السبت، 21 يونيو 2008

الدبلوماسى


الدنيا حر موت و انا مش قادره اتنفس ولا اكتب و لا اعمل اى حاجه عشان كده دوٌرت فى دفاترى القديمه و قلت بالمره تغييراً للحاله النفسيه السيئه قررت احكيلكوا تجاربى مع العرسان

الحكايه ديه اول حاجه كتبتها فى عالم التدوين و نشرتها فى "بيت العرايس و العرسان"


الدبلوماسى


من حوالي سنتين و انا في معمعه الاستعداد للامتحانات,امتحانات الماجستير طبعا لحسن حد يتجن في عقله و يفتكرني لسه صغيره,ماما جت و قالتلي

-جايللك عريس


-تاني

-تاني ايه,انت متلخبطه في العدد والا ايه

-ههه
-المره دي دبلوماسي و مش هتقدري ترفضي
-و ده يتقدملي ليه اقصد يعرفني منين

-طنط فلانه تعرف مامته, بس؟ بس؟ بس؟

-بس ايه؟

-عايزين يشوفوا صورتك الاول
-ايه,دي اهانه ,انا لا اقبل,استحاله

-براحتك

-استني بس,الدنيا مش قفش كده امري لله لو ما كنتيش تلحي


بدايه سيئه لاني فعلا مش فوتوجنيك,يلا برضه لو رفض تبقي في بيتها يعني ماحدش يعرف غير انا وماما وبابا و طنط و ما.. و و و و,يعني حوالي 20 نفر بس ..الغريبه ان بعد اسبوع ماماجت منشكحه قوي و بتقولي انه عايز يقابلني,يظهر ان نظره ضعيف

-ها... يجيلليك الشغل؟

-اوعي يهوب هناك,احنا ناقصين وقف حال,احنا نتقابل في ارض-محايده ولا يستني احسن لما اخلص امتحانات عشان اروق له

-ما انتي بترفضي كل العرسان, يعني نقول للراجل استني شهر و نصف و بعدين تقولي لا

-معاك حق,الي الارض المحايده

يا ريت نفتكر الحوار الاخير ده لانه مهم جداو قد كان ,ويا مهرة نعرفك على ماهر ههههههه
و هاتك يا ضحك من كل الستات اللي قاعده ,بس يا حلاوه يا ولاد تقولش امين شرطه اسم الله و لا دبلوماسي,علي رأي السندريلا الله يرحمها,صحيح هو ابعد ما يكون عن حسين فهمي بس هو مقبول جدا و لابس بدله,نخش في الجد بقه,برضه شكله ذكي و عاقل و مبتسم,بس حاجه داخليه كده قالتلي انه مش ناوي و قبل ما نعبر حدود الارض المحايده كنت قلتلهم كده و انا بضحك "لا طبعا,الولد شكله مبسوط و مبتسم,انتي لسه صغيره,علي كل حال انتي بتضحكي علي ايه,اشششششششششش "هشيت بما اني صغيره و دي مجامله ما مبتحصلش كتير دلوقت,سبحان الله ما عداش سواد الليل و كانوا متصلين يقولوا انهم موافقين و مبسوطين,يظهر اني فعلا ما بفهمش....و عايزيين يتقابلوا تاني,صوتت بالبلدي زي بنت سلطح باب
ا

-و الامتحانات

-امتحانات ايه؟

-ناقص اسبوع يا ماما

-يوووووه,دا الاسبوع فيه 7 ايام ,في 24 ساعه في 60....

