الجمعة، 14 أغسطس، 2009

و الفقى لما يسعد

عدنا بعد الفاصل
كالعاده فى الحر القائظ ده لا يمكن اكتب حاجه جديده عشان كده هاحكيلكوا حكايه قديييييييييييييييييييييييييييييييمه من باب التسالى

مشهد صباحى فى المستشفى
دكتور ماعرفوش:يا دكتوره انا عندى لكى عريس.......موافقه؟
-موافقه على ايه؟
دكتور ماعرفوش:هو دكتور و ماعرفش عنه حاجه
-طب اشوفه الاول
دكتوره ريا :خلى بالك الدكتور"ماعرفوش "ده اصلا متجوز3 !!!!!!
-تلاته؟؟؟؟؟؟؟؟؟


مشهد مسائى فى البيت
واحده صاحبتى" مخطوبه قريب" :فى واحد شافك فى الخطوبه و عايز يتقدملك
-طب انا متقدملى واحد تانى الايام دى
-و ماله شوفى الاتنين
- انتى عريسك بيشتغل ايه؟
- دكتور
-و التانى برضه دكتور
- بصره ....بس عريسى تخين شويه
- مش مشكله .....المهم الجوهر


قوم ايه ظبط المسائل بانى اشوفهم فى يومين ورا بعض (انتهازيه بعيد عنكم)
اليوم الاول


كنت فى المستشفى باعرض حاله على الجراحه و لقيت أمه لا اله الا الله بتكلمنى على الموبايل و الداخلى والخارجى و النداء الالى بتاع المستشفى و باعتنلى العامله تنادينى و مش ناقص غير البوكس وامين شرطه يقفشنى ...حاجه اخر فضايح
المهم رحت على ملا وشى لقيت ريا و سكينه مظبطين القعده و قاعدين بيستجوبوا عريس الغفله ابص عليه لقيت واحد بدقن و ماسك كيس هدايا ورق من اللى بيكتبوا عليهم


Habby nu yeer

و" كيسه" بلاستيك اصله كان بيقضى مشاوير و لقى نفسه فاضى قام قال يعدى علينا ...قوم انا نفسى اتسدت و بصيت لتحت ( و بالمره اعمل مكسوفه) و ابصلك لتحت لقيته لابس دبله فاتسدت نفسى اكت.....قصدى اتكسفت اكتر و بصيت على الارض الاقيه لابس صندل مترب ... المشاوير زى مانتم عارفين

و لانى شخصيه عقلانيه لا تهمها المظاهر ابدانننننننننننننننننننننننننن بدأنا الحوار لقيت الاخ البالغ اثنين و ثلاثين ربيعا لسه متخرج السنه اللى فاتت(يعنى بعدى بيجى خمناشر سنه!!!)
-و انت ليه قعدت فى الكليه كل ده؟
-حكايه طويله مش وقتها دلوقت
امال امتى وقتها؟مش مهم و بلاش نتكلم فى الماضى على رأى" الهضبه"
-طب بتشتغل ايه دلوقتى؟
-فى ديوان عام الوزاره بس فاتح عياده
-عياده ايه؟
-ابر صينيه و علاج بالموجات الكهرومغناطيسيه
-كهرو.....ايه؟؟؟؟
-مغناطيسيه
-وده فى انهى فرع فى الطب الكلام ده؟؟؟السالب و لا الموجب؟؟؟؟؟يعنى تخصصك ايه؟
-لا انا لسه ما تخصصتش
-امال فتحت العياده ازاى؟
-دى كانت دوره تدريبيه فى الابر الصينيه
-آآآآآآآآآآآآآآآآآآ............................................يلا بلا طب بلا غم ....طب انت لابس دبله ليه؟
-هو انا مش متجوز لكن بلا بلا بلا بلا بلا بلا بلا بلا بلا بلا بلا بلا بلابلا بلا و لو انتى ماشيه فى الصحرا ...بلا بلا بلا بلا بلا بلا بلا بلا
-.....................................(لا تعليك)
و هكذا قررت الانتقال لليوم الثانى و وداع اليوم الاول غير مأسوف عليه بلا هضبه بلا جبل

