قضيت الاسبوع الفايت كله لف فى انحاء القاهره الكبرى ما بين العتبه للتحرير للعباسيه فى عز الضهر ده غير المرمطه ما بين مكاتب الموظفين اللى شعارهم "ليه تسهل على الناس مادمت تقدر تكلكعها" و يدور الحوار التالى
-لو سمحت
-نعم (تعبير وشه اهانه فى حد ذاته)
-كنت عايزه كذا
-ما ينفعش يا انسه
-ليه
-هو كده
-طب....
-ماطبش,اخوكى كان هنا امبارح و مشى قفاه يقمر عيش
-اخويا؟؟؟ده انا سايباه فى اسكندريه من اسبوع؟؟
-يووووووووووه ,زميلك زى اخوكى يعنى ...امال دخلتوا طب ازاى
-.................
و اخرج اسأل فين المدير؟ و يتكرر نفس الحوارلكن لانه لايأس مع الحياه فانا باكمل و اسأل عن المدير الاكبر و هكذا لمده ساعه ساعتين او يومين و فى النهايه اخد الامضا الشريفه فى خمس دقايق
المهم عشان ما تتعلوش قدرت اقدم الطلب المكون من 18 ورقه (بجد مش هزار)و لا كأنى هاقدم على منصب مساعد وزير الرى بس المعاناه ديه ادت الى انهيار حالتى النفسيه الى الحضيض لكن لانه لا يأس مع الحياه و لا حياه مع اليأس (منه لله مصطفى كامل ) قررت أرٌوح عن نفسى و اروح حفله موسيقى فى ساقيه الصاوى اصل انا مابحبش حفلات الاغانى يعنى
قوم ايه اتفقت مع لولو قريبتى اننا نروح و بعد يوم شاق و عمل كام مشوار على الماشى قبل الحفله و لف على الركنه قد ساعه و طبعا ماكناش حاجزين لكن وصلنا بدرى ساعه و لوسمحت تذكرتين.....هنا كويس؟ بس ما تتأخروش بكره بقه
بكره؟؟؟؟؟؟
لولو:تاننننننننننننننى(اصل انا ليا سوابق فى موضوع الحول فى قرايها المواعيد من النت من زمان)
و العمل ؟؟
انا يا قاتل يا مقتول انهارده ده انا حزمت امتعتى و هابيت عند لولو انهارده على حس الحفله...كل ده يروح عالفاضى
-شف لنا عندك ايه انهارده
" افضل اغانى الخمسينات و الستينات بصوت الهام امين"
-ما بحبش الاغانى القديمه
-يا عبيطه حد مايحبش عبد الوهاب و فريد و يمكن يكون توزيع جديد او تكون الاغانى اللى بتتعاد دلوقتى يعنى ياحبيبى عد لى تانى-حكايتى مع الزمن - اسمهان ...كده يعنى
و طبعا لانى شخصيه ساحقه ماحقه البنت الغلبانه وافقت و حجزنا فى وش المسرح بالظبط
و قبل الحفله الناس عماله تيجى ثمانين سنه و طالع ..عشر سنين ما يضرش و كمان اجانب
-شايفه يا جاهله حتى الاجانب بتيجى تسمع الفن الشرقى الاصيل
-طب و العيال؟؟
-اهلهم بيعلموهم ازاى يحبوا تراثهم
-تراثهم!!ماشى يا ختى
وبدأت الحفله و دخل علينا الهام لابس اسود فى اسود و رابط شعره لورا و طول بعرض بارتفاع يفكرك كدا بزعماء المافيا بتوع السينما(طلعت الهام رجل مش ست!!!!)
و اشتغلت الموسيقى و مش غريبه عليا الموسيقى ديه...ايه يا مهره؟ايه يا مهره؟
make me swayyyyyyy
يا نهار اسود و منيل ديه طلعت حفله انجليزى و كمان ستينات...يا سلا سوخه يا ولاد...ماكنش يومك يا مهره ده انا لما باسمع فرانك سيناترا باقفل التلفزيون مابقلبش القناه حتى
لولو بتزغرلى (و فريد و شرقى و التراث اكيد هاتسبنى اروح موتورجل النهارده) قعدنا نسمع و لا حول و لا قوه الا بالله و الهام والناس اخر صهلله و الله لولا انه مكان محترم كانوا اتحزموا و رقصوا و الناس حافظه الاغانى و ماحدش قاعد متنح غيرنا خاصه انه بدأ يغنى بلغه تانيه ايطالى اسبانى الله وحده اعلم و فى نهايه احدى القصائد لولو لفتلى
-اخر مره هاسمحلك تصقفى
-ليه؟
-انتى كده بتخدعيه
-مين؟
-الهام
-الهام مين؟؟؟؟؟؟؟؟آآآآآه
الجدير بالذكر هنا ان الهام يمتلك احد اقوى الاصوات التينور اللى يحسده عليها بافروتى نفسه الله يرحمه و كل اغنيه يرزعلنا حته يا BABYYYYYYYYYYYY تنقح اللى قبلها و الله خسارته فى ساكن فى حى السيده كان هايبدع بس اشك انه او اى واحد من اللى قاعدين( باستثنائى انا و لولو) يعرف ان عندنا حى اسمه السيده
الحفله استمرت لمده ساعه (لو زادت كان السقف وقع علينا مع واحده من يا BABYYYYYYYY )ولجل حظى السعيد طلعت اول حفله لالهام و انا باتمناله من قلبى والله كل توفيق بس بعيد عنى عاااااااااااااااااااااااااااا
اسيبكم دلوقتى مع هذه المقطوعه و كل حفله وانتم طيبين