هاقابله,ماما ممكن تستمر لغايه الفمتو ثانيه,لو اظهرت اي مقاومه,و بالفعل في عز نقحه الشمس نزلنا و انا لابسه البلوفر الهاي كول و الكعب 7 سم لزوم حفله الكوكتيل اللي احنا رايحينها و اذ فجأه شخص ما اقترح ان انا و هو نتمشي في الغالب امه,يا دي المصيبه و ال7 سم ,قمت ولا حول و لا قوه الا بالله ,بس التضحيه الكبيره دي جت بفايده و اتفكت عقده لسانه وهاتك يا كلام اشي سياسه خارجيه علي حزب العمل الاسرائيلي علي ابن جني, اي و الله, جني امايعفرت كيانك يا بعيد, بس سيبكوا من الهزار انا اتكيفت من الكلمتين دول ما نا قلتلكوا اني مهيسه قديمه و احب الحاجات دي زي عينيه,بس الحر يا اعزائي ,بقيت عامله زي الفراخ المسلوقه و بعد ما كان قلبي بس بينزف بقت رجلي كمان ,لحد هنا و استوب لازم اقعد,تقريبا ما عجبوش اللي حصل و سكت ,يظهر برمجه الكلام عنده علي الواقف بس,المهم رجعت البيت و انا لسه مقتنعه برأيي ,بس كلهم وقفوا ضدي و قالولي انه كان مبتسم
عدي اسبوع كمان و بدأت امتحانات و هما و لا حس و لا خبر حتي ماما بدأ يتزعزع ايمانها العتيد و ما خبيش عليكوا انا كمان قلقت,صحيح هم ما قالوش غير انهم موافقين بس الساعه البيلوجيه بتاعتي ما كنتش مطمنه,كمان ما يصحش ما يسألوش عليا و انا بامتحن,المهم اتصلوا و عايزيين يتقابلوا...شوف الظلم يا جدع طلعوا ماكانوش عايزين يعطلوني,
ماما ماعجبهاش الكلام ده كله الا الكرامه و مسكت طنط فلانه
-ولو هو مش عايز,خلاص كل منمنا يروح لحاله
و طنط يا عيني صعبت عليا قدام الهجوم الكاسح و اعترفت والله العظيم هو مبسوط و موافق,نزل عليا الكلام ده بردا و سلاما و اقعدت احلم بقه بلا مذاكره بلاهم,الست مالهاش الا بيتها برضه و اتقابلنا لثالث مره,المره دي عملت احتيطاتي و لبست جينز و زحافي لزوم المارثون و بالفعل 3 ساعات من المشي المتواصل لما رجلي بقيت زي رجلين اطفال الشوارع,اه نسيت اقولكوا حاجه مهمه,امه اقصد والدته اخدت ماما و قعدتها علي دكه في الشارع اللي في النادي , و بعد ما رجعينا من اللف عزمتها علي مياه معدنيه و الله العظيم و ده اللي اكد عند ماما شكها بانهم بخلاء بس دي كلها سفاسف زي مانتو عارفين و لا يمكن توقف موضوع عرفوا ينتزعوا مني موافقه عليه,احكيلكوا بقه علي المارثون طبق الاصل العل.. المره الفاتت بس الحقيقه المره دي كان مبسوط فعلا و قعد يتكلم عن نفسه و عن السياسه الخارجيه برضه و تعرفي فوكوياما؟ ههه وقعيت في حيص بيص,و ده ايه دا كمان؟ اكله صيني و لا ماركه موبايل؟المهم هاقولوكوا واكتبوها يمكن تنفعكوا,ده الراجل بتاع صراع الحضارات و حضاره الصراعات,ما علينا الموضوع كان فيه اسامي كتيره بس بلاش نجيب في سيره الناس ,اهم حاجه اني المره دي لبست السلطانيه فعلاحسيت انه خلاص ماهر لمهرة و حصوة في عين اللي ما يصلي علي النبي ,ده حتي ماكنش عايز يمشي.... و ثبتت الرؤيه و ما حكيلكوش عن الايام و الاحلام