اليوم التانى
العريس كان عن طريق خطيب صاحبتى و الاجتماع المزمع عقده كان يتضمن كل من السيده الوالده و السيده والدتها و السيد خطيب صاحبتى والسيده حرمه (على اعتبار ما سيكون) و السيد العريس و انا و...كفايه كده
و بعد اكتر من ساعه انتظار فى بيت صاحبتى شرف خطيبها و خطيبى (على اعتبار ما سيكون برضه) طبعا انا كنت شعله من الغضب لكن العريس الحقيقه كان مهذب و لطيف وطموح و مكلبظ و ليه خدود حمر مكلبظين زى الاطفال وانتو عارفين قد ايه بحب الاطفال.....المهم عرف يمتص غضبى
الخلاصه هو كان طموح و مجتهد و انا استريحتله و انتهت المقابله وهو كمان متحمس جدا جدا جدا و عايز نمرتنا عشان نخلًص و قلت خلاص بقه
...فرجت و لسوف تحملى اللقب يا بت
موقف غير معتاد بالمره ..حاجه غريبه مش كده ؟؟خرجنا انا و ماما للعربيه و احنا ماشيين ماما ماقدرتش تقاوم و سألتنى

ايه الاخبار؟؟؟
قوم انا مربوطه من لسانى و ربنا ما يفتحش عليا غير بكلمه "ملظلظ" مع تحريك الذراعين بامتدادهم!!!!!!!!!!!
تسألونى و ليه كده اقولكم قله ادب بس ما تخلوش عندكم فكر ...العقاب جاى حالننننننننننن
و انا فى غايه الانسجام وعماله احرك دراعى يمين و شمال لتأكيد المعنى...الحاسه الساسه (فاكرينها طبعا) خلتنى ابص لورا اذ فجأتن
و الاقيك مين معانا يشارك فى الحوار بقلبه و ودانه و سلاطته و بابا غنوجه.....................



العريس الملظلظ بذات نفسه



يالهول مأساه اليقين...اتارى طنط ام صاحبتى "الله يكرمها" قالتله مايصحش تسيبهم يروحوا للعربيه لوحدهم (يعنى هايجرالنا ايه يعنى) و هكذا خرج يهرول ورانا و كانت المأساااااااااه
طبعا مش محتاجه اقولكم ان الموضوع اتنسف من اساسه و انا اريد و انت تريد و الله يفعل ما يريد
بس انا مش مضايقنى فى الموضوع الا انى جرحت مشاعر شخص بدون ماقصد و الله و اعترف انى كنت ناويه اكمل بس يالا خيرها فى غيرها




ملحوظه
تم تغيير اسم التدوينه الى " المتعوس متعوس و لو علقه فى ديله فانوس"
وبمناسبه الفانوس كل سنه و انتم طيبين

هناك 31 تعليقًا:

كيــــــــــــارا يقول...

تصدقى العريس التانهي صعب عليا اوي

ربنا يرزقك الزوج الصالح ياتوتا

rovy يقول...

ههههههههههه
كل سنه و انتى طيبه يا قمر و الله كنتى وحشااانى جدا ..
بصى هو مفيش نصيب و ان شاء الله يارب يااارب بحق الايام المفترجه دى قريب جدااا جدااا نشوفك احلى عروسه مع انسان بجد و يستاهل انسانه جميله مثلك لها قلب من ماس زى قلبك .. ربنا يرزقك كل السعاده يااارب
ياريت ما تتأخريش علينا كده تانى بجد بتوحشينى جداا ..
مودتى و حبى و ارق تحياتى

لاسع افندى يقول...

ههههههههههههه

بس اسألى على النصيب



تحياتى اللاسعه

تايه في وسط البلد يقول...

أووووووووببببببااااااااااااااا

انا كنت باضحك كتير طول القراءة لكن جفلت في الأخر لما حدث
تصرفك كان تلقائي ويناسب النفس البشرية كثيرا ولكنه فيما يبدو لم يكن يناسبه - او ان الموضوع ده بالنسبة له خط احمر!!!!

عموما لا عليك
كل سنة وانت بالف خير ورمضان كريم

micheal يقول...

ههههههههههههههههههه..عليا النعمة مسخرة ولا الواد اللي بيكتب مغامراتي في إنترفيوهاتي
:)
دورة تدريبية في الابر الصينية...ممممممم..وماله
وبعدين هو فيه حد دلوقتي فيه حيل وعنده وقت يتجوز تلاتة
أما الملظلظ فأنتي قمتي بالواجب..هع هع
كل سنة وأنتي طيبة
متبقيش تغيبي الغيبة الطويلة دي

blue-wave يقول...

هههههههههههههههههههههههههههههههههه

mohra يقول...

