتونس بيكى يا ام الولاد
كل سنه و انتى طيبه


نهر الحب
ربنا يجازيكى على قد تعبك و نيتك
شكر على ايه بس
انا كمان كنت اتمنى انى اكون موجوده لكن اظن انى مش هاقدر
ربنا يوفقكوا ان شاء الله و كل سنه و انتى طيبه

زمرده يقول...

ههههه .. يابنتي مالك ومال الرياضه
اعملي تقرير عن صينيه البسبوسه
عن طبق الكنافه ..
عن الفطور عن السحور "همي بطني"
قلت اجي اشوف يمكن القيكي حاطه كم
وصفه اجربهم "القيها رياضه في رياضه"

عموما ياستي تقرير ظريف ولو اني قاطعت
الرياضه من زماااان
بس بجد عجبني
وعجبني اكثر اشارتك لاننا شعوب تصفق
وتشجع وتبارك لاي شى من الغرب
في حين لوالباحث عندنا وبيننا مابنقدره
ولا بنعطيه حقه الا يمكن "يمكن" بعد موته

وكل عام وانتي بخير

ADMIN يقول...

البوست دا جااااااااااااااااااامد
شكرا ليكى

.:.-=- ELGaZaLy-=-.:. يقول...

دكتورة دكتورة يعنى..

:)
البوست عملى جداا ومفيد وجميل ومنسق..

بس دة الطبيعى ..الرياضة والسياسة غالبا يبقو وجهين لعملة واحدة..

اسف على تاخر الزيارة ..رمضان كريم

mohra يقول...

.:.-=- ELGaZaLy-=-.:.

كل سنه و انت طيب
و مفيش اسف خالص..مرحب بك فى اى وقت

MoHaMeD - AmEeN - Al.MaSrY يقول...

يمكن أول تعليق ليا على صفحة المدونه المحترمه جدا..وأصريت على صفة الاحترام والصاقها بالمدونه لانها احترمت كثيرا عقلية القارئ...لن أقول أكثر ماعلق به الزملاء والذي جاء بعضه طريف (كعادتنا يعني) وبعضه يحمل مشاعر متناقضه تجاه علمائنا..الانتماء الى الوطن ليس شيئا يستطيع ان يكتسبه الانسان ولكنه طبع وأجواء عاش فيها منذ الطفوله ولم تخلق جميع الناس ذات طباع واحده فكلنا نختلف عن بعضنا البعض في الطباع وهنا جاء الفارق بين أحمد زويل ومجدى يعقوب وغيرهم اذا اعتبرت ان هناك فارق وخضعت لمقولتك ان مجدي نحت في الصخر كما قلتي....لكني أرى أيضا ان الانتماء الى الوطن يقل كلما زاد كم التهجم والتسخف والتعامل مع العقول بعدم احترام وعدم نظام....النظام الذي قدر علينا كشعب ان نكون غير منظمين حتى في ابسط امورنا الحياتيه ومن أراد أن يقلع عن ذلك فليس منا وليذهب بعيدا...النظام الذي لفت انتباهي في أحد التعليقات التي قالها الاخوه بتقدم الصين في المراكز من عام 82 وحتى الان.....ولا أدرى ماذا أقول لكن الخلاصه..قدر ومحتوم ومن حاول التغيير أقصي الى فلوريدا فنسى..ولله عاقبة الامور...اللهم إنك كريم حليم حب العفو فاعفو عنا.أمين

mohra يقول...

MoHaMeD - AmEeN - Al.MaSrY
اول تعليق و ان شاء الله ما يكونش الاخير
يسعدنى جدا ان يقرأ احدهم ما كتبت و لو متأخرا ..اشعر ان التعليق كان بدافع حقيقى و ليس مجامله
اوافقك تماما على كل ما قلت
عوامل الطرد هنا تٌضعف الانتماء و الفوضى تضرب فى كل جزء من حياتنا
و لكن وجود افراد تدرك هذا قد يؤدى الى التغيير يوما ما و ان كان بعيدا..او لعلى اتمنى

خالص تحياتى