تسألوني يا جلال,جلال مين,ايه يا مهرة اللي حصل؟ما حصلش حاجه خالص,خالصصص؟مالللللللللللللللللللللللص ...
غطس ماقبش,هنا لازم حد يفرملني والا هاستمر في الكتابه للابد اييييييييه دنيا,و بعد شهر و نصف بالضبط من بدايه الموضوع المنيل ده,اتصلت طنط فلانه و قالت ان مافيش نصيب,يا سلااااااااااااااام و جاي علي نفسك ليه؟اقول ايه بس؟ فاكرين الحوار,حسبي الله و نعم الوكيل,بصقه موجهه لوشي بدون اي ذنب و ربنا يشمتتني فيك يا اخي شماتي في العريس رقم 13 ,اما تفسيري للحصل ان الاخ متأثر بالسياسه الامريكيه "الغابه غابتنا نبرطع براحتنا" عامه انا من يومها طلقت السياسه و ما رحتش انتخب كمان في انتخابات مجلس الشوري,هه!!!,و مركزه دلوقت في العرسان من وزاره التأمين و المعاشات بعد فشلي مع وزارات الصحه والداخليه والخارجيه و برضه الدهن في العتاقي

هناك 43 تعليقًا:

فاتيما يقول...

يعنى يا مهرة
الواد أتفسحله شويتين و أول ملقى الموضوع دخل فى الجد
فلسع
عاااادى
هوه جواز الصالونات كدا
مجهول المعالم و التحركات
بس كتير بييجى منه حد محترم
و دا غالباً بيحصل وقت ما بيكون ربنا كاتب نصيب
و دبلوماسى إيه يا ماما
و فوكوياما إيه دا روآخر
مش دا بتاع نظرية نهاية التاريخ ؟؟
طب يعنى مجبش حاجة من المريخ برضو
الحمد لله الموضوع متمش
عشان شكله مدعى ثقافة
و بخيل فى مشاعره قبل فلوسه
و حاطط على قلبه حجر

!!! عارفة ... مش عارف ليه يقول...

أولاً بما إنك واحدة من الحرافيش
إسمحي لي أضيفك عندي مع الحراقيش
إللي بتابعهم

---------

البوست هايل وفيه تلقائية وبساطة
أسلوبك سهل جداً وممتع بيشد الواحد لحد النهاية

تحياتي

.:.-=- ELGaZaLy-=-.:. يقول...

ههههههههههههههههههه

----------------------

عايزين يشوفوا صورتك الاول

-ايه,دي اهانه ,انا لا اقبل,استحاله

-براحتك

-استني بس,الدنيا مش قفش كده امري لله لو ما كنتيش تلحي
-----------------------------

عجبتنى وجعلتنى ابتسم

الميكروباص يقول...

ياستي راح في ...
بكره ييجي غيره
وبعدين ايه فوكوياما ده
الأخ جاي يتجوز ولا يستعرض معلومات

blue-wave يقول...

اسلوبك تحفه بجد
وانتى دمك زى العسل واحمدى ربنا كان زماننا جايبينك دلوقتى من حدود ليبيا:)
تحياتى

سبهللة يقول...

هم العرسان انطسوا فى نظرهم لما يسبوا عسل زيكيعدى من بين ايديهم؟؟
عالعموم هم اللى خسرانين
ودة بالذات يستاهل
بكرة يقع فى واحدة تلع عليه القديم والجديد كله
وحقك محفوظ
هى هاتخدهوليك
تحياتى ليكى يا سكر مكرر
وبالتوفيق ان شاء الله

Sou يقول...

أنا كمان بكره حركة الصوره دي أوي مش عاجان الوش مش فوتوجينك بس بحس إن الشخص ساب كل حاجه ومركز في الشكل والجمال اللي ممكن يروح بعد وقت ..وكمان شخص مش عاقل بما فيه الكفايه مش يمكن الصوره تكون غير الواقع تماما وغالبا بتكون غير الواقع والروح والشخصيه يتطفي لمسه رائعه لا تساوي الشكل أبدا

rovy يقول...