كيــــــــــــارا
ليه تحسسينى بالذنب ...كفايه اللى حصل
بس عارفه هو ربنا بيسبب الاسباب و انا كنت عامله استخاره و اظن ان دى كانت النتيجه حتى لو بطريقه غريبه




rovy
و انتى طيبه يا روفى
والله مش عارفه اقول ايه على دعواتك الجميله دى..ربنا يخليكى لينا




لاسع افندى
صحيح هى قسمه و نصيب



تايه في وسط البلد
و الله انا كمان جفلت ....مش انا بس.. لا كلنا




micheal
احنا نطول يا مايكل؟؟
شفت العجايب اللى بتحصلى ..زيك بالظبط



blue-wave
ازيك يا عمرو
فينك من زمان
كل سنه و انت طيب

زمرده يقول...

وانا اقول النت منور ليه
هههههه بس جد حرام كسرتي بخاطر العريس

عموما ولا يهمك ياستي ربي يعوضك بافضل منه
وكل عام وانتي بخير

ملكة بحجابى يقول...

السلام عليكم ورحمة الله وبركاته
ورمضان كريييييييييييييم
والله اكرم
برد على نفسى
عاتى عاتى
والله انتى قمر
مظبطة العرسان كدة واحد ورا التانى
يابت عايزين نفرح بيكى بئى
انتى عارفة
انا فضلت اقرا واضحك

بس صعب عليا الراجل الملظلظ
والله ده الراجل الملظلظ بيبقى زى السكر وطيووووب
وللعلم اعز زمايلى عليا هما الملظلظين
يالله خيرها فى غيرها
مستنية الجدييييييييييييييد

تحياتى
أميرة
(ملكة بحجابى)

Zianour يقول...

كل سنة وانتي طيبة وسعيدة وبخير انتي ومن تحبين..

وحشاني جدا وباحب دايما طلتك الجميلة

كل سنة وانتي طيبة يا قمر

سؤال اخير

جبتي الفانوس؟؟؟

:))

mostafa rayan يقول...

يلا حصل خير .. ربنا يعوضك بالاحسن بس ماقلتلناش عملت ايه بعد كده مع طنط ؟
كل سنه وانت طيبه

mohra يقول...

زمرده
و الله ما كنت اقصد يا زوزو
و رمضان كريم يا ستى



ملكة بحجابى
ازيك يا اميره
كل سنه و انتى طيبه
هو نصيب هنعمل ايه بقه؟



Zianour
ازيك يا قمر و كل سنه و انتى طيبه
للاسف ماجبتش فانوس بس جبت ماوس جديد لللاب توب




mostafa rayan
و الله انا قلت المسامح كريم و كفايه اللى حصل ...و زى مانت عارف يخرب بيت الحوجه ..ماحدش عارف بكره هيحصل ايه

نهــــــــــار يقول...

السلام عليكم.....
هههههههههه
يابني مش قادره اوقف ضحك .....
بقى ملقيتيش غير الكلمه دي....
قدر الله وماشاء فعل ...
......
كل عام وأنتي بخير ورمضان مبارك...

snohe يقول...

كل سنه وانتى طيبه يا دكتور

تعرفى ساعات كتير بنتكلم من غير قصد وتكون النتيجه ناس تزعل مننا ويمكن ناس تبعد عننا خالص
معلش هو مفيش نصيب
لكن صراحه الموقف يموت من الضحك
معلش خيرها فى غيرها

تحياتى

Epitaph1987 يقول...

قدر الله وماشاء فعل

ربنا يرزقك الزوج الصالح ان شاء الله
:)

بس انا ضحكت اوي في بتاع الابر الصينية ده

ومتزعليش من نفسك في موضوع العريس التاني
هو موقف وعدا وخلاص
ومفيش نصيب بشكل او بآخر
:)

mohra يقول...

نهــــــــــار
غيرتى اسمك؟؟؟؟؟؟؟؟
اهو يا ستى مربوطه من لسانى ...اعمل ايه؟
رمضان كريم و كل سنه و انتى طيبه



snohe
زى ما بيقولوا لسانك حصانك
رمضان كريم




Epitaph1987
عارفه انا كنت عامله استخاره قبلها و قلت اكيد دى نتيجتها بس جت بطريقه غريبه شويه
نورتى المدونه

غير معرف يقول...

Mabrooooooooooooooooooooook

dr/shiko يقول...