اسلوبك جميل و حقيقى شدنى لاخر كلمه
ان شاء الله المره الجايه اجى ابارك
واضح ان الدبلوماسى ده كان منفوخ على الفاضى الحمد لله انك ما اتدبستيش فيه .. بكره ربنا يرزقك بنصيب يسعدك وان شاء الله قريب ..
تحياتى
rovy

mohra يقول...

فاتيما
اسم الله عليكى ...هو ده...و الحاج هنتجتون هو بتاع الصراعات (عشان محبى الدقه بس انا اسمه كان تقيل على قلبى الحقيقه)

عارفة ... مش عارف ليه
يا خبر ...اسمحللك ...ده انا يحصلى الشرف يا فندم

ELGaZaLy
الله يخليك

لورنس العرب
اكيد مش جاى يتجوز و الدليل..........قالولو


blue-wave
حدود ليبيا ...هى حصلت؟ليه كده يا دكتور؟؟؟؟


سبهللة عالاخر
شكرا لكى يا جميله ...نورتى المدونه

Heart Whispers
انا معاكى تماما....بس هو الواحد بيكره حاجات كتيره و بيعديها يمكن المركب تمشى


rovy
يسمع من بقك ربنا

bastokka طهقانة يقول...

hhhhhhhhhhh
lazeza ya mohra
ew3y teegawezy ya benty

تايه في وسط البلد يقول...

كيفك يا مهرة في الحر ده؟!!

بوست جميل جدا مناسب جدا للترطيب في الجو ده
لكن انا فعلا طلع لي سؤال يلح علي خاطري (حلوة دي؟)ه
هو ممكن حد يقبل بشخص ذي معتقدات تخالف معتقداته ووجهات نظره؟

السؤال يهمني واتمني لو حد عنده اي اجتهاد في الاجابة..خصوصا من الجنس الناعم

الربان يقول...

تحياتي

حقيقي انا توهت منك بين القبول و الرفض...و الدبلوماسية و الحنية المفقودة...

في رأيي ، ان اجمل ما يقال بين الرجل و المرأة هو كلمات الحب و المستقبل المشترك
بعيدا عن الدبلوماسية و السياسة و مشاكل العالم...

ايضا في رأيي ، ان حظك جيد يادكتورة
لانك هربتي من مشكلة ايران و فتح و حماس
الا انني كنت أتمني ان يكون لديه حماس و يدخل بقلب سليم و ينتفض بخطوبة تنتهي بفتح مبين بزواج...

المهم...ان شاء الله ربنا يكون وفقك في امتحان الماجستير...و عقبال الدكتوراة
يا سعادة الاستشارية...

تحياتي و تقديري

mohra يقول...

طهقانه
ما تقلقيش ادينى قاعده اهوه



تايه في وسط البلد
انا خلاص هفطس...مش عارفه ايه ده ؟طاقه من جهنم اتفتحت علينا

هو ممكن حد يقبل بشخص ذي معتقدات تخالف معتقداته ووجهات نظره؟
اعتقد ان الناس كلها بتعمل كده (باستثناء اختلاف المعتقدات الدينيه)سواء نتيجه للمشاعر او رغبه فى الزواج و السلام
هل ده صح او غلط؟؟؟اكيد الواحد لازم يدور على حد يشبه له لكن لو تعذر هل الاختلاف مرفوض؟؟
اظن لو مفيش تضاد(يعنى معتقدات عكس بعضها)المركب هتمشى و السعاده ممكنه و بالذات لو فى مشاعر
انا عن نفسى بحاول اتفهم الاختلاف
بحاول


الربان
استشاريه مره واحده
يسمع من بقك ربنا
بس بما انك سألت ..النتيجه لسه طالعه
و بقى معايا ماجستير رسمى نظمى فهمى
:)

arsenalwy يقول...

هههههههههة

دمك زى العسل يادوك

ياستى ولا تزعلى نفسك الحياة هتبقى لوز وقريب هيجيلك سفير

أن شاء الله

اول زيارة ليا واتلمدونة عجبانى جدا

الحمقاء المضلله innominate x يقول...

عادي عادي يا عبد الهادي .......عارفه أيه المشكله؟؟؟؟ المشكله مش انه انسحب المشكله انه فضل يوهمك لأخر لحظه انه مبسوط.....

أنا أعرف من القصص دي كتير يديكي الأمان ان كل حاجه تمام مع الإبتسامه العريضه و يعيشك الوهم و بعدين.....................................................................................هوب فص ملح و داب راح مع الي راحو في 67

زمرده يقول...

هههههههههههه .. عسل والله
حسيت ان نفسي قرب ينقطع وانا اتابع
الاحداث .. وكل شويه اقول خلالالاص الان
بتكتب وقد تحدد موعد الزفاف في ....
طبعا هذا لاني ما انتبهت للمكتوب فوق
على طول دخلت في الحوار ..
ولكن لمن وصلت للنهايه رجعت من جديد
واكتشفت انه موضوع قديم
والحمد لله على سلامتك
ربي يرزقك بالصالح ابن الحلال الى يقدرك
ويبارك لك في حياتك وفي روحك الحلوه

انتظر جديدك
ووفقك الله

غير معرف يقول...

عزيزتي مهره

فكرتيني بحكايه لسه واحده زميلتي بتحكيهالي عن واحد ظابط اتقدم لواحده قريبتها فالمهم اتخطبوا و كان معجب جدا بشخصيتها
بعد شهر من الخطوبه بدأ يقولها ماتبطلي لبس الجيبات و البلوزات دي بتحسسيني كأني ماشي مع خالتي او مامتي فين الباديهات فين الجينزات المحزقه و كمان عايز اقولك ماتخلعي الحجاب
فردت قالتله انت خاطبني و انا لابساه ايه اللي اغتير قالها ماانا حسيت من شخصيتك انك ممكن تخلعيه و اصل انا مترشح لمنصب في الخارجيه كمان احنا بقالنا شهر و علاقتنا ماتقدمتش خطوه واحده لقدام
المهم البنت فسخت الخطوبه غير نادمه

للاسف يامهره الشباب دلوقتي مؤمنين بمثل اللي تغلبوا العبه يعني علي اد ماتقدر خود ايام الخطوبه عشان مفيش حاجه مضمونه

المهم انك بخير و اسفه لو كنت طولت في اول زياره بس موضوعك شدني

تحياتي ليكي و يومك جميل و اتمني تقبلي مروري

سارة درويش يقول...

هههههههههههههههههههههههههههههههههههههههههههههه

والله انتى زى السكر

يابنتى ربنا رحمك

دا كان هيعيشك فى مقر قناة الجزيرة هههههههههه

سين سؤال مالوش دعوة بالموضوع : هو انتى اسمك الحقيقى مهرة ؟؟

لو مش عايزة تقولى اسمك عادى مش تقولى بس عايزة اعرف اسمك مهرة ولا لأ ؟؟

Miss. Sosa يقول...

ههههههههه
مهرة وماهر ايوه ايوه انا قريت القصة ديه في بيت العرسان والعرايس

بتاعت فوكوياما مش عارفة يااختي اي الاشكال الموبؤة اللي بتتحدف علينا ديه
على فكرة انتي دمك زي العسل وشخصية جميلة جدا وربنا هيرزقك بالزوج الصالح ان شاء الله
بس لا تقلقي هي حالة الكساد منتشرة في البلاد خصوصا مع البنات خريجات كليات القمة غالبا النق ملاحقنا
فكرك لو كنتي معهد تمريض كان زمانك معاكى اربع عيال وابوهم هدية ههههههه

mohra يقول...

arsenalwy
بلاش سفير...اصله هيكون عجوز
نورت المدونه


الحمقاء المضلله innominate x
انت كمان عارفه موضوع 67 انا من زمان بقول ان الرجاله ماتت فى الحرب