اسلوبك حلو قوي ياد/مهره .. بس انتي مش شايفه انك عقدتيها شوية مع العريس الاولاني ايه يعني صندله مترب .. دليل علي الكفاح والشقاء .. وايه يعني لابس دبلة .. دليل علي العفة من قبل الارتباط ... هو ده اللي بيطفش العرسان .....ههههههههههه

انت تسال والكمبيوتر يجيب يقول...

نحن اول برنامج أذاعى عن النت والمدونات ويذاع يوميا عدا الجمعه التاسعه وعشر دقائق صباحا على موجات الأذاعه الرئيسيه لمصر
نحن نطرح موضوعات الحلقات قبل اذاعتها فى مدونتنا لبعلق عليها اصحاب المدونات او غيرهم من الزائرين
ونذيع هذه الموضوعات مع التعليقات ومقتطفات من مدونات اصحابها اذا رغبوا
وبذلك نجمع لأول مره بين الأعلام التقليدى والنت
مدونتنا
http://netonradio.blogspot.com
يعود البرنامج بعد العيد

micheal يقول...

كل سنة وأنتي طيبة
عيد سعيد

غريب يقول...

كل عام و انت بخير
جعلك الله من سعداء الدنيا و الأخرة
وكلها أقدار مكتوبه
كما أمتعتينا بتدويناتك الممتعه التي تداعب آلامنا و أفراحنا أسأل الله أن يرزق الزواج بعبد من عباده الصالحين المصلحين الطيبين
اللهم آمين

و الحياة يشتيلهاااا صبر بإبتسامة عرررريضه

لك مني شكر و تقدير

micheal يقول...

بلاش كسل بقى ..عاوزين بوست جديد

rovy يقول...

كل سنه و انتى طيبه يا دكتوره و عيد سعيد يارب و يارب دايما كل ايامك عيد
معلش انا اتأخرت فى تهنئتى بالعيد النت كان فاصل عندى الايام اللى فاتت ..

وحشانى جدااا و فين البوست الجديد انتى كمان كسلانه ويى اليومين دول :)

خالص مودتى دائما

تايه في وسط البلد يقول...

مهرة

عذرا فلم أجد خيرا من مدونتك كي تكون منبرا لدعوتي للإخوة المدونين لجولة بين مساجد القاهرة الأثرية وأثارها الإسلامية بمبادرة شخصية متواضعة وبمحاولات دخول اماكن ممنوعة علي الجمهور العادي

ارجو الاهتمام

وشكرا

nour يقول...

مدونتك رائعة..

اتمنى لكى المزيد من التقدم والنجاح فى حياتك


دعوة لزيارتى
http://nour-close.blogspot.com

مع خالص الشكر

نور

NasEr يقول...

lol that was funny,maybe he'll come back why don't you talk to him or something ? if you think you should clear that out just give him a call or something ,would that be too bad ?

mohra يقول...

dr/shiko
الله يخليك يا دكتر
بس و الله انا كنت متساهله فوق ما تتصور



micheal
وانت طيب يا مايكل
انا راجعه اهوه هواااااااا



غريب
خطوه عزيزه فى المدونه
ودعوه اعز



rovy
و انتى طيبه يا روفى
اخبارك انتى ايه؟
انا جايه حالاااااااااااا




تايه في وسط البلد
دعوه ممتازه و سابدأ بنفسى و اكتب عن الزياره فور اتمامها
و عذرا على تأخيرى الذى لا ذنب لى فيه و الله (الوصله على الفودافون على اتصالات ....)



nour
شكرا يا نور
و لكن للاسف لم استطع الوصول الى مدونتك و دوما تظهر لى مدونه اخرى فهل هى لك؟؟؟




NasEr
i also thought it was funny ,never really regret it
i always belived its all god will and i am sure it was for the best

anyway i wouldnt dare to call him and say the same word again :))))))

Zianour يقول...

وحشااااااااني


سامعة؟؟؟


وحشاااااني


يا رب تكوني بخير وسعادة

بوسات كتيرة
:))

rovy يقول...

وحشانى جداااااااا
فينك ؟؟
ليه غايبه عننا كده .. ؟؟
فى انتظار جديدك حبيبتى .. ما تتأخريش علينا ..

مودتى و تحياتى

تايه في وسط البلد يقول...

الناس من قبلي اوضحت ولا مزيد

ولك عندي دين قديم

تعالي الي المدونة لتتسلميه

موقع تعليم الفوركس للمبتدئين اون لاين يقول...

ربنا يكرمك يا رب