زمرده
ازيك يا جميله؟؟يسمع من بقك ربناو يسعدنا جميعا يا رب


اجندا حمرا
شرفتينى و نورتينى
مش عارفه ايه اللى جرى للناس ...يعنى مش كفايه رافض الحجاب كمان يختار واحده لابساه علشان يقلعهولها بعد كده
بلاوى صحيح


سمو الأميرة سارة
اهلا بسمو الاميره
مادامت قناه الجزيره يبقى قدر ولطف


Miss. Sosa
اهلا برفيقه الكفاح
الاشكال الموبؤه...ههههههههههه
بلاش و النبى تجيبيلى سيره التمريض لحسن الواحد مش عارف يلاقيها منين و لا منين

واثقة بربها يقول...

هههههههههههه
زى العسل اسلوبك جميل و بسيط
كويس يا ستى كان شكله واحد تايهه

زمرده يقول...

عدنااا من جديد

أختي العزيزه وصلني من يومين
واجب وتاج من اخت عزيزه
وكان مفروض اختار 6 اشخاص
واخترتك من بينهم ..
اتمنى تاخذى الواجب
والله يكثر من تيجانك يا ستي
هذا ربط الموضوع
http://yahalaa.blogspot.com/2008/06/blog-post_28.html

ولك خالص التقدير

شفـقــة و إحســــان يقول...

بوست حلو اوى ودمه خفيف

الربان يقول...

تحياتي

الف الف مبروك الماجستير...و عقبال الاستشارية ان شاء الله...

الحمد لله انك اصبحت من اصحاب الماجستير
و ربنا يوفق الجميع...

عذرا علي السؤال... اي تخصص تخصصك.؟

كلام على بلاطة يقول...

وبعدين يا مهرة
انتى بورتى نص وزارات البلد
كده هيحصل انهيار دستورى
اقبل العريس الجاى
وان شاء من وزارة رغيف العيش
اقصد التضامن وتضمنى انتظامك فى الحصول على الرغيف المدعم
تحياتى

موناليزا يقول...

خيرها فى غيرها محدش عارف الخير فين

mohra يقول...

واثقة بربها
طب هو تايه انا ذنبى ايه؟؟؟


زمرده
عود احمد للعزيزه زمرده
شكرا على الواجب و هاحله على طول علشان ما تقوليش عليا بليده :)


شفقة هانم واحسان بك
ربنا يخليكوا و يجعل بيوت المحسنين عمار و هنيالك يا فا.......(انا شكلى سرحت)

الربان
الله يبارك فيك و يسمع من بقك
انا دكتوره كحه و بلغم و ما شابه
حاجه مقززه مش كده؟؟؟



كلام على بلاطة
طب اعمل ايه ما هو ده اللى موجود فى السوق
بس انا هافكر بضمير فى عريس العيش ده اصل ماينفعش اضيع فرصه زى ديه


موناليزا
معاك حق ...الاول كنت زعلانه لكن دلوقت بضحك لما افتكر
نورتينى

Desert cat يقول...

انا كنت قريت القصة دى فى بيت العرايس والعرسان فعلا لانى من اشد المتابعين لبرايد وطبعا هو نفس رائيى الاولانى
راح وخد الشر معاه
اسلوبك فى الكتابة جميل
تحياتى

شفـقــة و إحســــان يقول...

البوست حلو جدا بس سيبك منهم ده مفيش غيرى قيمة ومركز ووظيفة ميرى
ههههههههههههه
احسان اللوذعى

mohra يقول...

Desert cat
فعلا ريح و استريح
شكرا لزيارتك


شفقة هانم واحسان بك
رغم الاغراء القوى(و بالذات فى ظل ازمه الرجاله بقوا زى العيش كده...شاحين فى السوق)
انا مضطره ارفض اصلى زى الفريك ماليش شريك و سلملى على شفقه هانم

سنووايت يقول...

جواز الصالونات دا بيجي منه بلاوي
بس الحمدلله ان جت علي كدة
انا مش باتغاظ من حاجة قد ما حد يقول عايز يشو صورتك دي
هو هيتجوز صورة!!
هو الموضوع كان باين من اول :)
بس اللي نصيبك فعلا معاه هيبان من اوله برده

Ma 3lina يقول...

هوا الخسراان اكيد

سؤال لابسة ليه هاىكول فى الصيف ؟؟؟

momken يقول...

ههههههههههههه
دمك شربات
مش عارف ايه العرسان الى عامله زى مذعين كوره القدم دى

انه كاى يعمل اعلان عن نفسه وثقافته

يمشى يا ستى وهجبلك سيد سيده

تحياتى

بداية يقول...

معكى حق يا اختى
والله دا حرام
وبعدين الرجل اللى عاوز يخطب او يتجوز بجد يخد قراره من اول مره وميدوخش بنات
الناس معاه
ولكن مفيش نصيب انك تتجوزيه
لانك لن تتزوجى الا زوجك الذى قسمه الله لكى
ةاسأل الله ان يزوج بنات المسلميين....... آميييييييين

Sou يقول...

ياريت تدوني رأيكم في أخر بوست ليا وادوني حل لمشكلتي

mohra يقول...

سنووايت
هو فعلا كان باين من الاول بس الواحد بيقاوح و يقول يمكن
نورتينى


Ma 3lina
خسران و عدمان وكحيان كمان
يا ستى انا كنت مرزوعه باذاكر و ماكنتش اعرف ان الصيف جه و بعدين بقولك حفله كوكتييييييييل


momken
ماشى يا سيدى ...فين بقه سيد سيده؟؟؟


بداية
آميييييييين
نورت المدونه و اتمنى تكرار الزياره



Heart Whispers
انا لسه قرياها دلوقت و رديت
يا ريت اكون ساعدتك
تحياتى

كوارث يقول...

هههههههههههههه
تحيا مصر ..
اسلوبك جميل جدًا
وبالنسبة للعريس
فثقييييييييييييي
ان الطيور على اشكالها تقع
اكيد اتعمل فيه المقلب ده تسعتاشر مرة !

micheal يقول...

ههههههههه...العرسان علي قفا من يشيل يا مهرة
:)
بس بجد أسلوبك زي العسل
تحياتي

سبهللة يقول...

فينك يا بنتى من اخر بوست بطلتى تكتبى ليه؟؟

mohra يقول...

كوارث
و الله 19 مره قليلين عليه


micheal
المهم الquality مش الquantity
الكيففففففففف مش الكم
نورت المدونه


سبهللة عالاخر
الحر بعيد عنك مفرهدنى بس انا جيت اهو

محمد حلمي مخلوف يقول...

اولا ربنا يوفقك ويرزقك بابن الحلال اللي احسن منه
ثانيا فوكوياما صاحب نظرية نهاية التاريخ وانتصار الليبرالية
اما صراع الحضارات فصاحبها هنتجتون

mohra يقول...

محمد حلمي مخلوف
عارفه و الله ..مش قصدى اضلل حد بس القافيه حبكت...شوف ردى على فاتيما
شكرا لزيارتك

snohe يقول...

تعرفى
عجبنى جدا تعليق فاتيما العزيزه هى عندها حق
انتى كان انطباعك عنه مش واضح دليل على وجود اختلافات كتير بينكم
وبعدين الانسان المناسب اكيد لسه فى الطريق
على فكره الدبلوماسيين ممكن يكونوا فاشلين جدا فى عملهم
يعنى مثلا طبيب ناجح افضل من دبلوماسى بيشجب ويدين ويتحفظ ----الخ من مصطلحات ملهاش اى معنى من الاعراب
تحياتى يا دكتوره